2011年7月21日星期四

天誅地滅

10年前,港人內地領養女孩談雅然與父母東奔西走爭取居港權,打動無數港人。明天,是終審法院裁定她敗訴的10周年。今天,她站在法院門外,沒有忘記,也沒有怨恨,「現在也是個happy ending(好結局)」——當年港府行使酌情權,她得以獲發單程證留港。同是過來人,眼見20多萬菲傭爭取居港權,24歲的談雅然深信,出生背景不應決定人的命運,法律的改變,可消除社會的不公義。

「我好慶幸當年有機會留在香港,爸媽改變了我的命運,如果當初不是他們領養了我,今天可能我在東莞做工廠妹了。」自身的遭遇,加上4年法律課程,談雅然表示思想改變了,亦令她對他人的不幸感同身受。

居港滿7年的菲傭,爭取居港權的司法覆核即將開審,回想10年前力竭聲嘶、與一眾港人內地領養子女爭居港權,談雅然坦言,相同的是爭權,目的卻截然不同,「當年我為的是家庭重聚,但今次是因為菲傭留港多年工作,明白本港文化,希望得到居留權,兩者不能混為一談」。

談雅然沒有正面表態支持菲傭爭取居港權與否,只稱問題的根本在於社會的不公義,「如果菲政府經濟、教育做得好,何須拋夫棄子隻身來港打工?她們也是社會不公義的受害者……最低工資她們不受保障,被人稱呼為菲傭、賓妹,其實她們也很可憐。」她認為,白紙黑字的法律,是道德底線的指標,要不停改變,才可保障人權。

以上係節錄明報星期二嘅報導,講出一個曾經爭取居港權嘅少女嘅心聲。對於談雅然嘅經歷,只可以話係佢嘅造化,希望佢可以好好珍惜呢個得來不易嘅機會。不過講到佢嘅思維,我只有套用江主席嘅名句:「too simple, sometimes naïve」!

環顧古今中外,公義何曾存在過呢?一個公義嘅世界,只係不切實際嘅理想。大國口中嘅公義,更係欺世盜名嘅謊言!就講吓最鍾意主持公道嘅美國佬,睇吓佢地係點樣彰顯國際公義。美國佬話伊拉克擁有大殺傷力武器,二話不說就走去打人。結果大殺傷力武器唔到,但係伊拉克平民就喺戰爭中死傷無數。打完仗嘞,伊拉克唔止冇民主,人民仲要生活喺恐襲陰影之中,死人肯定多過局勢相對穩定嘅薩達姆時代。好,又當美國佬估計錯誤,不過海地難民又點睇呢?佢地夠悽慘啦,點解作為一個富裕嘅鄰居,美國又會千方百計要將佢地拒諸門外呢?

講完美國佬,當然唔可以唔提英國佬啦。困擾香港多年嘅越南船民問題,究竟係邊個搞出嚟嘅呢?英國佬淨係識攞威,講到承擔就咪預佢,乜都要香港自己孭晒。聯合國仲要拖香港數,你話公義何在呢?再講,六四事件之後,香港人對大陸冇晒信心,想投靠事頭婆。作為當時香港嘅宗主國,英國只係拋出口惠而實不至嘅居英權計劃,太平門淨係為根本就有條件移民嘅人而設,對於絕大部分忠心耿耿嘅港人,得到嘅就係一碗閉門羹!事隔多年再睇番,真係要佩服英國佬嘅計算。人地就算乜都冇做到,咪一樣大把人銘記住事頭婆嘅恩典!睇吓今年71遊行,有人高舉港英時代嘅旗幟就知啦。

至於菲律賓有冇公義,我諗都唔使多講嘞,睇吓康泰人質事件就知啦。要解決菲律賓嘅社會問題,只有佢地嘅人民自己先做得到。如果想撥亂反正,班菲傭需要嘅唔係居港權,而係即刻辭工返祖國,搞革命推翻佢地個不公義嘅政府!

