2010年12月16日星期四

萬能?萬惡?

有人話金錢萬能,究竟金錢係咪有咁大威力呢?

事實上當然冇咁誇張啦,如果唔係,小甜甜都唔使咁快去賣鹹鴨蛋。不過咁,雖然唔係萬能,其實都相差無幾架喇。我就會話,如果有錢,真係能人所不能。早排就有單搞笑,唔知大家有冇印象?

話說有個讀中二嘅𡃁仔,帶咗四萬蚊現金同八部iPhone返學校派俾同學,條件就係要叫佢一聲「軒哥」。結果反應都不知幾熱烈,學生個個爭住叫軒哥,搞到要排晒長龍。最後因為搞得太揚,俾學校知道咗,即刻叫停,連收咗錢嘅都要嘔返出嚟。

聽講話條𡃁仔仔搞壇咁嘅係為咗溝女,想喺心儀嘅女同學面前威吓。而錢就係佢阿嫲俾佢買食嘅零用錢喎。

事件究竟反映咗乜?當然係金錢嘅威力啦!試問一個中二嘅戇居仔,有何德何能可以令到同學(包括高班同學)對佢咁恭維?俗語話有錢使得鬼推磨,而家叫聲軒哥就有錢收,實在太簡單喇。莫講話叫聲軒哥,就算係叫十聲軒爺我都制啦。

不過咁,錢可以買到人地嘅恭維,但係買唔到人地嘅尊重。事實上,收咗錢嗰人有邊個喺背後唔笑佢傻仔?單又一次證明咗錢唔係萬能嘅,起碼錢就買唔到尊嚴嘞。

講開又講,條𡃁仔又真係好戇居吓。如果佢心儀嘅女同學會覺得佢咁做好威,即係話條女都係信奉拜金主義啦,咁將錢直接俾條女肯定更加有效。我唔知條𡃁仔屋企係咪好似李+x咁有錢,如果係嘅話,幾萬銀當然小意思,就算日日派都冇所謂。如果唔係,佢過多幾年就會知道錢幾咁有用,到時就會後悔架喇。

至於收咗錢又要嘔返出嚟嘅學生,就肯定會覺得好唔抵。一來見財化水,二來無啦啦叫咗條戇居仔做軒哥,真係有貶自己嘅身份。雖然呢單只係小事,不過就證明咗錢可以令人做出一違背良心嘅。所以呢,又有人話金錢萬惡。

對於呢個講法,我絕對唔同意。以派錢單為例,其實雙方都係抱住不勞而獲嘅心態,而錢只係作為交易嘅媒介啫。就算係返到去以物易物嘅年代,呢咁嘅咪一樣會發生。其實話金錢萬惡,只不過係啊Q嘅精神勝利法。如果世界上有樣係萬惡,我就會話係人心,而唔係金錢!


3 則留言:

  1. 在我所認知的世界裏,金錢當然唔係萬能的,但金錢係世間最能接近萬能的?
    金錢係我們賴以生存的保障。當我還有生存的能力時,我會捍衛我認為更加可貴的自由,甚至不惜計算自己僅有的金錢來為自由埋單。但活了這麼多年,知道追求心靈自由並不比追求金錢物質更高尚...
    (我曾寫過一篇類似的,不過冇貼出。)

    回覆刪除
  2. 我也同意,人心是善與惡的根源。

    回覆刪除
  3. Coffee,
    我覺得有個講法好啱聽:有錢唔係萬能,但係冇錢就萬萬不能!

    佛爺:
    係囉,金錢只係一件死物,根本就冇可能有善惡之分!

    回覆刪除