2011年7月18日星期一

五毛

早排鼠王芬喺網上發表咗一張粉絲去垃圾會撐佢場嘅相,反而搞到自己周身蟻。話說有眼利網民發現粉絲團中一名南亞裔男子做過臨記,曾經參與電影「機動部隊」嘅演出。跟住一眾熱愛民主嘅網民就即刻圍剿鼠王芬,話佢出錢請臨記幫自己撐場。後來嗰位南亞粉絲主動傳媒澄清,話自己叫做Ricky,正職係髮型師,佢係以「特約演員」嘅身份參與電影演出,唔係「臨記」。佢話冇收過錢,去撐場係因為鼠王芬關心少數族裔。

講起呢位Ricky,其實我同佢都有一剪之緣,對上一次個頭就係佢幫我剪嘅。當然啦,只係剪過一次髮咁多,我根本冇可能知道佢嘅為人,自然判斷唔到嗰次撐場係咪收錢做show。不過對於民主鬥士一口咬定佢係收咗鼠王芬錢,我就真係不敢苟同嘞。唔通作為臨時演員就冇晒真我,做親乜都係收咗錢?點解班民主聖鬥士可以做埋晒瞓街同掟飛機咁嘅騎呢嚟表達嚴肅訴求,而一個做過臨記嘅人就連撐場表吓態都要俾人批鬥呢,咁仲唔係職業歧視?平機會應該諗諗佢啦,呢個世界唔係只得種族歧視同性別歧視架!

當然啦,「職業歧視」只係班民主聖鬥士嘅手段,其實「五毛黨情意結」至係幕後元兇。如果唔知五毛黨係乜,可以去呢度睇吓。去過香港各大討論區嘅朋友都知道,班民主聖鬥士淨係識互相吹噓(或蕭),遇到唔啱睇嘅意見,班友都費事辯駁,直接將來者打成五毛黨就搞掂。即係話,呢個世界只有一種聲音,就係佢地對民主嘅演繹!其他不同意見根本就唔存在,因位發言者都係俾阿爺用五毫子收買嘅!

對於呢種亂扣帽子嘅做法,我覺得比純粹嘅言語暴力更卑劣,係對異見者嘅強姦行為!我相信人各有志,就算幾白痴嘅都一樣有人奉為真理。我會話呢人係腦殘、腦積屎,但係就唔會話班友係五美仙黨,因為我冇確實證據支持呢個講法。當然啦,我都明白有人受先天所限,腦部發育唔健全,只有做埋自欺欺人嘅先可以得到一絲快感。其實我自己都應該檢討吓,居然恥笑人地嘅腦部缺陷,罪過罪過!

又講番鼠王芬,佢搞到俾人圍剿,唔多唔少都係因為之前就遞補機制發表嘅「懲罰論」。所謂崩口人忌崩口碗,蠢人自然最憎人話佢地蠢,鼠王芬居然話選民揀玩政棍係自作孽,班友唔反佢檯先奇啦。雖然我對鼠王芬冇乜特別好感,不過就真係幾buy佢嘅「懲罰論」喎。大家不妨想像吓,究竟最終邊個會受害呢,如果班尊貴議員嘅政績係以下呢:妨礙經濟發展、激化社會矛盾、擾亂議會秩序、破壞公眾安寧、濫用司法程序、浪費公共資源。好明顯,受害嘅會係全香港,當然亦包括揀咗呢議員嘅選民!

不過咁,雖然話所有港人都會受害,不過喺程度上係有分別嘅。例如對於班N失廢青,影響就比較輕微。班友本身就鍾意搞事,當然覺得社會越亂越好。佢地又唔使交稅,自然唔會介意政棍浪費公帑。唯一嘅壞影響係,如果社會唔穩定、經濟停滯不前,一定會妨礙年輕人嘅事業發展。不過唔緊要啦,橫掂班友都諗住成世攞綜援!

N失廢青選擇毫無建樹嘅政棍,當然係損人不利己,不過都算係情理之中,中產都係咁揀就真係意料之外嘞。有個教書佬同我講,佢有好多同事(教師)上次選垃圾會就係投咗票俾瀉民連班友。呢班中產真係好搞笑,其實佢地唔係認同班政棍嘅政治理念,而係想發洩對政府嘅不滿(主要係教育政策)。佢地明知班政棍有破壞冇建設,揀呢班友其實係想政府高官冇好日子過。連教師嘅思維都係咁,我都唔知講乜好嘞。唔知佢地有冇諗過,如果呢班敗家政棍得勢,肯定會極速淘空政府庫房,到時中產必然係最先被開刀嘅一群。表面上,呢班中產用咗佢地神聖嘅選票嚟懲罰政府高官。不過諗深一層,咁對班高官又有乜影響呢,佢地一樣糧照出,慘得過人地面皮夠厚啫!講到底,人用選票懲罰嘅並非別人,而係佢地自己!

弊嘞,講咗咁多反民主嘅,唔知會唔會俾人打成五毛黨呢?當然啦,我自己就打死都唔認架!而家法定最低時薪都28蚊啦,我使嘥咁多時間賺啊爺嗰五毫子?如果係為咗錢,去7仔兼職好過啦!

5 則留言:

  1. 阿RICKY剪嘅髮係咪好掂呀?你要特登搵佢。係咪同名呢?記得幾時睇雜誌時有提過髮型師RICKY哩個名喎。

    回覆刪除
  2. Coffee,
    呢位Ricky,我當然唔係特登佢剪架啦,而且當時佢都仲未成為紅人。話說上個月去剪髮,幫我剪開嗰個師傅學人玩忽然放假,而我個頭又圓到成個波咁,已經唔剪唔得,咪求其件頂上攞。點知髮型屋整咗件同我有牙齒印嘅嚟,咁我梗係叮佢走啦,跟住就輪到呢位Ricky嘞,其實佢係執三攤架。我幫襯開嗰間係街坊髮型屋,如果唔係有粉絲事件,呢位Ricky係唔會有可能見報架!

    回覆刪除
  3. 其實不少中產係無腦,他們支持這些垃圾政黨,將來抽重稅法做福利,刮佢地荷包之麻!

    回覆刪除
  4. Arma:

    我都有啲教師朋友係咁,投票俾長毛話等佢鬧吓政府,過吓癮,點知長毛癲成咁!

    可見一人一票的選舉太多冇厘頭嘅投票誘因,嗰啲糞青又一票,病態狂魔又一票,目不識丁嘅師奶又一票,走出黎嘅決策群体只反射了病態訴求,管活只會每下愈况!

    回覆刪除
  5. 佛爺:
    當人人都喺度為私利盤算嘅時候,呢班中產竟然糾纏喺意識形態上嘅意氣之爭,就算俾人笨都唔抵可憐架!

    laulong,
    一人一票嘅普選係大勢所趨,冇得避架喇,唯一可以做嘅就係揀可以代表自身群體權益嘅人出嚟。當然啦,喺一個民智未開嘅社會,普選極可能會係一場鬧劇,甚至係悲劇!

    回覆刪除