2010年4月17日星期六

跳樓

天匯跳樓事件終於有定案,政府決定規管樓層數字,唔准地產商任意跳層。本來係一單得啖笑嘅鬧劇,估唔到有扮民議員會無聊到大事炒作,分明係食飽飯冇做。更估唔到嘅係政府會認真處理,正一好做唔做。

係人都知地產商創意爆晒燈,樓盤名要幾騎呢有幾騎呢,甚至連一特定樓層都起個名,好似乜"天際獨立屋"咁,真係笑死人冇命賠。其實樓層避開某唔吉利嘅數字,根本就唔係乜新鮮事物,天匯只係將呢種做更加法發揚光大啫。但係騎呢還騎呢,關一般市民乜事,又關政府乜事?

誤導公眾?樓盤係私人地方,人地喺自己地方發揮創意,關公眾叉事咩!天匯88樓實際上即係第幾層,又對你同我有乜影響?

欺騙買家?你當人地傻嘅咩!發展商肯定有提供詳細樓層資料,買家亦唔可能乜都唔知就扑槌,依家講緊七萬蚊一呎嘅豪宅,你當喺街市買斤菜呀!事實上人地真正買家都冇嘈,唔明扮民議員喺度嘈乜。

造成信息混亂,發生緊急事故時會影響救援?只要容許跳層,就會有咁嘅機會,跳一層同跳十層根本冇分別。如果真係覺得對公眾安全有威脅,不如再玩大,建議完全唔俾跳層,連跳咗嘅都要改返晒。

有人諗得出呢咁嘅屎坑橋又有人肯buy,都唔知仲有乜好嘈。講到尾,議員都係想證明俾人睇自己係挑戰巨人嘅大衛啫。有咁無聊嘅議員,又有個咁無能嘅政府,真係唔知點算好!



沒有留言:

發佈留言