請勿侮辱文學與藝術！

內地作家莫言獲得諾貝爾文學獎，本人真係啞口無言。千祈咪誤會，我絕對唔係要質疑評審結果。「無言」係因為唔知講乜好，以本人嘅文學修養，根本就冇資格評論。況且喺莫言嘅作品之中，我淨係睇過「紅高粱家族」一篇咁大把，仲要係九十幾年前嘅事，內容已經唔記得晒，想評都冇得評。

無啦啦摷呢單嘢嚟講，係因為睇報紙見到內地「藝術家」艾未未大發高論（「高」字要用普通話發音），話莫言獲獎「是對人性和文學的侮辱，是諾獎委員會的恥辱。」

條友都黐孖筋，作為一位「藝術家」，竟然踩過界批評諾貝爾文學獎嘅評審標準。人地嘅作品冇傳遞到佢認為正確嘅政治信息，就話人冇資格獲獎，都唔知係乜嘢理論。

以李杜為例，李詩明顯比杜詩少咗一份憂國憂民嘅情懷，但係後世並冇因此而貶抑李白。事實上，詩仙詩聖得以齊名，正正說明咗文學領域容納到唔同嘅題材，有空間自由發揮先係硬道理。

以艾未未嘅主張，文學作品只可以有一種聲音，咁同大陸鉗制言論自由又有乜分別呢？公然提出要扼殺作家嘅創作自由，唔知邊個先係喺度侮辱緊文學呢？！

講開艾未未，又忍唔住要提吓佢嘅「藝術創作」嘞。鄙人對藝術一竅不通，本來都冇資格評論啲乜嘢。不過有一樣嘢我起碼知道，令人覺得嘔心嘅就點都唔講得上係藝術品囉。

就以大「藝術家」嘅名作「一虎八奶圖」為例，據聞內裏深藏玄機、隱喻甚多。不過橫睇掂睇，我都只係見到一個肥到爆晒膏嘅裸男，再加埋四個其貌不揚嘅裸女。咁核突嘅嘢，真係望一眼都想嘔，仲邊會有興致探討佢嗰啲所謂嘅隱喻呢？

講真，呢件所謂作品，分明就係一個不知羞恥為何物嘅男人同四個博出位嘅女人喺度玩即興露肉！如果咁都算藝術品，根本就係對藝術嘅極大侮辱囉！

本人絕對支持言論自由，但唔可以對文學同藝術肆意侮辱！艾未未，唔該你收皮啦！

哈哈，最緊要嗰樣唔記得講添！大家千祈唔好摷「一虎八奶圖」嘅原裝版嚟睇，否則後果自負！如果閱後令大家對異性（或同性）喪失興趣，本人概不負責！

一虎八奶圖

行船三分險

國慶日發生嚴重海難，令人震驚同難過之餘，亦帶出咗一個我地以前好少注意嘅問題，原來坐船都可以好危險！

事隔兩日，越南下龍灣亦發生撞船事件，令到五名台灣遊客魂斷異鄉。事實上，涉及觀光船嘅嚴重事故，喺下龍灣並唔罕見。舊年二月就有觀光船因為船身入水而迅速沉沒，導致十二人死亡。單嘢喺半夜發生，啲遊客喺船艙瞓晒覺，直頭死咗都唔知乜事。據聞事發後有關當局禁止觀光船提供夜宿安排，但係過咗一日就解禁，都咪話唔搞笑。梗係啦，多數遊客去下龍灣都唔止玩一日，而且通常會選擇喺觀光船過夜，如果禁止夜宿，當地旅遊從業員肯定要食穀種囉。

事實上，又真係有好多遊客唔怕死，本人就係其中之一。單嘢發生咗兩個月，我就去下龍灣玩嘞，仲喺船上過咗一晚添。喺船過夜有好多好處，黃昏可以睇日落，朝早可以睇日出，又可以慳番一晚酒店，真係何樂而不為。講真，話唔怕死就假嘅，所以當晚臨瞓前，我一直提醒自己要醒瞓啲。不過事與願違，一瞓就瞓到隻死豬咁，到第二朝鬧鐘鬧先識醒。好彩冇嘢發生，仲睇到相當唔錯嘅日出添。

話時話，都唔知點解去親旅行都會有遊船河，就算係去內陸地方，都會安排遊河或者游湖。玩緊嘅時候當然唔識驚，不過而家諗番，其實真係要揾命博架。因為如果有乜意外，就算有救生衣都未必救到命。

有次去巴西玩，行程包括亞馬遜森林探險，其中重頭戲係遊河釣食人䱽。叫得做探險，坐嘅當然唔係大船，而係又窄又長嘅機動艇仔。呢類艇仔本身就唔係咁安全，因為比較容易反。而我自己又成日企起身影相，其實咁都幾危險吓，一失平衡就會跌落水。如果跌落水就大鑊喇，浸就未必浸得死，不過喺幾分鐘內就會俾啲食人䱽到得番棚骨囉！

咁都未算最恐怖，起碼都叫做有得剩。今年去博茨瓦納嘅Chobe Delta，就有坐船遊河環節，提供唔同角度睇番兩岸野生動物。不過見到最多嘅動物，並唔係羚羊水牛河馬，而係食人唔𦧲骨嘅大鱷，估計應該仲有好多喺水裏面冇蒲到頭添。鱷魚唔識咀嚼，只會將獵物撕開一大塊一大塊，連骨帶肉咁吞。如果跌落水，隨時會落得屍骨無存，都咪話唔得人驚。不過隻船都算大，坐到幾十人，應該比較安全，當時係咁諗囉。

咪以為水裏面冇食人怪物，而又著住救生衣就冇有怕。好多年前去紐西蘭，就坐橡皮艇玩過Tasman Glacier嘅Terminal Lake。個湖同冰川連接，由剛融化嘅雪水形成，水溫接近零度。喺水裏面浸幾分鐘，就有可能死於低溫症，所以就算有救生衣都冇用。

