2011年7月23日星期六

梨兒腹內酸

蓮子心中苦,梨兒腹內酸。

以上呢副名對相傳係清代才子金聖嘆所作,而背後仲有段故添。話說金聖嘆因哭廟案獲罪,被判處極刑。行刑當日,個仔去刑場送佢最後一程。金才子非但冇呼天搶地,反而雅興大發,即場出咗上聯「蓮子心中苦」俾個仔對。老豆就快要斬首,做仔嘅一早已經六神無主,又有乜可能會對得出呢,結果下聯都係金才子自己包辦埋。

真係不得不佩服佢嘅才情,喺咁嘅情況都仲可以作到副咁絕嘅對。對得工整唔在講,其中更暗藏弦外之音。竅妙處在於「蓮」同「梨」呢兩個字,如果換成另外兩個同音字「憐」同「離」,就正好講出咗自己當時嘅心情。不過臨行刑仲有雅興吟詩作對,其實都幾古怪吓,甚至有食古不化。但係佢嗰種視死如歸嘅氣節,又真係唔到你唔服!

講到「梨兒腹內酸」,印象中好似只限於雪梨同鴨梨。呢類梨唔止接近心嘅部分酸,其實連肉都帶有少少酸味,而且肉質唔夠爽脆,一向唔係太鍾意。至於豐水梨同沙梨,因為要批皮,實在太麻煩喇,所以從來都唔係我杯茶。水晶梨就太貴,根本食唔起,會唔會心酸就真係無從得知嘞。

至於完全唔心酸嘅,啤梨係其中一種。呢種梨好奇怪,熟透同未熟透竟然會有兩種截然不同嘅食味。熟透嘅時候香甜軟糯,未熟透就清新爽脆,可謂各擅勝場。另外有隻長啤梨仲特別,幾乎冇心咁滯,差唔多成個可以食晒。最近又食過隻紅啤梨,爽脆之餘,仲有類似蜜糖嘅香甜味,真係好正!

咪以為啤梨淨係外國先至有,其實甘肅嘅天水梨無論口感同味道都同熟透嘅啤梨一樣,只係個頭細得多。82年去新疆,途經天水順便玩埋麥積山,無意之中俾我發現呢種咁有外國風味嘅梨。後來去到新疆,更試到梨中嘅極品,庫爾勒香梨。呢種梨清甜多汁,果肉爽脆而無渣,比雪梨好食得多,可惜當時香港仲未有得賣。印象中好似要過多兩年香港先有得賣,自此以後,如果食梨多數都會揀香梨,不過有時都會食貢梨。以味道嚟講,其實貢梨同香梨好接近,但係就有少少渣,略遜香梨一籌。貢梨都有樣好處,就係夠晒大,食得好有滿足感,唔似香梨細細個,咬幾啖就玩完。

不過唔知點解,呢兩年香梨同貢梨好似冇以前咁好食,無論味道或者口感都差咗。尤其是香梨,皮好光滑,睇起嚟靚仔咗,不過食落就似雪梨多過香梨,都唔知係咪混咗種。仲有一樣好奇怪,香梨有季節性,原本秋天先有,不過而家就一年四季都有得賣。又好似荔枝咁,其實冬天都有得賣,不過食落口就完全唔係嗰種味道。我就寧願忍吓口,等桂味同糯米糍上市至食到夠皮。不過一年先得一兩個月當造,簡直係望穿秋水!但係點都好過唔啱季節,賣得貴又唔好食嘅貨色!所以古人話「不時不食」,其實真係好有道理架!



5 則留言:

  1. 哇,乜咁啱,我又係 82 年去新疆!

    今日同余蛋飲茶,諗過想揾你打牌 ^^

    回覆刪除
  2. >>蓮子心中苦,梨兒腹內酸。
    又學到嘢!

    講起生果,首選最不喜歡的一定是雪梨,很喜歡的是熟啤梨。假如你唔係講笑,真係無食過水晶梨的話,咁你一定要試下喇,別說甚麼食不起吧:) 搵嚟講!

    回覆刪除
  3. laulong,
    哈哈,打牌就唔好喇,戒咗成十年,再打番肯定會做超級大魚腩!聽講話你要做獨行俠,一條友玩東北喎,好掂呀!

    Coffee,
    水晶梨又唔係話冇食過,不過就真係好少。印象中應該係好食嘅,但係就欠缺個性,而且實在太貴,唔抵食!

    回覆刪除
  4. 地球上邊度你未去過架?南北極?

    回覆刪除
  5. 佛爺:
    哈哈,其實仲有好多地方未去過架!至於南北極,只係入過北極圈範圍,兩個極點應該就唔會有機會去嘞!

    回覆刪除