2010年12月12日星期日

企跳

琴日講開自殺,我又真係有體會喎。當然啦,呢家我自己未試過,不過就有兩個中學男同學都係自殺死嘅。

嗰陣仲讀緊大學,不過係第幾年就唔記得嘞。有日喺報紙見到一個中學舊同學自殺嘅消息,真係震撼到難以形容。到而家仲記得,佢係喺油麻地政府合署跳落嚟嘅。覺得震撼係因為點都諗唔到佢會自殺,真係完全冇可能。佢係班長同head prefect,雖然讀書成績普通,不過性格樂觀好動,人緣又好,絕對唔係一般人想像中會自殺嗰隻。佢冇留低遺書,而當時嘅傳媒又比較少炒作感人故事,所以一直都唔知道佢點解要自殺。

隔咗冇幾耐,有個死黨打電話俾我,約埋我一齊送一個舊同學最後一程。嗰個同學係隔離班嘅,其實唔算太熟,係喺走廊撞到至傾兩句嗰隻,印象中個人好隨和吓。佢用乜方式自殺我都唔係太清楚,不過就救得返,送咗入醫院。但係佢死意已決,半夜掹甩條氧氣喉,無聲無息咁走咗。我一向覺得,自殺嘅人只係一時諗唔通,如果死而有知,佢地一定會後悔。唉,唔通我一直都諗錯咗?

點都好,要自殺梗有原因,外人未必能夠了解。有一點可以肯定,如果真係要死,根本就唔會公告天下,外人亦都無從阻止。不過好奇怪,呢幾年香港嘅高調企圖自殺事件似乎多咗好多,真係唔知點解。早幾日就發生咗單企跳事件,都不知幾搞。

話說有個後生仔,因為不滿房署遲遲都唔幫佢清理屋企外牆嘅雀屎,一怒之下走咗上行人天橋玩企跳。條友不斷咁喺石壆欄河上面玩移形換影,班消防就喺下面抬住個氣墊走嚟走去,直頭俾佢玩到謝晒。最後條友俾人制服,送咗去醫院檢驗,場鬧劇先至結束。真係唔明條友嘅心態,竟然可以為咗一堆雀屎要生要死。唔通喺佢心目中,嗰堆雀屎嘅重要性可以同自己條命相提並論?

其實企跳嘅原因仲有好多,俾仔(或女)飛可以企跳,俾老闆炒魷又企跳,投資失利又企跳,同親人嗌交又企跳。究竟人係咪真係想死呢?抑或只係將自殺當成一種要脅手段?答案好明顯,睇吓高調企跳嘅成功率就知道。

我唔贊成自殺,但係對於有人作出咁嘅決定,我會抱「尊重」態度。幾時嚟我地冇得揀,唔通連幾時走都冇得自主?事實上,如果真係要死,亦冇人可以阻止到,事後譴責又有乜用?不過咁,如果以死作為要脅手段,我就一定反對,因為咁係侵害咗他人嘅選擇自由。而且,一個唔小心弄假成真就斃啦。死,一世人只有一次,絕對唔可以隨便攞嚟玩架!


8 則留言:

  1. 我尊重某些選擇自殺的生命,一定一定是活不下去了!但你文中那位則不一樣,是攞生命當兒戲。

    這麼小的事就諗唔開,那是拿別人的錯來處罰自己!

    回覆刪除
  2. Coffee,
    哈哈,講到嗰個為咗雀屎企跳嘅人,只有兩種可能性:一係精神有問題,一係存心玩。最慘都係嗰班消防員,真係俾佢玩到殘!

    回覆刪除
  3. 忘記問了,你第二張相是非洲哪裡?全部穿上劃一紅裝,在幹甚麼呢?

    回覆刪除
  4. Coffee,
    嗰張係肯雅嘅Maasai Mara。其實只要將mouse pointer定喺張相度一兩秒就可以睇到架喇。

    回覆刪除
  5. Coffee,
    哈哈,我又唔記得答你第二個問題添,嗰係當地土人嘅傳統禮儀。喺以前,跳得越高會越受女仔歡迎架,不過而家就變咗做俾遊客睇嘅表演。

    回覆刪除
  6. 為咗一堆雀屎要生要死,條友要送入青山架喇!

    回覆刪除
  7. 唉,Arma, 我也曾有像你一樣的相識,年紀輕輕就去了,很惋惜!

    回覆刪除
  8. 佛爺:
    哈哈,青山係新界地方,雀屎肯定多過市區,睇怕佢入到去會癲得仲犀利喎!

    laulong,
    以前知道有同輩自殺,真係覺得好震撼!到而家有返咁上下年紀,如果見到有同輩病故,又係另一種震撼!

    回覆刪除