而俾菲傭工有居留權,對香港嚟講係沉重嘅負擔。首先,勞動力市場會受到沖激,影響本地人嘅就業機會。而且佢地會佔用社會福利資源,納稅人負擔重咗唔在講,仲會分薄本地低下階層得到嘅援助。佢地亦唔會對本地經濟有好大貢獻,除咗生活基本開支,佢地會將所有盈餘匯晒返菲律賓,唔會喺香港消費。到時仲可能會出現一攞綜援嘅時薪家務助理,將香港提供嘅福利輸送返菲律賓添。攞咗居留權嘅菲傭仲極有可能會以家庭團聚為理由,申請埋老公仔女過嚟。如果政府批,肯定會對香港嘅公共開支造成沉重壓力。如果唔批,又難保唔會再發生火燒入境處事件,真係批唔批都死!至於菲律賓嘅不公義情況,亦唔會因為菲傭有居留權而得到改善。當地輸出傭工嘅中介人肯定會提高收費,令菲傭受到更大嘅剝削。而有居留權嘅菲傭係多咗,不過都係匯晒返祖家,益晒好食懶飛嘅賓佬。

其實世界上冇公義嘅地方仲有好多,喺非洲就俯拾皆是。連滿口人權公義嘅富裕大國都袖手旁觀,只係彈丸之地嘅香港又係咪要挺身而出呢?

細個冇乜娛樂,睇埋好多粵語殘片,學識咗兩句說話。第一句係「人人為我,我為人人」,唔記得係張瑛定吳楚帆講嘅,當時真係覺得好感動。不過大個咗就知道,咁根本係行唔通嘅,因為世界上一定會有自私嘅人!而第二句就係「人不為己,天誅地滅」,聽起嚟好負面。不過呢個至係主宰世界運作嘅真理,因為只有透過不同利益群體嘅角力,世界先可以達至平衡!而家嘅細路冇粵語殘片睇,真係學少好多做人嘅道理!



8 則留言:

  1. 好喜歡你哩篇,(你無鬧人喇:P),句句在理,讚!

    回覆刪除
  2. 一切都是選票的禍!

    要未住滿七年新移民可以上樓可以領綜援,要留港七年家庭傭工可成為永久居民等等等等

    都是為了吸票源而已,政客,就是要損香港之利以滿足個人之利,是很卑鄙的!

    回覆刪除
  3. Coffee,
    哈哈,多謝先!其實我都有鬧人架,鬧嘅係美國佬、英國佬、同賓佬,只係冇出動三字經同四字真言呢大殺傷力武器啫!

    laulong,
    政棍當然卑鄙,不過要負最終責任嘅都係投票選佢地嘅選民。班政棍明明係謀取私利,選民竟然可以睇成爭取公義,俾人咗笨都唔知!

    回覆刪除
  4. 喺挪威影嘅相?嗰雕像公園我都去過。

    講開英國,我被佢地負責批工作簽證嘅唔知乜垃圾官攪到我氹氹轉!真喺飯桶乜都攪錯。

    其實我有加拿大護照就應該唔使工作簽證啦,同一個事頭婆喎。反而啲英文都唔識隻嘅某啲東歐人就唔使!

    今個夏天睇怕都唔使旨意去其他地方玩嘞。

    回覆刪除
  5. 香港地少人多,沒有天然資源,無乜高科技研究,第一產業幾乎淨番打魚,第二產業式微,主要靠金融服務業,玩西方世界的所謂「公義」,成班友知唔知自己的本錢有幾多呀?

    回覆刪除
  6. Eric,
    好耐冇見呀!頭兩張相都係挪威,第三張就係冰島。唔去其他地方玩都冇乜所謂啦,其實英國本土都唔錯,例如去Brighton裸曬吓都幾過癮架!

    佛爺:
    咪係囉,班友都唔知道自己有幾多斤兩,又睇唔清楚其他人嘅假仁假義,一心要將香港變成慈善港,真係累街坊!

    回覆刪除
  7. 我細個果時都相信過世上應該有公義㗎!

    回覆刪除
  8. SKII,
    我都係呀,細個時好多理想(或幻想),不過出咗嚟做就漸漸明白,腳踏實地先至可以令生活得到改善!

    回覆刪除