2011年8月29日星期一

半文盲

之前喺格魯吉亞撞車中頭獎,好彩有買旅保險,可以幫補番啲醫藥費。早幾日填claim form先知道鬼死咁麻煩,原來要作文,寫番事發經過。寫字呢家真係攞命,寫得肉酸唔在講,仲要有好多字唔識寫。結果要喺電腦打咗先,睇番啲筆劃至寫得出,簡直戇居到暈!不過更戇居嘅都仲有,試過喺超市買完,填送貨單時寫寫吓地址先發覺有兩隻字唔識,早知寫英文冇咁嬲啦!

其實我睇中文冇乜問題,絕大部分常用嘅字都識,只係寫唔出啫,所以最多算係半文盲。講到執筆忘字,原因好簡單,就係平時寫得少。以前讀英中,除咗中文同中史之外,其他科嘅功課都係用英文做。上到大學,亦只係大一嗰年修過一科中文。出嚟做之後就更加少寫,基本上所有公文都係用英文,連講都開始中英夾雜添。

到呢兩年間中寫吓blog,先叫做寫番多啲中文。不過都只係喺電腦打,並唔係書寫,亦對書寫一啲幫助都冇。我唔識打倉頡,打字只係用漢語拼音。當然啦,如果有好多字唔識寫,根本就用唔到倉頡,手寫板亦一樣。拼音輸入仲有個好處,就係有關連詞呢個功能,可以大大減少出現別字嘅機會。不過咁,凡事有利必有弊,就係因為輸入法會自動搞掂,根本冇需要記住正確嘅用字,到手寫時就更易出錯。

中文字嘅筆劃鬼死咁複雜,同音字又多,想唔寫錯別字其實已經好難。而且香港一向重英輕中,根本就俾唔到動力啲人去學好中文。有理由相信,好似我咁嘅半文盲,香港應該仲有好多!

咪以為淨係中文先係咁,其實英文都有啲好大鑊嘅畸屎。有個教書嘅朋友同我講過,佢學校有啲讀到中二嘅細路竟然連26個英文字母都未識齊,都咪話唔得人驚!

哈哈,有樣仲得人驚,我會考中國語文科攞B架!幾十年前嘅會考,攞B真係唔算容易,其實我一直都懷疑啲閱卷員係咪發咗雞盲!


9 則留言:

  1. 我以為你講緊我,哈哈!我自認半文盲一名,用速成嘅後遺症,係剩記得頭尾筆劃,係電腦打了隻字出來再寫上,已成為我忘字下的指定動作。

    回覆刪除
  2. Coffee,
    哈哈,你肯定比我好啲,用得速成即係話起碼知道大概字型,最多都只係小半文盲啫!我好多時都係只知其音不知其字,拼音加關連詞係唯一選擇!

    回覆刪除
  3. 我就依賴性的用手寫板,懶咯,唔想學打字。而且寫字隻左手可以間著,攞餅食又得,揸杯飲茶又得,都幾好架!

    回覆刪除
  4. 哈哈,你同我一樣,果日寫食。在。桃花源,其實我唔止唔記得咗個「脆」字,重有其他幾個字,連字形都要諗咗好耐好耐至記得起!但個「脆」字就直情連個形都忘記得一乾二淨,好彩你提醒!
    但我似乎好你 d d,我用速成!

    回覆刪除
  5. laulong,
    我都有手寫板,不過用喺嚟好麻煩,因為成日都認唔到我寫啲字!

    SKII,
    哈哈,我都話香港好多半文盲架啦!不過你識用速成,梗係叻過我啦!

    回覆刪除
  6. 其實倉頡唔難,好有規律,打熟了,不用思考,我手打我想。

    回覆刪除
  7. 佛爺:
    倉頡好易我都知,仲可以打得好快添,如果識字嘅話!

    回覆刪除
  8. 打倉頡會令你學識好多字架!

    回覆刪除
  9. 佛爺:
    當然啦,呢個係良性互動,打倉頡會學識好多字,識多咗字打倉頡又會再快啲!不過對於一個半文盲嚟講,倉頡根本就無從入手!

    回覆刪除