2011年7月15日星期五

雞翼罵戰背後

前日喺某討論區睇到一個關於綜援阿婆偷雞翼嘅post,作者引述咗有關新聞報導,網民熱烈討論之餘,仲掀起連場罵戰。

話說有個八十幾歲嘅綜援阿婆去超市買,喺門口揀完山竹之後就走埋凍櫃度,將幾隻急凍雞翼塞咗入自備嘅購物袋。原來呢一連串動作已經俾超市經理到晒,但係阿婆就懵然不知。阿婆只係攞住山竹去俾錢,當佢行出超市之後就俾個醒目經理截停,結果人贓並獲,經理報警拉人。據方向報報導,阿婆事後同警察講,話自己「冇錢,冇肉食,好肚餓!」

通常呢類慘絕人寰嘅「臨老唔過得世」事件都會引起廣泛關注,梗會有人出嚟痛批香港嘅福利制度,跟住仲會扯埋地產霸權同官商勾結嚟講。呢單當然唔會例外,有關嘅post一出,就即刻有人狂插政府,仲話係香港嘅恥辱。佢地主要嘅論點係:而家太貴,綜援唔夠使、阿婆以前對香港有貢獻,冇理由老來得唔到適當嘅照顧。持呢類觀點嘅人,大概可以叫做福利派。

福利當然人人想要,不過並唔係個個都會支持政府無限量派糖,所以亦有班反福利派走出嚟唱對台。佢地嘅論點係:阿婆貪心,攞完綜援仲要走去偷、份綜援唔會唔夠食,冇理由有錢買山竹但係冇錢買雞翼。最後發展成意氣之爭,討論變成罵戰,你一句「冇人性」,我一句「蝗蟲」,互相鬧到不亦樂乎。

對於呢單「偷雞翼事件」,我個人就持中立態度,因為單睇新聞內容,根本就冇足夠資料判斷阿婆係窮到要捱餓定係貪心。事實上,阿婆攞緊綜援,已經極有可能唔使交租,而且仲有電費補貼,其他支出又有可以實報實銷,會唔會真係窮到連十蚊雞翼都買唔起呢?就算真係買唔起,香港仲有食物銀行,點都唔會搞到「食無肉」啩?另一個疑點係山竹,呢種「果后」雖然好食,不過就「實用率」超低,十分唔抵食。咁點解阿婆唔可以用買山竹嘅錢嚟買雞翼呢?當然我地又唔可以斷定阿婆係貪心,因為唔知佢會唔會有乜難言之隱。

所以呢單喺現階段唔會有結論,要到開庭先可以真相大白。反而喺相關嘅網上討論中,不難發現一個普遍嘅社會現象:好多人都先入為主,喺未有足夠相關資料支持下就罔下判斷,甚至借題發揮,上綱上線。

眾所周知,香港人愛心爆棚,感性到冇人有,逢親有乜不幸事件,就會喺本能驅使下即刻企咗埋「苦主」嗰邊,完全不問情由。好似先排轟動全港嘅「雞蛋仔阿伯事件」咁,就有好多熱血市民主動走出嚟撐阿伯,狂插食環署。到後來阿伯俾人踢爆原來謊話連篇,而且仲有呃綜援之嫌,佢班支持者就即刻潛晒水。人當初質疑嘅係食環署嘅執法手法,呢樣唔應該受阿伯有冇講大話影響。就算阿伯真係有呃綜援,亦唔表示食環署嘅做法會即刻由唔合理變成合理。可見呢班熱血市民由頭到尾都係對人唔對事,完全唔係從法理角度出發。

又睇番「偷雞翼事件」,有網民質疑個超市經理,話佢一早唔警告阿婆,等佢出咗超市先報警拉人,分明係「裝彈弓」。首先,我認為超市經理只係盡咗公民責任,協助警方打擊罪案,咁又何錯之有呢?而且再分析一下,單可能另有內情。通常喺街坊店鋪,人如果發現細路或者老人家偷,而只係涉及極小數目,好多時都唔會報警。又要落口供,又要上庭,真係要幾煩有幾煩。有可能阿婆已經唔係第一次,所以個超市經理先特別留意佢。當然啦,呢只係我覺得有可能嘅情況,並唔表示我認為阿婆早有前科,一切要到上庭先可以水落石出。

日月報嘅報導先過癮,竟然有咁樣嘅一段:「林文超建議如發現長者盜竊,不應光是報警將他們拘捕,還應了解他們犯案的深層原因,對症下藥。如果是心理問題便要尋求社工協助;如是綜援金不夠用,亦可向社工提出。」究竟林文超係乜水?之唔係香港防止虐待長者協會嘅助理總幹事囉。呢條友嘅言論都算出位喇,居然鼓勵市民充當判官,直頭想破壞香港嘅法治精神!首先,一般市民唔係社工,冇責任或者專業智識去了解長者因乜事會犯案!市民更唔係法官,絕對冇資格決定涉案長者應唔應該受法律制裁!好似之前有個阿伯窮到冇飯開,走去打劫便利店博坐監,結果俾法官判咗守行為。阿伯亦因而得到需要嘅幫助,唔止攞到綜援,仲入住埋安老院添。如果當日個店員冇報警,而係只係俾個麵包阿伯,佢都唔知點收科!

有熱血雖然係好,不過如果由心臟指揮腦部,除咗會影響自己嘅判斷力,對解決問題亦唔會有任何幫助!

4 則留言:

  1. 憐貧惜老本是應該,但法律公義還是要守的,香港太多低 B 爛好人咯,見到個現象就盲杉咁撲埋去擁抱,衰咗只徒招笑柄!

    回覆刪除
  2. 我就認識一個人,收入不錯,揮霍無度,是月光族,他說老來等政府養,現在就要花到盡。

    回覆刪除
  3. 八十幾歲嘅阿婆都仲好醒喎!用唔抵食嘅山竹(貴嘢)遮掩平嘢,事發就稱冇肉食(搏同情),阿婆不應該說冇肉食,應該說不夠用(可能係事實),因為而家啲嘢好貴。

    回覆刪除
  4. laulong,
    其實有樣我一直都唔明,既然絕大多數港人都係愛心爆棚,又樂於助人,點解香港仲會咁唔和諧,仲會發生咁多虐兒虐老事件呢?

    佛爺:
    講真喎,對于收入唔多嘅人嚟講,積榖防饑絕對係自己笨,橫掂失業又好,退休又好,都唔會影響佢地,因為有政府養!

    Coffee,
    哈哈,真係唔好睇小長者呀,其實好多老人家都不知幾精靈!

    回覆刪除