2011年6月25日星期六

身在輻中不知輻

是但台好!是但台有種!

平時我好少讚是但台,不過今次真係要讚吓佢地。香港傳媒一向俾我嘅印象係誇張失實、譁眾取寵,為咗銷量(或收視)就乜都做得出,甚至不惜同惡勢力同流合污。今次是但台真係抵讚,竟然冒住垮台嘅風險,同三大惡勢力對抗!我係指今晚播出嘅「新聞透視」,主題係「輻射恐慌」。

大家都知,自從福島發生核洩漏事件,連香港都人心惶惶,唔敢食日本不特止,仲發生埋極其戇居嘅「盲搶鹽」事件添。環保團體當然唔會錯過呢個大好機會,有咁大做到咁大,發起一連串反核示威。佢地不斷宣傳核輻射有幾危險,仲用埋切爾諾貝爾附近出生嘅畸形兒童相嚟嚇人,製造輿論迫政府關閉核電廠。究竟日本核洩漏事件嘅影響,係咪真係好似佢地講得咁嚴重呢?

今集「新聞透視」就咗幾位專家,用專業角度去分析呢個題目。我記性比較差,一睇完個節目已經有好多細節唔記得咗,不過大致上都明白佢地講乜。其實輻射並唔唔係聽起嚟咁恐怖,因為我地日日都會接觸到,根本就係無處不在。而由日本輸入嘅食品都經過檢測,輻射量屬於正常水平,唔會對人體健康構成威脅。至於喺切爾諾貝爾附近出生嘅畸形嬰兒,亦冇足夠證據顯示係核輻射造成,因為嘅畸形嬰兒度度都有,而喺當地出現嘅比率都只係屬於正常水平。

根據節目內容,香港人嘅過敏反應似乎係有杞人憂天。節目冇講明係乜(或邊個)導致今次嘅恐慌,不過就提供咗一好有趣嘅資料。專家做過研究,列出究竟一般人最容易受乜其他人影響。原來最具影響力嘅係親人,環保團體亦都喺前列,排名眾高過專家,而政府就差唔多最冇影響力。哈哈,唔怪得政府話驗過日本冇問題,但係就冇人信啦!

我當然知道電視台點解唔可以講得太明白,因為有惡勢力係唔可以得罪嘅。不過我就唔同嘞,我又唔係靠個blog食,就算得罪晒全人類又如何?引起呢次嘅恐慌,首先係環保團體喺度無限作大,跟住傳媒就加鹽加醋,而市民又唔用自己個腦諗吓,乜都照單全收。如果電視台敢話係人自己無知,睇怕聽朝連電視城都會俾人夷為平地!

雖然個節目睇得好過癮,不過始終係政治不正確,都唔知點解會出得街!

6 則留言:

  1. 傳媒講就新聞自由,很多時就煸動人心,惟恐天下不亂。

    回覆刪除
  2. 兄台你點解釋日本兩次原爆後十年咁多畸胎?

    另外D烏克蘭同白俄細路有血癌比率高正常四倍喎,你又點解釋先?

    大台講o既只係合乎你主觀意願,唔係事實來。兄台你咁偏激好難了解真相。

    回覆刪除
  3. 我剛係Taste買了一大盒壽司回家當晚餐,唉:P 唔行得呢啲超市,太吸引了!

    回覆刪除
  4. 佛爺:
    越誇張嘅報導就越受歡迎,反而客觀分析就冇市場,呢就係而家嘅傳媒生態,真係唔知怪邊個先啱!

    詩白爾:
    首先,我從來冇講過核輻射對人體健康冇影響!我只係話環保團體講得太誇張,而傳媒又喺度推波助瀾。我亦唔認同你話我偏激,如果你係話偏執,我都仲可以理解,始終大家嘅觀點真係有好大分歧。不過我絕對唔激,好似我雖然討厭班無政府份子,但係就絕對唔會因為咁而大讚我地個無能政府。如果真係要話我偏激,閣下亦只不過係一百步笑五十步啫!

    Coffee,
    哈哈,雖然我討厭日本仔,不過都真係要讚吓佢地,竟然可以將茹毛飲血嘅飲食方式提升到接近藝術層次!講真,三文魚刺身又真係好食過煙三文魚九千幾倍喎!

    回覆刪除
  5. 嗰啲出黎講嘢嘅環保份子,往往是因為他們打緊環保團體份工,受人錢財,自然要加幾份肉緊!

    至於詩白爾所言,核輻射洩漏同原爆遺害係兩回事,不能用後者去證明或推論核子發電的遺害。

    回覆刪除
  6. laulong,
    環保份子而家就成日講核輻射有幾大禍害,到政府真係放棄咗核能發電嘞,班友又會走出嚟嘈,話燃煤發電會製造幾多污染,總之就佢地講晒,仲長講長有添!

    回覆刪除