2011年12月1日星期四

就係唔幫襯地產商

冇幾耐之前提起過嗰位好唔like地產商嘅光頭仔,因為佢嘅「向地產商說不」行動就快夠一年,希望是但台可以跟進吓。是但台雖然是是但但,不過今次都算做得唔錯,早兩日出街嘅「星期二檔案」就揾咗光頭仔交代番單嘢。

對於一年來嘅反地產霸權行動,光頭仔話感覺良好,社會迴響超越預期。街上嘅路人甲乙丙會同佢握手打氣,而且每個禮拜都最少一次接受傳媒訪問。我唔敢肯定一夜成名係咪喺佢預期之內,不過睇嚟佢就好受落,個樣都不知幾冧囉。

佢要抵制地產商經營嘅各種項目,包括公共交通工具、商場、超市、連鎖商店、同寬頻服務等等,其實只係個人選擇,根本就唔關人事。不過佢要高調上電視宣傳,我就忍唔住要插吓,指出佢有幾荒謬。

佢話一年來唔搭巴士,淨係踩單車,咁唔止係抵制地產商,仲係為咗環保添。只有一次破戒,因為佢要去台灣體驗吓單車環島遊,但係又踩唔到單車去機場,咁唯有搭機場巴士喎。佢鍾意去台灣踩單車,我絕唔會講乜嘢,不過條友硬係要攞環保嚟過橋,我就睇唔過眼嘞。佢知唔知道,飛機嘅碳排放係地球暖化嘅元兇之一。用唔環保嘅方式嚟體驗環保生活,係咪有啲矛盾呢?!仲有,踩唔到單車去機場,都唔一定要搭巴士啫,搭的士唔得咩?想慳錢就認咗佢啦,揾埋晒啲白痴藉口,真係又要做老舉,又要立貞節牌坊!佢話台北連市區都有單車路,質疑點解香港做唔到,仲批評政府唔重視環保。台北嘅單車路係點我唔知,所以冇得講。不過香港市區嘅道路係咪適宜踩單車,大家都應該心裏有數啦。節目其中一段就係影住佢喺繁忙嘅馬路踩單車,危唔危險我就唔講嘞,就算有乜意外都係佢自己攞嚟嘅。但係因為一條友踩單車,就拖慢晒成條馬路嘅交通,大家又覺唔覺得係損人利己嘅行為呢?如果多幾個佢啲咁嘅人,睇怕廣大嘅地面交通公具使用者朝早返工都要提前半粒鐘出門口囉!

佢屋企冇裝寬頻,想上網就要攞部機落街,去啲有提供免費WIFI嘅地方。咁就覺得可以抵制到地產商,條友嘅思維真係難以理解。唔通啲coffee shop嘅WIFI服務,就唔係由地產商提供嘅?我不殺伯仁,咁係咪對伯仁之死就可以心安理得呢?係唔係都好啦,總之最緊要係唔使自己俾錢囉。最搞笑係佢話有時唔想落街,就攞住部機通屋走,睇吓可唔可以黐到鄰居嘅WIFI用。難為條友仲係笑住咁講添,唔通佢唔知咁做係等同盜竊行為?!

咁又咪以為條友膠到冇朋友喎,原來佢都不知幾多粉屎。班友仲組成咗一個名為「良心消費聯盟」嘅組織添,宗旨係抗拒地產霸權,大力提倡幫襯鋪頭仔。第樣唔講住,淨係個名已經令人好反感嘞。我幫襯+X哥旗下嘅連鎖商店,係因為人地夠方便、貨品質素有保證、價錢又合理,有乜唔啱先,咁就話我無良,你班友有冇病呀!呢種唯我獨尊嘅態度,直頭同嗰班瞓街廢青一模一樣,叫做「狼心消費聯盟」就差唔多!

講到條友班粉屎,就有一個叫做笨神嘅室內設計公司老闆。唔知佢係嫌衣食無憂嘅生活太悶,定係坐得太多搞到忽忽痕,竟然無聊到響應光頭仔嘅號召。佢話去啲鋪頭仔買嘢,唔記得帶錢都可以賒住先喎。真係唔明啲人乜嘢心態,一手交錢一手交貨,簡直係天經地義啦。唔檢討吓點解自己成日唔記得帶錢,反而批評人地冇人情味,完全服晒佢囉。而且佢都冇理由唔知啫,喺啲大型商店,帶唔夠錢一樣買到嘢,因為可以碌卡或者嘟八達通,使鬼賒咩!條友除咗重視人情味,仲好有愛心添。佢同班兄弟喺鋪頭仔買咗啲食物,派俾無家可歸嘅露宿者。本來關懷弱勢社群係好事,絕對值得支持。不過佢地派嘅竟然係罐頭豆豉鯪魚,真係隨時愛你變成害你囉。呢隻罐頭雖然勁好食,不過就非常唔健康,淨係見到啲油都嚇死啦!講開又講,豆豉鯪魚油麥菜唔知係邊個發明嘅呢,真係絕配呀!

