2011年7月16日星期六

果然有翻版!

上一篇博文提到「雞蛋仔阿伯」,本來已經諗住要寫續集,因為我肯定類似事件會陸續有嚟,「格仔餅阿婆」嘅出現只係時間問題啫。估唔到「一講曹操,曹操就到」,今日打開日月報,真係有單咁嘅新聞:「炸大腸小販被捕 50街坊圍觀」。雖然唔係「格仔餅阿婆」,不過「炸大腸阿嬸」我都收貨架喇。敢於抱打不平、矢志鋤強扶弱嘅熱血香港人,又係你地出動嘅時候喇!

近年香港乜都講求創新,總之創意凌駕一切,不過效果如何,就真係見仁見智嘞。都唔使講到太高深,就睇吓而家樓盤名,大家自有判斷。相反嚟講,毫無創意嘅抄襲好多時都會更實用同有效。睇番「炸大腸阿嬸」,佢嘅策略分明抄足「雞蛋仔阿伯」,係不折不扣嘅翻版,不過就一樣有人撐。唔理之前有幾多人俾「雞蛋仔阿伯」欺騙過感情都好,只要見到有弱者被欺凌,熱血嘅香港人仍然會飛撲埋嚟施以援手。一句講晒,「橋唔怕舊,最緊要受」至係千古真理!

同「雞蛋仔阿伯」阿伯一樣,「炸大腸阿嬸」將自己嘅形象塑造成自力更新但係就屢遭打壓嘅弱者。實情係咪咁就不得而知,不過如果佢有攞綜援,遲早實會俾人踢爆。事件搞得越大,爆煲嘅風險就越高。例子其實有好多,近嘅有「雞蛋仔阿伯」,遠嘅就有「綜援海嘯鴛鴦」。總之「人怕出名豬怕肥」,切記切記!

至於「炸大腸阿嬸」係咪弱者就要分開兩個層面睇嘞。首先,食環署拉人,係咪等同欺凌呢?其實問題重點唔係在於拉人呢個行動,而係政府嘅小販政策同相關法例。小販管理隊拉人只係依例執法,絕對唔可以話佢地有做錯。至於政府係咪應該大發小販牌,俾人可以自力更新,先至係市民要諗清楚嘅。如果唔想見到成條街俾無牌小販霸晒,但係又反對食環署拉人,咁就真係好矛盾吓嘞。

另外,好多人都覺得小販收入微薄,要行到呢一步都只係迫於無奈。我對於呢種觀點好有保留,尤其是熟食小販,真係發咗達都冇人知!小販成日話朝唔得晚,我就唔係太相信嘞,除非俾份財務報表我睇過啦。每年維園花市,最貴租嘅天價攤位都係魚蛋檔嚟架!又好似喺最旺嘅商業區,好多行業都捱唔住貴租要搬走,但係魚蛋檔仲可以生存到,究竟係點解呢?好簡單,因為賣熟食(或小食)真係好好賺!就以炸大腸為例,接近十蚊一串,得嗰幾塊仔,毛利有幾高可想而知啦。而且擺街邊慳番鋪租,又唔使納稅,仲唔係發過豬頭?其實俾人拉吓,罰少少錢,咪當經營成本囉。如果真係唔到食嘅,仲有人會做咩!

我唔係憑空老作架,又等我講吓童年往事先。細個時好窮,住喺木屋區,絕對比而家公屋綜援戶悽慘得多。嗰時有個鄰居係賣豬腸粉嘅,佢個仔仲係我小學同學添。豬腸粉佬連車仔都冇,每日開工就只靠一條擔挑同兩個鐵箱。當我讀到大三嘅時候,木屋區終於要清拆嘞,居民都可以搬上公屋。不過豬腸粉佬冇上樓,因為佢一早就買咗私樓,係鄰居當中最早晉身業主階層嘅人。咪睇小人地每次只係做嗰一個幾毫生意,其實財富就係咁樣聚積番嚟架!所以呢,我係從來唔會睇低小販嘅!

至於「炸大腸阿嬸」係咪發咗達都冇人知嗰隻,我就真係唔敢講嘞。不過有一點可以肯定,炸大腸真係好正,香噴噴,熱辣辣,內軟外脆,色香口感一流!再落少少甜醬同芥辣,濃濃嘅醬料味同淡淡嘅豬屎味配合到天衣無縫,堪稱人間極品呀!




7 則留言:

  1. 啲相好靚呀!是你自己的作品麼?

    回覆刪除
  2. 睇完你哩篇,我覺得自己都有你少少功力嘅觀察力,啲好味嘅熟食檔的確好好生意。
    其實香港這旅遊熱門城市,都最好搞個大規模嘅夜市,一於集中賣下炸大腸、牛柏葉、魚蛋、冷麵、小丸子、雞蛋仔、格子餅、醬燒魚......嘩!數唔晒!

    2011年7月16日上午7:07

    回覆刪除
  3. 做小販可能並非全部好揾,但悶聲發大財其實真係唔少,如果唔係點會咁多人走去做販商。

    最緊要係,有牌冇牌嘅街頭小販唔駛交天價租,錢就可以咁樣賺返來咯!

    回覆刪除
  4. 若果通街都係小販,都會幾混亂!

    回覆刪除
  5. SKII,
    多謝呀,相中係有「翻版九寨溝」之稱嘅十六湖國家公園!其實個blog絕大部份嘅相都係我自己影架!

    coffee,
    其實街頭美食仲有好多:八爪魚鬚、煎釀三寶、牛雜、豬皮蘿蔔、臭豆腐、碗仔翅、炸番薯等等,真係諗起都流晒口水!不過呢幾年好少食喇,高脂、高鈉、高膽固醇、仲加埋超毒嘅萬年油,都咪話唔得人驚!

    laulong,
    當然唔會所有小販都咁好,例如天水圍天光墟擺地攤嗰。不過熟食小販嘅收入應該普遍唔錯,肯定唔會唔到餐晏仔!好似灣仔碼頭嘅臧姑娘,都係由推車仔賣水餃開始架!另外,雷曼迷債苦主之中,就有個街市菜婆報稱損失咗六百萬,呢就係禾桿冚珍珠嘞!

    佛爺:
    哈哈,係呀!如果遇著走鬼就仲勁,簡直係兵荒馬亂,隨時俾人撞死呀!

    回覆刪除
  6. 而家d街邊熟食我唔會幫襯喇, 因為我覺得太貴. 而且真係好污糟. 同十年前果d唔同晒.而家果d冇咁好食.
    以前都做過小販, 其實好多時都知道佢地會幾時唻拉, 有時會留少少貨俾佢地拉走.我地都係當交租.佢地又當係交差. 每日開兩三個鐘, 每月就有幾千蚊收入, 算好唔錯喇~

    回覆刪除
  7. Jessie,
    其實我都好多年冇掃街喇。以前鍾意掃街,主要係貪得意,過吓口癮啫。而家年紀大咗,心態都唔同咗喇。講真喎,做得小販就一定要將貨物充公同罰款計埋落成本,計得掂條數先有得做!至於食環署拉人,我諗取易不取難就實會架喇,冇法啦,懶惰係人嘅天性!

    回覆刪除