古語有云，行船跑馬三分險，不過當玩到興高采烈嘅時候，又有幾多人會察覺到當中隱伏嘅危機呢，起碼我自己就冇嘞。見到今次咁嚴重嘅海難，先知道世事無常，乜都可以隨時發生，咁係咪要審視吓應唔應該再玩啲有潛在危險嘅活動呢？不過諗深一層，既然乜都可以隨時發生，真係想避都未必避到啦。落街可能俾人跳樓責死，留喺屋企又有機會俾隔籬開煤氣自殺炸死。所謂該死唔使病，邊驚得咁多啫！趁而家仲行得走得，都係有得玩就玩，一於馬照跑船河照遊！

Halong Bay, Vietnam

Amazon River, Manaus, Brazil

Piranha, Amazon River, Manaus, Brazil

Crocodile, Chobe National Park, Botswana

Terminal Lake of Tasman Glacier, New Zealand

Terminal Lake of Tasman Glacier, New Zealand

刁民社會

刁民係乜？以本人嘅中文程度，恐怕好難講得清楚。而且網上有大把現成資料，信手拈來就用得，又使乜自己獻醜呢？！以下係節錄自百度百科有關「刁民」嘅條目：

刁民
翻开字典，“刁”，是狡猾的意思，从原始意义上讲，“狡猾”应该是一个中性词，不具有褒贬意义。“刁民”绝对不是愚民。它是民众中的聪明人。 “刁民”，是与官员相对应的，是官员对一些难对付的民众的专用称呼。“刁民”就是对官员刁难，很难对付的一类百姓。“刁民”的称呼是官员赐予的，“刁民”的贬义也应该是官员赋予的。自古以来，官员是不大喜欢“刁民”的。“刁民”多了，工作难做，官员难当。

基本信息
“刁民”带有无赖，狡猾,奸诈特征的人被称为刁民。也可以说是蛮不讲理的人，狠毒心肠的人。

由来
一是百姓享有一定的人权。中国之所以“刁民”历史悠久，是与中国的“民本”思想占主导地位有关系的。民众享有基本的人权，才会有“刁民”出现！ 在生存权力随便可以被剥夺的社会中，是没有“刁民”的，只有“顺民”或者“暴民”！曾国藩在衡阳练兵时，对抢粮的饥民，一次性砍下二十多颗血淋淋的人头。曾的解释是乱世要用重典。在这种重典下，谁还敢作刁民呢？在日本统治的中国满洲，是没有人敢同“皇军”使刁的，所以那时只有“良民”和抗联战士，而没有“刁民”。

對於上述解說，本人並唔完全認同。首先，“狡猾”一詞肯定係帶有貶義。而且要做刁民，其實門檻好低，根本唔需要乜嘢聰明才智。再講，刁民所「刁」嘅對象，亦唔一定係官員。被「刁」者可以係任何個人、私人或公共機構、甚至整體社會。不過有一點我就非常同意，就係「百姓享有一定的人权」，先會有刁民出現。今日睇報紙，就見一單人肉示範嘞。

報載有私家醫院清潔女工，因為喺工作時間瞓覺，俾上司用手機拍低短片，最後被迫辭職。事後女工「不滿被侵犯私隱，向私隱專員公署投訴，但未獲受理，日前她入稟高院申請司法覆核。」據醫院解釋，該女工「曾多次偷懶，院方每次與她對質時，她均否認，反向院方要求證據」，所以先拍低佢嘅睡姿。報導仲話，該女工「原於瑪麗醫院工作10多年，後來因為薪金較高而轉工，一直以來跟部分新同事關係不太好，懷疑遭上司針對。」

眾所周知，喺公營機構做嘢，基本上係捧住個鐵飯碗。除非導致嚴重事故，對於一般輕微失職（例如偷懶），主管都會隻眼開隻眼閉，費事搞咁多嘢。私營機構講求成本效益，莫講話主管對下屬偷懶唔會視而不見，就算係同級同事都會睇唔過眼，因為隨時要做埋佢嗰份。所以當事人話俾同事針對，根本就係正常不過。

至於話侵犯私隱，更係荒謬絕倫。喺工作地點偷懶瞓覺都算係私隱？俾人影到，自然唔係匿埋喺廁格之類嘅隱蔽地方瞓覺。明目張膽偷懶，斷正咗仲反咬人一啖，呢位女工都算「刁」得緊要喇。喺公家醫院hea過世咪好囉，佢偏偏要貪多少少人工轉去私家醫院。去到私家醫院，又要好似喺公家醫院咁hea，唔俾人兜都冇天理啦！

單嘢絕對唔係單一事件，呢類將社會核心價值無限放大、甚至肆意扭曲嘅行為，根本已經成為風氣。例如次次示威遊行，最後都演變為暴力衝擊警方防線、或者強佔馬路。唔通為咗表達意見，就可以破壞社會安寧、甚至剝奪公眾（道路使用者）權益？

又好似某名店阻止港人喺店外影相，網民就發起萬人圍堵，搞到附近嘅舖頭都做唔到生意。認為店方冇權唔俾人喺店外影相，咁咪報警囉，唔通班友又有權對人地作出滋擾？呢種近乎任用私刑嘅行為，究竟又係咪切合文明社會嘅核心價值呢？

另外，小號喺店內用簡體字做產品說明，又得罪咗某啲民主派人士，結果一樣受到圍堵。你可以抗拒簡體字，不過絕對冇權干涉我用邊種文字嘅自由。唔鍾意就咪幫襯，但係走嚟小店搞事，阻住晒我做生意，咁就佛都有火嘞。最得人驚嘅係，帶頭搞事嘅竟然係候任民選垃圾會議員嚟添！

