義海豪情

義海豪情終於播完喇！已經好多年冇完完整整咁睇晒一套電視劇，義海係唯一例外。就算係巾幗梟雄都係零零碎碎咁睇咗，唔係套劇嘅問題，而係見到豬尾辮就唔想睇！

至於義海，作為一套師奶劇嚟講已經算唔錯架喇。不過都係秉承咗無線劇虎頭蛇尾嘅一貫作風，結尾部分比較鬆散，有欠力度。其實我睇呢套劇，都係為咗男女主角。講到演技，祥仔同雯女真係冇得頂，嗰班偶像派演員絕對望塵莫及。好似陳蠔、林蜂、同蛇獅鰻咁，根本就唔係嗰個級數。不過咁，祥仔同雯女想蟬聯視帝視后，睇怕機會就微喇。始終呢類選舉，結果都係令人莫名其妙嘅居多。

所謂牡丹雖好，都要綠葉扶持，其實對於一套戲嚟講，配角都好緊要。既然醒哥同九妹已經咁多人講過，不如就講吓配角啦。

軍爺
失敗！既冇知人之明，又冇容人之量，點睇都係一個老糊塗。後期黐埋麗華度，直頭變埋老淫蟲添。仲話統率三千門生，根本就一江湖大佬嘅氣派都冇，連死都死得鬼祟過人。不過最搞都係嗰個假髮，成個頭盔咁，好惡頂！

喜姐
過火！其實心姐完全演繹到呢個角色嘅奸同狠，我絕對唔懷疑佢嘅演技。佢關目、功架、做手、同埋腔調都好掂，不過可惜呢套係電視劇，而唔係大戲。

大鳳
樣衰！我一直都覺得魯振順好樣衰吓，佢做呢個角色簡直就係天造地設！

阿鐵
絕！個角色本來冇乜發揮，成日都只係行行企企，跟出跟入。最成功係咗馬海倫嚟做，無論係個髮型，抑或係件長衫，都同佢襯到絕，加埋硬梆梆嘅表情，真係不作第二人想！

麗華
討厭！根據非正式統計，麗華喺網民最討厭嘅角色之中排行第二。都唔使理佢做過乜衰，淨係見到佢個樣已經令人好討厭。除非天生樣衰，要做到人見人憎絕對唔易架，真係要讚吓胡定欣。

晴晴
超煩！無線今次真係計錯數嘞，諗住整條浪漫嘅感情線，仲加埋個靚女，咁就師奶同麻甩佬都可以通殺，點知事與願違，晴晴竟然榮登最討厭角色榜首。鬼咩，次次睇到最緊張嘅時候就跳咗去晴晴日記，真係俾佢激死。不過最煩嘅，都係佢把死唔斷氣嘅聲，最尾仲要死足兩集先死得去，真係難頂！

向山大佐
搞笑！唔係話個角色，而係講緊金剛。唔係話佢做得唔好，事實上，佢真係好用心去演呢個角色。搞嘅係佢個樣，一見到就想笑，就算係做緊個嚴肅嘅表情，個樣都係好搞笑。睇嚟佢都係冇得轉型，喜劇先係佢嘅歸宿！

黑木少佐
驚喜！呢個角色戲份唔多，只係出過幾集，冇乜發揮機會。作為一個新人，李嘉已經演得相當唔錯。尤其是九姑娘色誘佢嗰場，個鹹濕樣就做得好傳神！

非凡哥
過癮！成套劇裏面，呢個角色最頂癮。一方面勁衰格，睇到個個咬牙切齒。而另一方面又勁搞笑，對套劇嘅沉重氣氛起咗調劑作用。如果冇咗非凡哥，真係會少咗好多歡樂氣氛。不過咁，角色有得發揮，都要個演員演得好先掂。麥包真係做得好正，雖然有一兩場稍嫌誇張咗少少，但係瑕不掩瑜，佢絕對有資格攞最佳男配角。不過之前都講過，呢咁嘅選舉多數都會令人跌眼鏡。雖然我投咗佢一票（在心中），但係睇嚟都係排骨仔機會大。世事就係咁架喇，有實力唔表示一定會成功！