2013年7月19日星期五

地獄走一回

大腸癌係香港第二號癌症殺手,每年新症超過四千宗。早期大腸癌冇乜特別徵狀,就算中咗招都好難及早發現。到出現病徵,好多時已經係中後期。

後期大腸癌病徵包括:
- 便便帶血、黏液
- 大便習慣改變
- 如廁後仍有便意
- 腹痛、腹瀉
- 貧血
- 體重減輕

高危因素有:
- 家族遺傳
- 肥胖
- 不良生活習慣,例如食煙、飲酒、少運動
- 不良飲食習慣,例如偏好高脂、高糖、低纖、或加工食品
- 年過五十

本人自問生活習慣唔多健康,大腸癌高危因素中咗一半。而後期病徵亦有一半出現過(有部分仲好頻密吓添),都咪話唔得人驚。雖然唔係咁like俾人搞後面,不過為咗求個安心,都係決定做次大腸內窺鏡檢查。話就話檢查,但係如果發現息肉都會順手割埋,不過要另外加錢。琴日先啱啱做完,感覺就好似去地獄打咗個轉,然後重回人間!

話就話要喺醫務所搞一粒鐘,但係照大腸鏡只係用咗十幾分鐘,因為仲有前戲,做完又要瞓番個事後覺。前戲係乜?哈哈,首先梗係要剝衫剝褲上床啦!會唔會好尷尬?咁又唔會喎,因為上床前要著番件有少少透視嘅特製開背睡袍。以本人咁厚面皮,呢啲當然唔算得乜嘢,跟住嚟嘅先惡頂。因為被插會好痛,真正埋牙前先要喺手背拮一針,注射止痛藥同鎮靜劑入靜脈。本人自問大膽,怕嘅嘢唔算好多,偏偏打針就係其中之一。點知拮完一針又一針,拮到第六針醫生就同我講,話我啲靜脈好扁,拮極都插唔正中間。好彩第六針終於搞掂,但係我已經想死咁滯囉。喺命懸一線之際,只感覺一股涼意由手背向上蔓延,跟住就迷迷糊糊咁瞓著咗,人事兩不知。

搞嘢過程幾乎一片空白,淨係記得醫生曾經叫我睇吓個screen,話係大腸裏面嘅現場直播。當時瘟瘟燉燉,望咗一眼就再瞓番,印象中畫面好似係一個無底深洞。到再醒番,已經俾姑娘推咗入更衣室。佢話藥力未過,仲未落得床,叫我瞓番個靚覺先。其實當時已經冇乜睡意,不過就有啲手軟腳軟嘅感覺。反正閒著也是閒著,不如check吓有冇插到開晒花仲好啦。首先凝神聚氣,繼而意守丹田,最後收腹提肛。好彩,既唔痕又唔痛,總算冇穿冇爛,應該唔會有啲乜嘢創傷後遺症啩。不過已經唔係完璧,惘然若失就點都有少少囉!

胡思亂想咗一陣,竟然覺得神完氣足,姑娘亦喺呢個時候叫我出去聽報告。聽完醫生講解,仲有隻大腸實景拍攝嘅DVD帶返屋企留念添。咁都好,可以填補番人生中一段十幾分鐘嘅空白。返到屋企,二話不說即刻開電腦睇片。唔睇都唔知,原來照大腸鏡係由大腸最末端(即係盲腸位置)開始,然後慢慢褪出嚟架。初初睇真係覺得好神奇,仲有啲感動添,做咗幾十年人,從來未試過咁清楚見到自己嘅inner self囉。但係越睇越唔對路,到臨近結尾,直頭恐怖過睇鬼片添,因為……我見到……屎呀!我已經跟足指引做架啦,估唔到仲會見到啲咁恐怖嘅嘢!

