2012年2月23日星期四

Chink in the armor

所謂人怕出名豬怕肥,真係一啲都冇講錯。自從林書豪一夜走紅,傳媒都將焦點集中喺佢身上,最近就有人因為喺報導標題玩嘢玩出禍。

話說ESPN喺林書豪輸波之後發表咗一篇報導,標題竟然係「Chink in the armor」。連我呢啲唔係太識英文嘅人都知道chink呢個字帶有種族歧視成份,喺美國咁嘅多元種族社會,當然會引起極大回響啦。結果ESPN受千夫所指,唔止一再道歉,仲要炒埋個寫手,連涉事主播都要停職一個月添。

Chink呢個字係歧視中國人嘅講法,我一早就知,不過一直都以為係「清」(清朝)嘅譯音。早兩日睇完相關報導先知道,原來chink係裂縫咁解。而「chink in the armor」就係一句由來已久嘅西洋成語,意思係「弱點」。好明顯,個寫手係懶醒,想玩語帶雙關。至於係咪針對林書豪,咁我就唔知嘞,一定要睇埋報導裏面有冇不符事實嘅惡意攻擊先得。

話時話,我睇完呢句嘢,又真係冇乜特別感覺喎。一來,林書毫唔係我偶像,事實上,我根本就冇偶像。而且,chink字對中國人有幾侮辱,我亦冇乜概念。如果未喺由其他種族主導嘅社會生活過,又真係未必體會到俾人歧視嘅感受係點,甚至連人地有乜歧視用語都唔一定會知囉。好似Chinaman呢個字,就咁睇我會唔覺有乜歧視成份,但係事實上,呢個字同chink一樣,都係對中國人歧視嘅講法。

不過咁,好多時啲所謂歧視語句,其實都係「言者無心,聽者有意」。而家喺香港,有人就認為鬼佬、阿差、賓妹呢啲講都法帶有歧視成份,不過事實又係咪咁呢?好似我舊公司咁,基本上係聯合國,除咗黑人,幾乎乜嘢種族都有。我地班同事圍內提起啲expatriates,都係白人叫鬼佬、南亞人叫阿差、菲律賓人叫賓佬、日本人叫架仔,泰國人叫泰仔,國內人叫大陸佬。呢啲只係口語化嘅叫法,起碼我自己就完全冇歧視啲外籍同事嘅意思囉。事實上,啲白人同事根本就唔介意俾人叫鬼佬。有隻鬼仲用唔鹹唔淡嘅廣東話講「我係一個死鬼佬」添,真係俾佢笑死。話時話,鬼佬講唔鹹唔淡嘅廣東話,人人都覺得好cutie。不過啲新移民講嘢帶口音,就俾人笑都面都黃,呢啲就係真正歧視嘞。

當然啦,我唔係話所有歧視都係啲弱勢社群自己幻想出嚟。有隻喺飲過鹹水嘅舊馬,就同我講過佢喺澳洲嘅親身經歷。佢話有次喺條街行緊,竟然有個白人阿婆無啦啦喺對面馬路走過嚟鬧佢。無獨有偶,香港最近都發生咗類似嘅嘢,有人特登走去購物熱點鬧啲自由行旅客。連同文同種都可以歧視,唔同種族嘅就更加唔使講啦。

冇人會鍾意被歧視,不過最諷刺嘅係,好多人一方面受到歧視,而另一方面又歧視番啲比自己更弱勢嘅群體。好似白人歧視有色人種,而黃種人又睇唔起比自己膚色更深嘅南亞人同黑人。舉個例,如果港女嫁俾白人,相信唔會有人覺得有問題,可能仲會有好多人羨慕添。但係嫁俾南亞人或者黑人嘅話,唔止家人會反對,連三九唔識七嘅路人都會投以奇異目光。

諗深一層,咁其實都好正常,啲人只係維護自己嘅權益啫。如果淨係俾人歧視,自己又唔歧視番其他人,咁咪好蝕底?尤其喺華人社會,「千祈咪蝕底」早已被奉為金科玉律。連我自己都係咁架,如果啲九唔搭八嘅蒙面人走嚟留言辱罵,我肯定會還拖囉!

不過凡事都有例外,好似「盔甲裂縫」單嘢,林書豪嘅反應就好唔同嘞。被問到對事件點睇,佢話相信ESPN唔係故意,仲話要學會原諒,真係答得非常得體。事實上,佢由走紅開始,一直都表現得好謙遜,同時下啲年輕人「一朝得志,語無倫次」嘅態度可謂判若雲泥。佢嘅球技有幾好,我自問冇資格評論,但係對於佢嘅內涵,我就非常欣賞!寄語香港嘅後生仔,唔好淨係睇到林書豪喺球場有幾威,其實佢嘅處世態度都好值得學習架!

London Tower, London, UK

Consuegra, Spain

7 則留言:

  1. 呵呵,港女嫁俾南亞人或者黑人...

    我會講勁咯 ^^

    書豪仔真係優質,真正嘅哈佛生真係唔講得笑!

    回覆刪除
  2. laulong,
    哈哈,淨係黑人先勁架咋,南亞人就。。。。都係唔好講嘞,費事俾人話我種族歧視!至於林書豪,叻得嚟又有內涵,抵讚!

    回覆刪除
  3. 有啲人在歧視別人的過程中自以為優越了,所以越多嘢畀佢歧視,佢越有優越感,自我滿足感越強。

    回覆刪除
  4. Coffee,
    係呀,呢個係惡性循環,越係踩低人地就越自我感覺良好!而且好似吸毒咁,會上癮架!

    回覆刪除
  5. 有一位遠親,寡母婆守大幾個兒女。大仔讀到博士,娶了一位黑人女人,也是博士,她與兒子斷絕關係了!十分可悲的結局!

    回覆刪除
  6. 林書豪有品,足以令攻擊者汗顏,好野!

    回覆刪除
  7. 佛爺:
    最初應該係由歧視開始,不過後尾搞到咁大鑊,就好有可能係出於妒忌。尤其是係寡母婆守仔,好多時會覺得個仔結婚就等如俾第二個女人搶走咗。

    Ebenezer,
    廿零歲仔,又喺美國土生土長,但係竟然會咁有品,我真係覺得好奇怪囉!

    回覆刪除