由此可見，呢種將個人權利無限放大、肆意扭曲嘅刁民行徑已經深入民心。毫無疑問，香港正逐步走向刁民社會，安定和諧嘅日子將一去不返！

弊嘞，冇將上面引述百度百科嘅一段文字轉番繁體添，會唔會俾人鬧我係五毛黨呢？

Great Zimbabwe, Zimbabwe

Wine-Colored Days and Deep Velvet Nights

呢幾日喪聽Andy Williams，聽得最多嘅除咗Love Story，當然仲有教父嘅主題曲Speak Softly Love。

講到教父，經典二字絕對當之無愧。除喺係奧斯卡最佳電影，更喺IMDb得到史上第二高分，而男主角馬龍白蘭度亦奪得金像影帝榮銜。

套戲喺香港上畫，我應該係讀緊初中。嗰時仲係鄉下仔一名，根本唔識出城睇戲，要到後來電視播先有得睇，不過都係咸豐年代嘅事喇。到而家已經唔記得晒劇情講乜，淨係對首主題曲同馬龍白蘭度有印象。

首歌咁正，我一直都有聽，當然唔會唔記得。至於馬龍白蘭度，演成點已經冇晒印象嘞，不過就好清楚記得佢塊面。正確啲嚟講應該係話兩邊腮，唔知點解無啦啦腫咗，好似生炸腮咁，都不知幾詭異。

話時話，首主題曲係love theme，即係話套戲應該有愛情線，唔通要老馬玩枯木逢春？唔得，揾日等我班隻碟返嚟睇吓先！

Vineyard, Casablanca Valley, Chile

Vineyard, Casablanca Valley, Chile

Tbilisi, Georgia

Tbilisi, Georgia

致哀

願逝者安息、傷者早日康復！亦望死難者親友節哀順變，走出傷痛陰霾！

Love Story

琴日上youtube摷Andy Williams嘅Love Story，打咗lov三個字母已經彈個list出嚟，頭一行就係love story andy williams，可謂得來不太費功夫。隨手揀咗置頂嗰條片，點擊率有成四百幾萬，斷估應該係音效唔太差嘅版本。點知聽咗半句（Where do I），已經發覺俾人揾咗笨，嗰把聲根本就唔係Andy Williams！

老實講，雖然係冒牌貨（title明明寫住Love story - Andy Williams），但係條友真係唱得幾好，同Andy Williams嘅版本可謂各有韆鞦。不過咁，唱得好唔好係一件事，上載者點都唔應該用其他人嘅版本嚟冒充Andy Williams囉。我就相信唔係無心之失嘞，Andy Williams把聲咁易認，聽開舊歌嘅人有乜理由會搞錯呢？

再由頭睇番，原來第一個畫面已經寫住演唱者係Broce Twain。乜水嚟呢，真係唔知喎。上網摷吓，雖然資料唔多，但係就有驚人發現。有人話呢個至係Love Story嘅原唱者，直頭顛覆晒我對首歌嘅認知。

冇所謂啦，係唔係原唱其實都唔係咁緊要，鍾意咪得囉。好似Andy Williams唱飛哥跌落坑渠，我覺得仲好過Frank Sinatra添。佢又唱過Simon and Garfunkel版本嘅Scarborough Fair，雖然風格唔同，但係一樣咁好聽。當然啦，Andy Williams並唔係天下無敵，佢唱The Exodus Song就唔夠Pat Boone咁有氣勢嘞。

除咗上面提過嗰幾首，Andy Williams仲有好多正歌，例如Speak Softly Love、Alone Again (Naturally)、An Old Fashioned Love Song、A Time for Us、Aquarius、The Impossible Dream、Tonight、Moon River、Love is a Many Splendored Thing等等，真係百聽不厭。鍾意Andy Williams，究竟係因為佢唱得好，定係啲歌本身正，其實連我自己都唔係好搞得清。

講真，Andy Williams把聲唔算好靚，有啲沙沙地，唔係好夠厚，又唔算有磁性。至於唱功，亦唔覺有乜太特別。不過佢嘅歌令人聽得好舒服，最啱我呢類冇乜內涵嘅人。聽歌都係為咗消閒啫，如果咁嘅嘢都要學習同思考，咪仲辛苦過返工？

Andy Williams香咗，個個都話好可惜，又話好懷念佢，我反而冇乜特別感覺。佢都成八十幾歲先去賣鹹鴨蛋，喺中國人嘅角度，已經算係笑死啦。而且呢個世界有啲嘢叫做CD同MP3，就算佢唔喺度，我仍然會繼續聽佢嘅歌，可能直至我自己都香埋為止。所以佢有冇走到，對我而言真係一啲分別都冇！或者換一個角度，以冇咁冷血嘅方式嚟講，我根本唔覺得佢已經走咗！

Van, Turkey

Harare, Zimbabwe

呃秤？

有啲覺得我個blog要改名添，可能改成「十萬個點解」會更貼切，嚴重考慮中。因為我真係有好多嘢唔明，成日要問點解。

最近睇完一單新聞，我又唔明嘞，點解香港人硬係要覺得自己俾人呃先安樂，唔通佢地有「受騙情意結」？

引述明報報導：
【明報專訊】米芝蓮一星中菜館新斗記，其佐敦分店早前遇海關放蛇時被指「呃秤」，稱該店出售兩隻共重14両的厴仔蟹，其中綁蟹水草重逾6両，新斗記因而被票控。店方反駁，顧客購買時已知悉蟹重連同水草計算，裁判官亦同意本案無欺詐成分，控方後來修改控罪，店方改認罪名較輕的無按淨重量供應貨物，罰款2000元。

大家睇完段新聞，有冇覺得涉案食肆好離譜呢，用嚟綁蟹嘅超級無敵大水草，竟然同蟹本身嘅重量差唔多。冇錯，可能好多人會將焦點放咗喺條大水草度，而忽略咗單嘢嘅關鍵所在：究竟店方有冇呃秤呢？