照大腸鏡只係十幾分鐘,但係事前準備就要早兩日開始做,確保大腸裏面嘅廢物可以排清。檢查前兩日唔可以食高纖食物,例如豆類、蔬菜、生果等。檢查前一日只可食流質食物,朝早要食兩粒細細粒嘅瀉藥(Dulcolax),夜晚要飲一樽仔瀉劑(Fleet Phospho Soda)。

其實好耐以前已經聽人講過嗰樽瀉劑難頂架喇。樽瀉劑勁鹹唔在講,飲完仲要大量飲水(三粒鐘內唔少於一公升)。跟住就會頻頻去廁所,痾水痾到腳都軟。講真,我又唔覺得嗰樽嘢好似啲人講得咁難頂囉。其實肚仔都冇痛,只係漲住漲住,成日要去廁所。痾水亦冇乜特別不適,唔會痾到腳軟,根本就同小便差唔多,只係出口唔同啫。

反而朝早食嗰兩粒丸仔先惡啃,雖然只係痾咗兩次,但係就辛苦到想死咁滯。本人肚仔一向唔聽話,肚痾可謂家常便飯,不過從來冇試過痛得咁厲害。嗰種攪吓攪吓、抽住抽住嘅痛法,真係非筆墨可以形容。一路痾一路痛,痾到全身軟晒,真係驚隨時會休克。而且猛標冷汗,唔止搞到成身濕晒,仲連滴到地下都濕埋添。痾完之後腳步浮浮,企都企唔穩,當時淨係想即刻瞓低,係長眠不起嗰隻囉!不過成身濕晒當然唔可以瞓上床,沖涼又驚會喺浴室暴斃,咁唯有坐低唞吓先算啦。結果坐咗半粒鐘先回到魂,直頭係死過翻生呀!呢隻藥我真係打死都唔會再食囉!

哈哈,其實又唔使講得咁死嘅,醫生話我一粒息肉都冇,下次再照大腸鏡都應該係十年後嘅事喇!

Halong Bay, Vietnam

Halong Bay, Vietnam

7 則留言:

  1. 邊睇邊驚!嗰两粒難頂藥應該幫助身體大清潔了一次。

    回覆刪除
  2. 哇,好惡頂!

    聽講中大有種吞鏡頭入肚嘅技術,沿途拍攝,繼而排出,唔駛被通櫃咁辛苦。

    回覆刪除
  3. 我都睇過大腸,當時我細個唔識世界,我竟然走去正苦醫院,俾D醫生仔照內窺鏡,在冇麻醉,個人完全清醒下,俾人監粗塞咗條十幾呎長嘅內窺鏡入體內,痛到我在床上十幾分鐘後先爬到起身,嗚嗚....

    回覆刪除
  4. 原來事前準備,慘過比人真正入後庭!嘻嘻!

    回覆刪除
  5. 好奈之前做過灌腸,不過冇您咁得人驚,那樽瀉劑確是難飲。

    回覆刪除
  6. 請問如果在私家醫院做, 一般要幾多錢?

    回覆刪除
  7. Coffee,
    咪講笑,咁樣清潔法,連命都短幾年呀!

    laulong,
    其實通櫃嗰嘢完全唔辛苦,因為用咗「清醒鎮靜」麻醉方法。至於嗰個吞鏡嘅新方法,我諗就唔會成為主流嘞。一來,價錢比傳統方法貴成倍。而且,接近一半人會發現大腸息肉,檢查完都仍然要再用內窺鏡切除,始終唔可以完全避免通櫃囉!

    Ebenezer,
    哈哈,慘絕人寰呀!不過咁,雖然話「清醒鎮靜」比傳統麻最安全,但係始終都有風險。所以話呢,完全唔麻醉都係為你好咋!

    佛爺:
    哈哈,前戲係辛苦嘅勞動,去到戲肉先至過癮囉,你冇理由唔知格!

    Jessica,
    齋飲當然難頂,用冰凍果汁(或汽水)開稀會易入口好多架!

    匿名君:
    歡迎光臨!如果唔需要喺醫院過一晚,價錢一般係由七、八千起。

    回覆刪除