2011年7月7日星期四

由花園講起

講起花園,一般人可能會聯想到嗰種滿花草樹木,俾人晨運、休憩、甚至依泣嘅地方。不過事實上,原來香港大部份嘅「花園」,其實係樓盤嚟架。好似我第一次做業主,嗰座樓就係叫做XX花園嘞。講真,將樓盤叫做花園,我自己就唔係咁鍾意。樓明明係住人嘅,又唔係用嚟種花,都唔知點解要叫做花園!

講到樓盤嘅命名,我諗唔多唔少都反映咗香港人嘅心態。雖然話樓盤名係發展商起嘅,不過佢地其實都係捉用家嘅心理啫。近年新盤都標榜一個「豪」字,連三百幾呎嘅都係尊貴豪宅,乜乜豪庭同物物豪園就一窩蜂咁出現。甚至有樓盤廣告仲用到「奢華」兩個字嚟做宣傳,唔通發展商嘅文膽真係唔知個「奢」係帶有負面含義?冇辦法啦,喺香港呢個笑貧不笑娼嘅社會,語不驚人死不休嘅人又有乜噏唔出呢?好似何文田有個樓盤叫做「富甲半山」,我就覺得有俗氣嘞。當然啦,嗰個樓盤嘅目標顧客都唔係我呢草根階層,我唔鍾意個名啫,都唔知有幾多人鍾意!不過話時話,叫做「富甲天下」唔係更可以凸顯樓盤嘅顯赫地位咩?

不過咁,當所有樓盤都標榜豪華、甚至奢華嘅時候,就算「富甲天下」都唔會令人滿足。富而不貴、有錢無權,始終都係爭咗。發展商為咗幫尊貴客戶打造帝王之家,都紛紛喺樓盤名用上「帝」、「皇」、「御」呢幾個字。對於我地呢蟻民嚟講,真係連仰望都唔敢呀!有發展商更別出心裁,用埋個「璽」字添。好似「天璽」咁,分明就係玉皇大帝嘅印啦。莫講話我呢凡夫俗子唔敢走近,就算連望吓都驚冒犯咗玉帝嘅天威!

「天璽」雖然高不可攀,不過始終爭咗少少霸氣。「君臨天下」就真係冇得彈嘞,芸芸樓盤之中,都係呢個起得最有氣勢。不過去到咁盡,我又驚佢無以為繼喎,如果樓盤仲有第二期,真係唔知起個乜名先可以匹配到嘞。哈哈,又俾我諗到喎,不如叫做「兵臨城下」啦,一樣咁有氣勢!

如果因為呢非富則貴嘅樓盤名,就以為發展商淨係一味市儈,又未免睇偏咗佢地嘞。其實佢地都有好多創意十足嘅傑作架,只係我呢老粗唔識欣賞啫。好似嗰乜乜山、乜乜峰、乜乜海、同乜乜港,我就點都唔會聯想到係住宅。呢都算嘞,始終鍾意隱居深山嘅都大有人在。最無厘頭係唔知幾時開始,發展商硬係要加一點(.)喺樓盤名裏面,例如「帝峰.皇殿」、「銀湖.天峰」、「譽.港灣」、「寓.弍捌」等。嗰一點有乜意義,我就真係唔太明白。我亦唔知道上述屋苑嘅住戶會點同人講自己住喺邊度,究竟係「銀湖天峰」、「銀湖點天峰」、「銀湖dot天峰」、抑或係「銀湖(頓一頓)天峰」呢?