光頭仔仲有一個叫做阿零嘅粉屎,又係勁搞笑。呢位姐姐話世界上嘅人只得兩類,就係自私同好自私。加入良心消費行列,係因為佢認為啲大地產商唔應該賺到盡喎。其實佢都唔算細架啦,都唔知點解會有啲咁嘅思維。喺一個制度健全嘅自由經濟社會,賺到盡又有乜唔啱呢?唔通啲大財團有錢,想分散投資,搞多幾瓣都有罪?人地吸引到顧客,係因為掌握到現代人嘅消費模式,提供方便舒適嘅購物環境,而且管理制度化,貨品質量有保證。仲有,人地賺到錢,都要以繳稅方式回饋社會架。如果認為人地賺得多回饋少,咁要檢討嘅應該係稅率,而唔係鬧人點解要賺到盡囉。班友寧願買貴啲都要幫襯鋪頭仔,呢啲係佢地嘅自由,冇人可以干涉。不過硬係要將啲大型連鎖店妖魔化,咁就唔啱啦。你估啲鋪頭仔唔想賺到盡咩,其實係「非不為也,實不能也」!相對於鋪頭仔,其實班友更加要撐嘅係善堂囉。至於位姐姐對人嘅睇法,我亦有啲補充,除咗自私同好自私,另外仲有兩種,就係好天真同好傻,睇吓班良心消費者就知啦!

話時話,如果喺街撞到光頭仔,我都會主動同佢打招呼架,仲會同佢講:「傻仔,你今日食咗藥未呀?!」

10 則留言:

  1. 地產霸權係可恨,但社會發展咗咁耐,息息相關嘅嘢返轉頭談何容易!唔通個個都踩單車返工咩!

    回覆刪除
  2. 光頭人好明顯係一個頭腦簡單嘅人嚟。

    回覆刪除
  3. Coffee,
    等我用人嚟做個比喻,如果要接受一個人,就要連佢嘅缺點都接受埋。要對方完全改晒所有缺點根本就冇可能,極其量只可以改到少少,如過咁都容忍唔到,不如乾脆揀過另一個。仲有,人比人,比死人,因為每個人都唔同。

    Ebenezer,
    哈哈,佢當然係頭腦簡單啦!不過又奇怪嘞,佢冇頭髮,咁腦部應該可以得到多啲養份喎,點解會搞成咁呢?!

    回覆刪除
  4. 地產霸權?有幾多人真係睇過呢本書?又有幾多人真係知道自己鬧緊乜嘢?
    http://potataochick.wordpress.com/2011/04/07/%E5%B7%A6%E6%B4%BE%E7%B5%A6%E6%88%91%E4%B8%8A%E7%9A%84%E7%AC%AC%E4%B8%80%E8%AA%B2%EF%BC%9A%E5%9C%B0%E7%94%A2%E9%9C%B8%E6%AC%8A/
    以個光頭仔嘅智力,我諗佢除咗個書名之外,可能冇睇過本書嘅內容,就算睇過都應該唔係好明。如果唔係都唔會將呢本咁嘢當做天書啦!
    Derek

    回覆刪除
  5. 由得佢地自我感覺良好罷!無知無才者只愛整古造怪,去引人注目,去建立虛假的自我!

    光頭仔應該游水去台灣,中途餵埋鯊魚就最道德喇!

    回覆刪除
  6. Derek,
    我諗有啲人係出於仇富心態,而有啲就滿腦子反建制思想,又有部分係人云亦云囉。光頭仔同佢班粉屎就更不知所謂,高調得嚟又要邏輯思維欠奉,處處自相矛盾!

    laulong,
    哈哈,佢地自我感覺良好,我就要剷吓班友先感覺良好囉!至於光頭仔,為保育鯊魚獻身,直頭夾晒佢嘅環保理念添啦!

    回覆刪除
  7. 我剛去完台北回來。台北通街都係摩托車,好少見到單車,而且她的主要馬路,比香港寬闊很多!

    回覆刪除
  8. 佛爺:
    原來啱啱去完旅行,一定玩得好開心嘞!條光頭仔都short short地架,因為自己踩單車抵制地產商,就要政府喺市區起單車路!

    回覆刪除
  9. “啲鋪頭仔唔想賺到盡咩,其實係「非不為也,實不能也」!”係真,但“喺一個制度健全嘅自由經濟社會”,大家都應該心裏有數啦。

    回覆刪除
  10. 匿名君:
    歡迎光臨!唔好意思,我真係睇唔明你想講乜囉!

    回覆刪除