2011年7月3日星期日

禽獸真面目

哈哈,真係俾我講中咗!我琴日講過爭取民主一定要有人犧牲,而被犧牲者絕對冇得異議,因為犧牲係佢地嘅義務。果然,琴晚睇電視新聞就有人(?!)企出嚟印證我嘅講法。

71當晚,兩批廢青(瀉民連同淫民力量)分別佔據咗中環同金鐘兩條馬路,搞到大塞車。事後有被困車龍嘅司機接受訪問,表示非常反感,勁鬧班廢青。另外又有的士司機話,廢青突然衝出馬路,好彩佢剎車剎得快,唔係就大鑊喇。

後來警方採取清場行動,押走(肯自己行嗰)同抬走(堅持攤屍嗰)滋事廢青,最後拉咗二百幾人。電視畫面所見,有個面目可憎嘅女廢青俾警察押走時大嗌:警權無限大!當警察抬人嘅時候,又有一把女聲大嗌:人嚟架,警察!

廢青之所以為廢青,自然有其道理,絕對唔係老屈。班友梗係大腸生得過高,導致腦部充塞住廢物,嚴重影響佢地嘅思維。警方執法係根據香港法律賦予嘅權力,將阻街嘅滋事份子押走,何來「警權無限大」?唔知班友有冇見過其他地方(例如南韓、希臘、法國)嘅警察係點執法嘅呢?人地嘅警察係將示威者當豬狗咁扑架!至於警方將攤屍嘅廢青抬走,其實我自己都有異議。如果係執垃圾,應該由食環署負責。如果係執屍,就應該仵作。點計都冇理由要警察自己郁手嘅。警察肯自己落手落腳抬走班滋事份子,根本就說明咗警察當班友係人啦!

對於滋事份子嘅所為,社會上譴責聲音不絕,電視台亦同兩大廢青幫主(癲狗同桃君痕)做咗訪問,睇吓佢地有乜回應。呢兩條友雖然狗咬狗骨,不過始終都只係窩裏狗作反,佢地對事件嘅回應基本上係完全一致。佢地話喺所有群眾運動中,社會必然會付出代價,有乜咁出奇。

班友呢排狂插政府提出嘅遞補方案,鬧政府唔肯進行公眾諮詢,仲大嗌「還我投票權」。咁我又想問吓呢兩位廢青幫主,佢地嘅瞓街方案又有冇廣泛諮詢過香港嘅駕駛人士呢?佢地又有乜理據認為公眾要支持佢地嘅行動呢?道路使用者要求「還我道路使用權」,點解班友又當聽唔到呢?一句講晒,呢咪雙重標準囉!總之就只許廢青放火,不許市民點燈啦!

最難頂係呢兩條友發表偉大嘅「代價論」時,竟然可以氣定神閒,臉不紅耳不熱,直頭當正自己係上帝咁。好,基於民主凌駕一切嘅原則,又當駕駛人士嘅犧牲係必需。但係人地付出咗,成就咗班友嘅民主大業,作為民主運動嘅領頭人,呢兩條友竟然可以一表示都冇。就算唔向受影響嘅駕駛人士致歉,起碼都要嘉許吓人地對民主大業嘅貢獻啩。兩條友居然覺得一切都係理所當然,簡直當公眾係用完即棄嘅發泡膠飯盒!睇見佢地涼薄嘅嘴臉,即刻令我諗起「衣冠禽獸」呢四個字!再諗深一層,「衣冠」兩個字都可以慳番,因為佢地嘅禽獸嘴臉根本就赤裸裸咁展示人前,又何來衣冠掩飾呢?!

哈哈,差唔記得咗件大舊衰添!條友扮晒可憐咁接受電視訪問,投訴警方濫用暴力,用胡椒噴霧兜頭兜面噴佢。條友嘅變臉本領都算登峰造極喇,一下子就由衝鋒陷陣嘅滋事頭目,變成楚楚可憐嘅受害人。其實條友早有前科,早排先牽涉入一單企跳式抗爭。事件間接導致一名警務人員殉職,引起社會上廣泛譴責。悲劇發生前仲見隻大舊衰同個示威者攬頭攬頸,實在令人懷疑單係佢嘅傑作。不過事後條友竟然即刻變臉,扮晒唔識個示位者。咪睇條友咁大舊就以為佢好遲鈍,原來佢嘅面部肌肉都不知幾靈活!