究竟點解會有呢一點呢,我就懷疑係科網熱嘅後遺症。記得喺tom.com上市嘅時候,好多人鍾意乜都加一點上去。好似嗰時同鬼佬同事去食泰國菜,我地就會將冬蔭功講成tom.soup。不過時移勢易,而家已經唔興用點架喇,如果將「銀湖.天峰」改成「銀湖@天峰」,肯定會in好多啦。

如果講到無厘頭之最,就肯定非「都會馬尺」莫屬嘞。其實「馬尺」係一個字,不過係日文,唔係中文。日文裏面「馬尺」係「站」咁解,讀音係eki。中文裏面根本就冇呢個字,如果夾硬要個對應嘅中文字,就應該係「驛」嘞。發展商都唔知係咪存心玩住戶,因為絕大多數人都唔會知道呢個樓盤名應該點讀。讀成「都會站」、「都會驛」、「都會尺」、或者「都會馬尺」其實都有問題,嚴格上嚟講應該讀成「都會eki」。唔識讀都算嘞,更大鑊嘅係唔識打。大家都知啦,而家人根本就唔使寫字,乜都係喺電腦打,但係又有幾多人識打日文呢?究竟「馬尺」呢個字應該點打呢,起碼我就唔識嘞。而且喺字義方面,無論係「站」抑或「驛」,同樓盤嘅豪宅定位都唔匹配。都唔知個樓盤名係邊個屎坑師爺諗出嚟嘅,如果我係李超人,肯定第一時間炒咗呢條友!

又唔係話所有樓盤名都係咁騎呢嘅,其實有都起得唔錯架。好似喺馬鞍山嘅「聽濤雅苑」,起碼就冇乜市儈味道先。不過樓盤嘅「雅」字,始終有自吹自擂嘅感覺,略嫌唔夠含蓄。佢隔籬仲有個屋苑叫做「觀瀾雅軒」,個名真係襯到絕。不過好奇怪,原來呢兩個屋苑係唔同發展商起架,咁又令我諗起大婆台同二奶台嘞。大婆台有「翡翠明珠」,二奶台就跟風,嚟個「黃金鑽石」。大婆台有個靚女組織叫做「慧妍雅集」,二奶台又學人整番個「仁美清聚」。唔理人地珠玉在前又好,抑或係豬肉在前都好,總之跟風之作就一定唔會係好,都唔知點解人仲會樂此不疲。

喺我見過嘅物業名之中,有一個真係好正,不過係虛構嘅。睇過天龍八部嘅朋有可能會記得,阿朱住嗰度叫做「聽香水榭」,呢個名就真係一流嘞。無無聊聊上網摷吓,原來湖南長沙居然真係有個樓盤用咗呢個名!不過喺香港就一定唔掂,又「聽香」又「謝」,真係大吉利是咩!


6 則留言:

  1. 嘩!不得了!我係地鐵一路睇一路笑,呢個係我早就不以為然的了,我曾同朋友一起狂嘲弄過,係,我住唔起不單止,嚇都俾啲名嚇到腳軟。哈哈!

    回覆刪除
  2. 兵臨城下,唔係好野!嘻嘻!

    回覆刪除
  3. 呵呵,馬真係成尺架!

    真唔老黎都係聽香水榭,真係大吉利是!

    回覆刪除
  4. Coffee,
    哈哈,以我地呢旁觀者嚟講,對於而家樓盤名只會有兩個反應,一係嚇死,一係笑死!

    佛爺:
    係喎,等我諗過另外一個先,不如就叫做「母儀天下」啦!同「君臨天下」襯到絕之餘,仲政治正確添,唔使俾人話性別歧視!

    laulong,
    哈哈,雖然馬有成尺長,不過聽講話象同鯨仲勁呀!如果發展商想要更有霸氣嘅樓盤名,不妨考慮吓呢兩種動物!

    回覆刪除
  5. 嘻嘻,我覺得我同果啲 "dot"樓盤八字應該幾夾,點解?因為我成日加一點喺我啲文章標題果度。請問你有冇將我啲 title 讀成 “乜乜乜 dot 乜乜乜"咁呢?

    回覆刪除
  6. SKII,
    哈哈,blog嘅標題係唔會有呢個問題架,因為根本唔使讀出嚟!

    回覆刪除