正如法官所講，顧客一早就知道用嚟計算價錢嘅重量係包括埋條大水草，咁話店方呃人當然講唔通啦。而且店方係當住客人面前秤蟹，秤完唔鍾意可以唔要，完全合乎公平交易嘅原則。難得個官咁明白事理，真係要讚吓。大家知啦，香港絕大部分法官都好似不食人間煙火咁，基本上係同民眾生活脫晒節囉。

我反而覺得海關冇嘢揾嘢嚟搞，簡直係嘥時間兼擾民。不過又唔怪得晒佢地嘅，據聞海關係接到舉報，所以先採取放蛇行動。究竟係邊啲人咁得閒，食飽飯冇嘢做就玩投訴呢？從陰謀論角度嚟睇，我會懷疑係行家使嘅橫手囉。

去開街市買餸嘅朋有都知，大水草厴仔已經出現咗好幾年，根本唔係乜嘢新鮮事物。就曾經有傳媒報導過呢種咁有創意嘅綁蟹方法，都係話商販呃秤呃到離晒罩，竟然呃足一半咁滯。亦有消費者覺得冇理由要用真金白銀買條大水草，狂插啲無良商販。

講真，我自己都好少買大水草厴仔，不過就完全唔關呃秤事，只係唔鍾意呢種咁嘅包裝啫。問過相熟魚佬，佢話入貨時已經係咁，都係連埋水草秤。事實上，魚販只係根據來貨價mark up若干嚟賣，根本就冇諗過要呃任何人。至於供應商方面，用大水草綁蟹，背後又有冇不良意圖呢？

有人認為，因為條大水草夠重，所以單位價（斷斤計）可以定得低啲，令消費者產生錯覺，以為啲蟹好抵買。究竟實情又係咪咁呢？

事實上，直接幫供應商入貨嘅係街市魚販，佢地邊有咁易俾人誤導啫。至於消費者，相信會俾條大水草嚇怕多啲囉。我自己就好少買呢啲大水草厴仔，因為就咁好難睇得出蟹同水草嘅重量比例。如果揀著啲蟹細水草大嘅貨色，咁咪蝕底晒？所以條大水草基本上係打擊咗消費者嘅購賣意欲囉。

我就估條大水草真係有實際作用，因為可以幫啲蟹保濕。呢類鹹淡水蟹唔可以用水浸住，但係太乾又唔掂，所以啲膏蟹肉蟹好多時都要用濕麻包袋冚實。如果可以用水草保濕，咁就解決咗呢個問題啦。當然啦，呢個只係我嘅猜想，絕對唔係要幫啲無良奸商開脫。

要用真金白銀買條大水草，好多人都覺得唔抵，甚至有人話係明搶添。但係佢地有冇諗過，如果厴仔用番啲幼水草或者尼龍草綁，會唔會仲係賣番同樣價錢一斤呢？

事實上，大水草厴仔已經出現咗好幾年，到而家都仲有得賣，證明唔係所有人都覺得咁係呃秤或明搶。總之計過條數，覺得抵嘅就買，認為唔抵咪唔好買囉，做乜硬係要話人地呃秤呢？

講咗咁耐，大家知唔知厴仔係乜呢？其實厴仔同膏蟹一樣，都係鹹淡水蟹乸，但係膏蟹已經成年，而厴仔就仲係待字閨中。雖然未成年，不過厴仔一樣係爆晒膏，而且同膏蟹相比，仲有佢優勝之處，就係啲膏熟咗都唔會硬到石頭咁。如果單講啲膏，同黃油蟹真係有得揮架。當然啦，啲肉就少咗黃油蟹獨有嘅油香，始終爭咗少少。不過咁，價錢都同黃油蟹就爭好遠嘞。如果鍾意食蟹嘅話，厴仔真係相當唔錯嘅選擇嚟架。

話時話，雖然我都鍾意食蟹，不過就好少買厴仔。一來係怕咗條大水草，更重要嘅係，啲厴仔實在太細隻，唔係咁啱我呢啲懶人囉！

大水草厴仔

賤內

無意中喺網上睇到以下呢單娛樂新聞：

大Ｓ自稱「賤內」網友轟沒讀書

中國時報【宋志民╱台北報導】

大Ｓ和汪小菲到雲南捐贈「希望廚房」，她在微博說「賤內與有榮焉」，被網友轟沒讀書，賤內是舊時男性對妻子的謙稱，並非女性自謙用語，「這詞也代表了古代女子的低微，在現代用這個詞語很不恰當」，她對此沒回應。

大Ｓ在微博說「老公的餐飲服務業能往這樣美好的方向發展，賤內與有榮焉」，阿雅也發現有誤：「呵呵，賤內是老公稱老婆的，自己醬說真可愛。」網友酸「突然想起《流星花園》裡道明寺稱自己母親為令堂。」有人批：「回學校再出來賣弄古文吧，沒知識要有常識，沒常識要懂得閉嘴。」

講真，大Ｓ唔知賤內點解，其實一啲都唔出奇。中國人嘅謙稱可謂五花八門，但係大部分都已經過晒時，咁嘅老八股嘢，睇怕要我地呢啲已經晉身古董級別嘅老人家先會識囉。台灣我唔知，不過嘅香港，呢啲嘢學校應該冇教。我自己就因為睇得粵語殘片多，所以先識得一啲。而家呢輩人事事不求甚解，又唔識觸類旁通，就算接觸過呢類老餅嘢，都未必分領會到其中細微分別。好似大Ｓ咁，就錯誤自稱賤內，其實呢個詞只適用於男人對第三者提及自己老婆囉。

除咗賤內，男人對老婆嘅老餅謙稱仲有拙荊、荊妻、內人、內子。至於女人要提到自己，亦有另一套用語。一般嚟講，可以用奴家或奴奴。上咗年紀嘅就用老身。唔想太老土嘅可以用小妹或小女子。已婚女人就用妾身，如果好似大Ｓ咁，對個賤字情有獨鍾，當然可以用賤妾啦。

