示範單位

由於有市民投訴地產發展商喺示範單位做手腳，製造空間感嘅錯覺嚟誤導消費者，政府繼永利街原汁原味保育事件後，又再順應民意，出手做。

今次又係鄭汝樺局長出招，首先要求發展商唔好喺示範單位搞咁多花樣誤導消費者。唔知鄭局長係咪好少睇示範單位，見到牆身鑲鏡，玻璃間隔，床或書檯放埋上窗台，同埋小人國傢俬就大驚小怪。其實睇示範單位係好多人嘅假期消遣，呢咁嘅花招根本就呃唔到佢地。相反嚟講，仲有一定嘅參考價值添，好多人屋企都有類似嘅裝修。喺發展商嚟講，搞靚個示範單位係樓盤推廣嘅一部分，對於銷售好重要。只要示範單位喺尺寸方面冇作大，根本就唔需要規管。如果咁都話有問題，相信市面上大部分產品嘅廣告都要禁。而且售樓書裏面有單位平面圖，可以睇到真實間隔同尺寸，示範單位誤導消費者云云，真係講唔通。依家唔係喺街市買幾蚊一斤菜，係講緊郁吓都幾百萬嘅一層樓，消費者梗係要自己睇清楚啦。

另外一招仲搞笑，就係要求發展商提供樓盤嘅正確區域同地址。首先，售樓書冇可能冇正確地址。如果有條友連地址都唔知就大拿拿攞幾百萬出嚟買層樓，咁就真係冇講嘞。至於正確區域，有時又真係好難講喎。你話半山一號係屬於何文田定土瓜灣丫？發展商就梗係話何文田啦。佢咁講啫，你絕對可以唔同意。始終，買唔買係自己嘅決定，冇人可以迫到你。講到尾，買樓係重要嘅投資，事前應該做功課。最好係親身去地盤附近睇吓，再唔係，Google Earth同Google Map一樣幫到手。

依家人又唔用腦，又唔肯做功課，吓吓都話俾地產商呃咗，呢態度真係唔要得！至於政府，呢次真係好做唔做！