唔通日月報知道我想鬧佢？

已經想鬧日月報好耐，不過諗住等埋今年71遊行，睇吓佢嘅報導標題會點寫。點知出乎意料之外，佢今年嘅標題竟然係「民陣：21.8萬　警方：5.4萬　七年最響怒吼」，唔通日月報真係知道我想鬧佢？

其實睇咗日月報好多年，覺得佢幾正派，唔似有報紙咁，搞到個風月版有聲有色，但係又扮晒正義朋友。而且日月報記者嘅質素都唔錯，起碼唔會出現太多錯別字。不過最主要都係鍾意佢夠持平，立場唔會太偏頗。

對於我嚟講，一份報紙嘅持平立場最緊要，當然啦，社評除外。新聞背後嘅誰是誰非我自有判斷，絕對唔使報紙話我知，我需要嘅只係客觀如實嘅報導。喺呢方面，我對日月報一向都相當滿意。

不過呢幾年，唔知係咪要迎合市場，日月報竟然開始傾向所謂嘅民主陣營。最先淪陷嘅係副刊，埋晒不知所謂嘅白痴女人寫，只要係政府嘅就乜都鬧，但係又理據欠奉。好似嗰件黃Ｘ樂咁，我之前先喺一篇blog（由疏忽照顧兒童講起）裏面插過佢。另外仲有件陳Ｘ姿，因為早排有幾個打咗流感針嘅孕婦流產，就鬧政府草菅人命。唔通佢唔知道孕婦喺正常情況下都有機會流產？呢樣最緊要睇數據，佢唔信政府都應該信吓專家啦！

平日嘅副刊都仲好喇，星期日嘅副刊先至係重災區，直頭係俾民主聖鬥士霸佔晒。冇啱睇都算嘞，最離譜係斑友竟然將廢青嘅滋事行為（例如強佔馬路）美化同合理化。如果我係老闆，肯定第一時間炒咗個主編！其實副刊唔啱睇都冇乜大不了，最多咪唔睇，弊就弊在喺新聞版都出現立場偏頗嘅情況。

眾所周知，每年嘅64同71，警方同主辦單位公布嘅集會遊行人數都有好大出入，往往可以爭好幾倍。坊間普遍認為，將兩個數字加埋除二就應該比較中肯。後來港大民意研究同另一位港大學者都公布埋佢地嘅統計數字，竟然同警方公布嘅出奇咁吻合，真係令人跌晒眼鏡！公眾一向以為民主人士好有誠信，誰不知原來佢地嘅作大本領先係最耍家！

雖然吱聯會同民陣嘅作大技倆俾人插爆咗，但係日月報竟然仲一直用佢地公布嘅數字做新聞標題，簡直當讀者係白痴！曾經諗過寫信去日月報，質疑佢地憑乜理據採用咁誇張失實嘅數字嚟做新聞標題，但係一直都冇實行到。一來係因為自己太懶，不過最主要都係因為我鬧人就叻啫，要我正正經經寫封信就唔掂架喇。

照我估計，日月報採用作大數字，最可能嘅原因只有三個。第一，受編輯嘅政治立場影響。第二，作大數字更能吸引讀者。第三，想討好（或怕得罪）民主陣營同佢地嘅支持者。唔理係邊個原因都好，我都覺得好難接受。睇番今年71遊行報導嘅標題，雖然日月報已經糾正咗以往嘅錯誤，不過唔鬧吓就硬係覺得條氣頂住頂住！

作為「最具公信力」嘅中文報紙，日月報究竟有冇諗過佢嘅目標讀者會係邊類人？日月報冇風月版，馬經波經乏善足陳，娛樂版驚喜欠奉，財經版亦冇過人之處，究竟佢可以憑乜突圍呢？同人地鬥賣政治立場，鬥玩譁眾取寵？呢其他報紙已經玩到出神入化，日月報根本就同人地冇得揮，咪嘥氣啦！作為日月報長期讀者，我可以話俾佢知，我嘅要求好簡單，只要客觀如實報導就得嘞！

不過鬧還鬧，我暫時都仲未考慮轉睇其他報紙，因為根本就唔係咁多中文報紙可以做到我嘅簡單要求！唔通而家香港嘅傳媒生態真係咁，中立持平就冇市場？