企跳

琴日講開自殺，我又真係有體會喎。當然啦，呢家我自己未試過，不過就有兩個中學男同學都係自殺死嘅。

嗰陣仲讀緊大學，不過係第幾年就唔記得嘞。有日喺報紙見到一個中學舊同學自殺嘅消息，真係震撼到難以形容。到而家仲記得，佢係喺油麻地政府合署跳落嚟嘅。覺得震撼係因為點都諗唔到佢會自殺，真係完全冇可能。佢係班長同head prefect，雖然讀書成績普通，不過性格樂觀好動，人緣又好，絕對唔係一般人想像中會自殺嗰隻。佢冇留低遺書，而當時嘅傳媒又比較少炒作感人故事，所以一直都唔知道佢點解要自殺。

隔咗冇幾耐，有個死黨打電話俾我，約埋我一齊送一個舊同學最後一程。嗰個同學係隔離班嘅，其實唔算太熟，係喺走廊撞到至傾兩句嗰隻，印象中個人好隨和吓。佢用乜方式自殺我都唔係太清楚，不過就救得返，送咗入醫院。但係佢死意已決，半夜掹甩條氧氣喉，無聲無息咁走咗。我一向覺得，自殺嘅人只係一時諗唔通，如果死而有知，佢地一定會後悔。唉，唔通我一直都諗錯咗？

點都好，要自殺梗有原因，外人未必能夠了解。有一點可以肯定，如果真係要死，根本就唔會公告天下，外人亦都無從阻止。不過好奇怪，呢幾年香港嘅高調企圖自殺事件似乎多咗好多，真係唔知點解。早幾日就發生咗單企跳事件，都不知幾搞。

話說有個後生仔，因為不滿房署遲遲都唔幫佢清理屋企外牆嘅雀屎，一怒之下走咗上行人天橋玩企跳。條友不斷咁喺石壆欄河上面玩移形換影，班消防就喺下面抬住個氣墊走嚟走去，直頭俾佢玩到謝晒。最後條友俾人制服，送咗去醫院檢驗，場鬧劇先至結束。真係唔明條友嘅心態，竟然可以為咗一堆雀屎要生要死。唔通喺佢心目中，嗰堆雀屎嘅重要性可以同自己條命相提並論？

其實企跳嘅原因仲有好多，俾仔（或女）飛可以企跳，俾老闆炒魷又企跳，投資失利又企跳，同親人嗌交又企跳。究竟人係咪真係想死呢？抑或只係將自殺當成一種要脅手段？答案好明顯，睇吓高調企跳嘅成功率就知道。

我唔贊成自殺，但係對於有人作出咁嘅決定，我會抱「尊重」態度。幾時嚟我地冇得揀，唔通連幾時走都冇得自主？事實上，如果真係要死，亦冇人可以阻止到，事後譴責又有乜用？不過咁，如果以死作為要脅手段，我就一定反對，因為咁係侵害咗他人嘅選擇自由。而且，一個唔小心弄假成真就斃啦。死，一世人只有一次，絕對唔可以隨便攞嚟玩架！