大Ｓ用錯稱謂，本來都好平常。我自己寫嘢就成日白字連篇，根本冇乜資格批評人地。我睇唔順眼嘅，唔係佢用錯詞，而係喺呢個年代，居然仲有女人會自甘作賤。

嗰啲對妻子嘅所謂謙稱，全部都係男尊女卑時代嘅產物，都帶有性別歧視成份。就算係比較中性嘅內子同內人，都係建基於男主外女主內嘅傳統觀念，已經不合時宜。至於拙荊同荊妻，亦帶有卑微含義，不過聽起嚟都起碼文雅啲。最頂唔順係賤內，個人覺得，呢個詞已經超出咗謙遜嘅範疇，根本就帶有侮辱性。賤字令人聯想到嘅冇一樣係好嘢，例如淫賤、下賤、賤格、賤種、賤精，要謙都唔使謙得咁過火啫。

講番大Ｓ，等我醒吓佢啦，以此女子智慧，自稱愚妹就最適合不過嘞。又或者，以佢嘅年齡，用老身亦未嘗不可囉。

講真，大Ｓ只係一個以美貌為賣點嘅藝人，對佢嘅要求自然唔可以太高。反而某啲揸筆揾食嘅所謂才子，都犯咗同樣嘅低級錯誤，咁先至令人側目。有本地金牌填詞人，喺歌詞寫男人向女人求婚，竟然用咗「做我內子」。首詞仲有唔少其他騎呢地方，之前已經寫過，喺呢度就唔再提嘞。欺世盜名之人多如天上繁星，本來都冇乜特別。奇就奇在首詞竟然人人讚好，仲獲獎無數添。

咪住，諗諗吓，才子首詞可能真係冇問題，話唔定係我自己嘅理解能力唔掂喎！上面段新聞有句嘢好精警，「沒知識要有常識，沒常識要懂得閉嘴」，睇嚟小弟都係及早封筆為妙喇！

補充：圖中女子並非拙荊，實乃他人之賤內也！

Sankaber, Ethiopia

跌眼鏡

今屆垃圾會選舉第一次可以投兩票，點知命中率只得50%，真係有啲失望。不過咁都唔算跌眼鏡嘅，因為兩票都係參考民調，揀咗形勢落後嘅候選人。點知劉華喺超級區議會果然墮馬，所以咪冇得全中囉。

講真，選劉華係基於形勢判斷，其實我最想揀嘅係白姐姐。所謂爛佬怕潑婦，白姐姐正正就係癲狗長毛呢類議會垃圾嘅剋星。講嗌交，白姐姐牙尖嘴利，絕對唔會輸蝕。講暴力，班垃圾肯定無用武之地，斷估佢地點都唔敢打阿婆啩。不過白姐姐出線機會微乎其微，我當然唔會嘥咗手上神聖嘅一票啦。至於閒姐同李衛鯨，民調話佢地形勢大好，我亦唔需要幫人地錦上添花啫。諗嚟諗去都係投咗俾劉華，因為咁先最有機會阻止犯民攞到超級區議會第三席。雖然佢最後都係跑唔出，但係我仍然相信呢個策略係正確嘅。

好多民主派支持者俾人洗晒腦，以為民主選舉好完美，人人都可以揀到適當人選代表自己喺議會發聲。事實又係點呢，究竟有幾多人投票前真係有認真咁睇清楚啲候選人嘅政綱呢？相信好多人都係好似我咁，去投票嘅目的完全係唔想某啲人當選。至於所揀嘅候選人有乜政綱，反而唔係主要考慮因素。而且喺香港呢個極度分化又缺乏理性嘅環境，可能大部分選民都只會睇標籤同品牌，對候選人本身嘅能力同往績反而唔多理。好似國家旗喺新界西榮膺票王，究竟有幾多人係真心投佢一票嘅呢？如果唔係有魚弱微抬轎，啲人又會唔會捨國家旗而取高達呢？

弊嘞，越講越離題添，其實令我跌眼鏡嘅係另一個人囉。與其話一個人，不如話一條棍，因為條友的的確確係一條政棍兼搞屎棍。飯桶威可以當選，都唔知係天冇眼定人冇眼。而家乜嘢年代，條友竟然仲大搞文字獄，帶埋班嘍囉去我鋪頭搞事，真係忍得佢都食得蕉啦！

條友當選後好風騷咁接受電視台訪問，話自己成功當選係因為早著先機，識得喺中港矛盾呢個議題做手腳喎。冇錯，呢個問題確實值得關注，不過飯生究竟有乜對策呢？佢居然喺度火上加油，挑撥港人反中情緒，甚至無中生有，製造更多新矛盾，簡直唯恐天下不亂！好似我鋪頭用簡體字，條友都要管，竟然拖馬堵塞鋪頭門口，阻住人做生意。喺中國地方用中國法定文字，究竟何錯之有呢？咁都可以攞嚟搞，除咗話係一條搞屎棍，我都唔知仲可以點形容佢囉！

其實呢單嘢早前都寫過，我當時已經批死佢一定會參選今屆垃圾會。但係咁嘅貨色都可以跑出，我就點都估唔到囉。所以我喺文中講過，如果佢真係當選，我就俾個頭佢坐。所謂人無信不立，就算對啲政棍人渣，都唔可以講過唔算數。如果飯生嚟揾我算賬，我一定會大方咁亮出X頭，等佢舒舒服服坐落嚟！

Gangtok, Sikkim, India

估佢唔到嘅票屎

上篇講完票王，今次自然係輪到票屎啦。喺地區直選67張名單之中，就有19張得票唔夠3%，令到參選人連選舉按金都攞唔番。咪以為得票率咁低係因為輸蝕名氣，原來喺芸芸票屎當中，竟然不乏大有來頭之人，真係估佢地唔到！