呢幾條友犧牲咁多人,無非只係為咗自己上位。咪以為被犧牲嘅只係公眾,其實仲包括埋嗰班嘍囉廢青。無啦啦衝出馬路係好危險嘅事,隨時會俾車撞,就算唔死都可能會終身殘廢,最慘係就算出咗事都唔會有人可憐。又當班友身手敏捷,連車都撞佢地唔死。不過班友隨時會興奮過度玩大咗,萬一留咗案底就呢世都係咁先嘞。就算乜事都冇,班友過多幾年就知大鑊。到時佢地就會發覺自己喺社會上完全冇競爭力,俾同期嘅朋友或者同學拋離晒,唯一出路係攞綜援做另類社工。所謂一將功成萬骨枯,呢個係千古不變嘅定理,真係唔明點解會有咁多人爭住墊屍底!冇法啦,班友要死唔通唔俾佢地死咩!


11 則留言:

  1. 香港政府執政無力,警方又慈悲為懷。我而家唔睇佢哋表演喇,真係會睇到頭痛!

    回覆刪除
  2. Coffee,
    而家民主聖鬥士成日話警權過大,鬧警察濫用暴力。你竟然敢唱反調,因著俾班友狙擊呀!

    回覆刪除
  3. haha, 暢快暢快!

    港英時代啲差佬直頭出警棍喇,最狼嗰啲仲係洋警官,維園保釣者就俾人扑到流晒蚊飯!

    回歸後啲差佬太忍讓喇,班廢青要犧牲,應該犧牲自己啲血嘛,差佬唔扑你就自己扑自己,或者互扑,癲狗扑大舊,大舊扑癲狗,咁至係犧牲嘛!誰不知哩班廢契係犧牲別人快樂自己,佢地有冇 ball 嘅哩吓?

    回覆刪除
  4. 二十世紀上半葉的精神分析學,早有對廢青的心態,作過詳盡的解釋。

    為何他們會不顧一切衝出馬路?為何他們會不理自己前程?倒不如想一下,為何那麼多德國人為希特勒而付出了性命?

    回覆刪除
  5. laulong,
    哈哈,其實兩幫癲狗(瀉民連同淫民力量,而且上至頭目下至嘍囉)都有互扑架!當然啦,班友互扑係為咗爭奪權力同利益,同犧牲一關係都冇!佢地梗係唔會犧牲自己啦,如果唔係仲有邊個可以替港人爭取民主呢,簡直係偉大到爆呀!

    佛爺:
    哈哈,講到心理分析,我真係唔敢班門弄斧架,我只係斷估冇痛苦,講錯咗唔好笑我呀!我諗係有人以愛國嚟包裝極端民族主義,搞到班德國佬腦部過度充血。而當人人都熱血沸騰嘅時候,原本持異議嘅人都會受群眾情緒影響,就好似滾雪球咁。就算當中有人堅持自己嘅諗法,亦唔敢企出嚟做少數嘅反對派。

    回覆刪除
  6. 其實沒有一個固定的答案,你的見解是其中之一。因希特勒自殺後十天,德國才無條件投降。歷史學家無法明白,為何德國人的精神領袖已經毀滅,她們還會戰鬥到盟軍會師。

    回覆刪除
  7. 佛爺:
    雖然精神領袖已經唔喺度,相信下面仲會有一大班上晒腦(或被洗晒腦)嘅死硬支持者,佢地會不惜犧牲繼承領袖嘅遺志都唔出奇。當然啦,呢個只係我自己嘅想法,並冇任何歷史根據。

    回覆刪除
  8. 你的見解,令我想起1944年,希特勒被手下軍官放了計時炸彈,誰料陰差陽錯,炸死了另外四人。事後對他忠心耿耿的年輕軍官,追殺了不少參加此次政變的將領。這些年輕軍官,可能一直戰至最後,東西線的盟軍會師。

    回覆刪除
  9. 佛爺:
    其實我一向都覺得年輕人比較容易受人洗腦,好似大陸嘅紅衛兵咁,就係另一個血淋淋嘅例子!

    回覆刪除
  10. 我路過o既....
    終於搵到個同我一樣諗法o既人. 好開心.
    我好怕o係電視見到佢地, 搞到我d認知關始有問題. 仲以為我自己唔正常添呀. 好唔想香港變成咁呀. 好怕香港人學左佢地. 好冇修養. 成日講民主講自由,成日博出位, 好心佢地"汁"下個look先, 好騎呢呀!! 選丐幫幫主? 犧牲o既唔係佢地, 係我呢d小市民呀! 教壞晒d人.
    加左你喇~ 絕對支持你. 寫得好好呀. 加油呀!!

    回覆刪除
  11. Jessie,
    歡迎光臨!你唔使擔心,其實同你一樣諗法嘅人仲有好多,不過佢地通常都係比較沉默嘅一群,所以唔夠人地大聲啫!

    回覆刪除