得票率最低嘅係鼎鼎大名嘅事旦男，只有0. 1%（343票）。此人騎呢無比，榮膺票屎之最可以話實至名歸，當然唔會估佢唔到，估唔到嘅係佢居然會參選。本來條友咁鍾意出風頭，成日博上鏡，參選垃圾會一啲都唔出奇。但係大拿拿5萬蚊就咁掟咗落鹹水海，佢冇理由唔肉痛啫。條友冇提供到任何個人資料，唔知佢撈邊瓣。不過睇佢成日咁得閒狙擊事旦台，好似唔使返工咁，極有可能係嗰啲攞綜援嘅全職社運人士囉。咪住，唔通領取綜援人士參選垃圾會，一切競選開支都可以實報實銷？咪講笑，等我得閒打電話去選舉事務處問吓先，以備不時之需呀！

同樣係咁騎呢嘅仲有爭取包二奶刑事化嘅林依例，得票率0.37%（859票）。佢嘅威水屎就唔提嘞，費事幫人免費宣傳啦。林小姐咁鍾意曝光，當然唔會錯過呢個4年至有一次嘅機會，而且以佢咁有米，幾萬蚊濕濕碎啦。所以林小姐本人係絕對predictable，估唔到嘅反而係跟佢隊嘅幾個大男人。咪以為呢幾個男人係一般跟班貨色，其實佢地個個都衣冠楚楚、相貌堂堂架。好跟唔跟，竟然跟個成日俾人非禮嘅奇女子反包二奶。一來呢家嘢由男人搞完全冇說服力，而且同呢位奇女子行得咁埋，唔通佢地唔怕遲早會惹官非？

另外仲有「向地產商說不」嘅光頭仔，得票率1.29%（6031票）。講到騎呢嘢，呢條友比起以上兩位實在不惶多讓。佢同地產商有不共戴天之仇，誓要打倒地產霸權，但係就走去選垃圾會，咁唔止騎呢，直頭係腦殘添。如果真係當選，佢嘅薪津就會由公帑支付，其中有好大部分正正係來自政府嘅賣地收入同地產商繳納嘅稅款。唔通佢收咗呢啲錢仲會食得落飯、瞓得著覺？我唔期望佢會識得「不食周粟」點解，但係乜嘢叫做不義之財應該知喇啩。條友腦殘當然唔使估都知，我估唔到嘅係佢嘅得票率竟然有1.29%咁高。由此推斷，佢喺全港嘅腦殘粉屎可能超過9萬，絕對諗起都覺得恐怖！講真，香港政客個個老奸巨猾，政治呢家嘢根本唔啱光頭仔呢啲咁天真無牙嘅小朋友玩。見佢俾人沒收咗5萬蚊咁慘，就等我點佢一條財路啦。既然佢咁鍾意去啲落後地區體驗生活，不如將有關見聞心得結集成書，出番本「腦殘遊記」。如果每個腦殘粉屎都買一本，咁就發達啦！

最後呢件就真係極品喇，唔止芳容令人不敢迫視，稱號更足以鎮慑一切牛鬼蛇神。有「民主女神」美譽嘅痰香聞，得票率1.91%（5440票）。對於痰小姐落選，我當然唔會感到意外，原因早排已經講過，喺呢度就唔再提嘞。不過點都估無到佢嘅得票率竟然會咁低，連2%都唔夠。九龍東只有9張名單參選，其中仲有一張係可以無視嘅騎呢女俠，所以按合理推算，要攞到接近12%先算合格。如果根據我地嗰代嘅評核標準，痰小姐嘅成績都應該屬於擔梯喇啩。佢係前度垃圾會議員，就算冇政績都起碼有名氣啦，但係參與直選竟然可以輸得咁肉酸，真係令人跌晒眼鏡。講真，都唔知當初佢個議員係點選番嚟嘅囉。咪住，唔通佢今次係忍辱負重，參選嘅真正目的係要證明俾全港市民睇功能組別選舉有幾荒謬？忽然諗起，其實國家旗同佢真係好相似。佢地都係前垃圾會議員，都係任內無政績可言，都係做咗一屆就俾人趕走。仲有最緊要嘅一點，佢地都係同狀棍黨有政治聯繫。但係點解喺今次直選，一個可以榮膺票王，而另外一個就淪為票屎呢？除咗話同人唔同命，應該仲有其他因素嘅。如果痰小姐冇退黨，而梁黨灰又肯幫佢抬轎，好可能肥雞都會變鳳凰囉。究竟荒謬嘅係功能組別選舉，定係民主嘅地區直選呢，咁就要留番俾大家自己諗喇！
 

Matopo Hills National Park, Zimbabwe

無啦啦票王

今屆垃圾會選舉曲終人散，最觸目嘅係產生咗兩位票王。喺全港67張參選名單之中，只有兩張得票超過7萬，遠遠拋離其他對手同非對手，都可算鶴立雞群。

陳總舵主同國家旗分別喺香港島同新界西出選，結果雙雙高票當選，榮膺新一代票王。呢個賽果當然一啲都唔出奇，因為背後有兩位重量級人馬幫佢地抬轎。至於抬轎嘅陳熟妝同魚弱微雙雙出局，其實亦係意料中事，怪只怪班狀棍太大貪囉。今屆參選名單眾多，可謂七國咁亂，要喺一張名單有兩件出到線，根本就難過登天。再講，就算抬轎嘅係重量級人馬，都要睇吓坐轎嘅係邊個。如果係抬隻馬騮，咁就未必所有選民都會buy喇。而家好啦，兩個抬轎嘅都出唔到線，仲累到喺新界西出選嘅高達冚家墮馬添。

歸根究底，都係狀棍黨嘅策略太進取。陳熟妝嘅江湖地位同魚弱微始終爭好遠，由佢喺香港島抬轎，實在係力有不逮囉。如果倒番轉，由魚弱微喺香港島抬陳總舵主，贏面就高好多嘞。不過由陳熟妝喺新界西抬國家旗，雙雙出線嘅機會就幾乎等如零囉。

如果喺嗰兩區都分拆兩張名單出選，咁又會點呢？結果亦好肯定，只有魚弱微同陳熟妝可以當選。咁都係得兩席，不過高達就未必會出局嘞。

究竟有冇辦法可以提高贏面，而又唔使累街坊呢？其實都有嘅，但係就要某啲人犧牲少少嘞。由魚弱微喺香港島抬陳總舵主，陳熟妝喺新界西出一張名單，而國家旗就選番功能組別，咁幾乎係坐三望四嘅格局。當中最弱一環係國家旗，本來佢應該唔夠良家騮揮，不過近期反國教單嘢搞到咁激，唔多唔少都會對佢有啲幫助。好似莫奶光咁，都重奪公能組別席位啦。國家旗要喺醫學界組別勝出，雖然難度仍然好高吓，不過都唔係完全冇可能啫。

呢個策略嘅整體勝算真係高啲，又唔使傷盟友和氣，咁點解狀棍黨仍然要冒險玩兩區抬轎呢？唔排除係某啲人懷有私心，唔想打硬仗囉。結果坐轎嘅兩位男士無啦啦做咗票王，真係想問佢地有何德何能。而抬轎嘅女士就雙雙出局，都算死有輕於鴻毛喇。魚弱微都算嘞，我諗佢其實都唔係咁想玩。陳熟妝先慘，踏入剩女之年至為男人犧牲，真係好唔抵囉！

Gelada baboon, Semen Mountain National Park, Ethiopia

美味晚餐

最憎一條友落街揾食，所以如果唔煮飯，我就會煮即食麵醫肚。雖然話係醫肚，不過絕對唔係求其食得飽就算。對於食，我仲有最基本嘅要求，就係要好味。琴晚就煮咗個泡菜三丸麵，影完張相仲係熱辣辣，加埋罐啤酒，真係人生一大享受！

雖然只係cheap嘢，成本不過大約10蚊（唔計燃料費），但係就絕對得來不易。所謂「不易」，當然唔係指烹煮過程繁複，以本人懶到出汁嘅性格，麻煩嘅嘢就咪搞嘞。事實上，呢件產品係經過無數次反覆試驗先得到最佳效果，真係算得上千錘百鍊囉！

材料其實好簡單，計有即食麵一個、泡菜適量、開邊牛丸、貢丸、花枝丸、豆腐卜各一粒。做起嚟亦相當方便，凍水落晒所有配料同湯粉，水滾落埋個麵，再煮兩三分鐘就掂。製作可以咁簡單而味道又好，完全係因為材料方面經過精心挑選同不斷嘗試。

首先，作為晚餐，植物纖維點都唔少得。呢樣先最難搞，因為雪櫃裏面唔可能隨時會有新鮮蔬菜，而啲急凍雜菜又鬼死咁難食，根本唔會考慮。咁啱有一年去泡菜國旅行，突然想起用泡菜就可以解決呢個問題。成罌泡菜放喺雪櫃可以儲存好耐吓，用起嚟又方便，完全唔使洗洗切切。只係齋食太鹹，用嚟煮麵就啱啱好嘞。

至於其他配料，方便處理同儲存亦係首要條件，新鮮食材自然諗都唔會諗。罐頭之類，因為一次過未必食得晒，所以亦唔會考慮。已經調味、個頭適中嘅預製食品，諸如腸仔肉丸就最適合嘞。腸仔因為太唔健康，而且唔煎唔好食，未經輪選就已經出咗局。本來魚蛋魚片我都好鍾意，但係喺冰格雪過就會變得粗鞋無比，嚴重影響食味，試過幾次都係無奈放棄。最後選定牛丸、貢丸、同花枝丸，好食之餘，雪喺冰格亦唔會影響口感。一次過成斤買，然後開邊儲存喺冰格，都不知幾方便。事先開邊可以省卻解凍程序，直接喺冰格攞出嚟煮都唔怕中心部份唔熟。後來再加埋豆腐卜，雖然本身冇乜味，不過吸收咗啲湯汁都相當唔錯架。

當然啦，上述丸類絕對唔算健康食品，所以每種都只會用一粒。少食多滋味，多食壞肚皮，呢個道理我梗係明啦。不過最緊要都係唔好飲埋啲麵湯，否則鈉攝取量一定嚴重超標，命都短幾年呀！

提起麵湯，先發覺原來唔記得講個麵底，呢樣其實最緊要。即食麵我本身就鍾意，喺超市見到有新嘢都會買嚟試吓。結果都係覺得泡菜國品牌最好食，其中又以農心最啱胃口，雖然都係喺中國製造。除咗口感好，唔會浸吓就淋晒，調味亦相當唔錯。無論係石鍋拉麵、咖哩味、香菇味、鮮蝦味、辣白菜、抑或最基本嘅辛辣味，都同我精心挑選嘅泡菜三丸配料夾到無倫。

不過咁，味覺呢樣嘢好奇怪，會受心態影響。賤物未必唔好食，但係如果食得委屈，咁當然唔會欣賞到個中滋味。我就從來唔會同人比較，人地餐餐山珍海錯自然食得開心，但係我都好享受呢碗10蚊嘅泡菜三丸麵囉！

泡菜三丸麵

白色恐怖

好不幸，香港已經進入咗白色恐怖時代！23條都仲未立法，就已經有人用以言入罪嘅方式對異見者進行政治迫害，你話係咪好恐怖？！

琴日睇到單新聞，話有網民喺學民思潮召集人黃之鋒嘅facebook發咗條咁嘅留言：「你自焚吖，你自焚我就信你係真心為學童要撤回國民教育科」，之後仲對黃同學粗言辱罵添。跟住條友就即刻俾黃同學嘅粉屎起底，原來佢自稱由96年開始任職消防員。一眾黃粉屎除咗鏟到條友飛起，仲話佢咁講已經構成教唆他人自殺，「更稱已聯絡律師尋求進一步行動」。單嘢仲已經傳到消防處都知，條友可能會面對內部處分添。

首先，雖然本人唔認同黃同學嘅舉措，但係就絕對相信佢係真心，起碼喺呢一刻。再過多幾年，佢會唔會變成類似癲狗或者梁渣傑咁嘅政棍就唔知喇，不過我諗可能性都好大吓囉。

至於嗰位疑似消防員嘅言論，當然係難以服眾啦。不過好明顯，佢只係無聊同冇品啫。事實上，呢類人根本就無處不在，連鄙人微不足道嘅無聊blog都間中有啲蒙面人入嚟粗言辱罵。以黃同學近期咁勁嘅人氣，冇人踩場先怪啦。對啲咁嘅無聊留言者，認真嘅話，可以據理反駁。如果想展示量度，咪一笑置之囉，費事同啲人一般見識啦。換著係我，就一定會鏟到條友反艇為止嘞。但係要搞到人地受內部處分，甚至可能負上法律責任，咁又從何說起呢？

首先，無論你鍾唔鍾意都好，辱罵式言語暴力已經成為無可抗拒嘅本土文化。由大班嘅「狗官」開始，到顛狗嘅「不該」達至顛峰，言語暴力唔止深入民心，甚至已經等同言論自由，呢個係無可爭辯嘅事實。咁俾人鏟兩句又有乜大不了呢，都係意見表達方式啫，唔順咪鏟番轉頭囉。事實上，呢種言語暴力文化得以發揚光大，完全係因為某啲民主派政客同一班忠實粉屎能夠身體力行，將粗言謾罵帶到全港每一個角落，包括網上、街頭、甚至議會。自己鬧人就好地地，俾人鬧兩句就要打爛人地飯碗，甚至想搞到人地坐監，呢種究竟係乜嘢標準呢？

再講，對於一個三九唔識七嘅無聊網民，黃同學又有乜可能會認真考慮佢嘅自焚建議呢？教唆自殺云云，唔止係無限上綱，更係侮辱黃同學嘅智慧。如果咁都講得通，凸首同各高官、以至一眾保皇政客就真係好唔得閒，每日都唔知要俾人教唆自殺幾多次，叫佢地去PK死嘅人肯定唔會少囉。莫非只有黃同學可以享有人權，受到法律保護，而凸首、高官、保皇政客就個個抵死，所以教唆佢地自殺冇問題？

好明顯，單嘢根本就係以言入罪式嘅政治迫害！而由黃同學班粉屎搞出嚟，就更加得人驚，話就話爭取民主、捍衛言論自由，但係竟然講一套做一套！

報導冇提到黃同學有乜反應，唔知佢有冇參與粉屎嘅報復行動，但係佢肯定唔會對單嘢一無所知。希望黃同學可以制止班粉屎對嗰位疑似消防員嘅政治迫害，就算佢選擇袖手旁觀，咁都係等同幫兇！如果黃同學任由呢套鬧劇繼續上演，我對佢就真係好失望嘞，咁唯有對佢講聲：你yak jill啦！哈哈，如果我真係咁講，會唔會俾人話我教唆未成年人士進行不道德行為呢？

National Museum of Anthropology, Mexico City, Mexico

肥雞治港？

古語有云：小露露於野，大露露於市！

究竟露乜？當然唔係露體啦！想露體，梗係要喺鬧市露啦，如果喺荒山野嶺露，真係揾鬼睇咩！

而且，文章開頭冇加上警告語句，自然係講緊啲老幼鹹宜嘅健康嘢，而唔係露體呢啲咁重口味嘅另類行為藝術囉。

要露得健康，當然非露營莫屬。中學末期先第一次去露營，地點係大浪西。仲記得，夜晚坐喺沙灘，望住黑掹掹嘅海同黑掹掹嘅天，不禁驚嘆宇宙浩瀚，頓感神遊物外，差啲到達天人合一嘅境界添。幾十年後再諗番，都唔明點解嗰時會咁幼稚！

睇番而家啲中學雞，一樣係十幾歲人，但係已經識得「大露露於市」嘅道理，拉隊去政府總部露營。我地中學時代去露營，淨係玩埋晒啲小兒科嘢，好似煮吓公仔麵、唱吓「月兒像檸檬」。而家啲中學雞當然唔會咁幼稚，要玩就玩啲大鑊嘢，絕食唔在講，仲要當眾派個大檸檬俾新任凸首添。結果喺傳媒嘅鎂光燈大閃特閃之下，隻隻中學雞即刻變身成為抗拒強權嘅大英雄。真係諗極都唔明，究竟班中學雞係食乜嘢奶粉大嘅呢，竟然連毛都未出齊就咁有大將之風！

中學雞係香港嘅未來主人，俾個尿兜我做膽都唔敢對佢地嘅做法有任何質疑，真係前世未俾人批鬥過咩！不過以本人性格，唔揾啲嘢鬧吓就寢不安席食不甘味，咁唯有鏟吓另一隻雞啦。

今日睇日月報，喺中學雞露營單嘢版面，就見到條咁嘅標題：「三大政策同日公布 記協﹕霸新聞版位」。妓協主席麥肥雞「直指交津及賣地並非昨日非公布不可的議題，質疑政府以連串消息霸佔版面，『報紙版面、電視媒體air time有限，講了這樣就講不到另一樣，政府這樣為難傳媒，不是開誠態度』。」

係咪好搞笑呢？傳媒嘅責任係適時同如實咁報導每日收到嘅新聞材料，因為版面限制而要有所取捨，根本就係正常工作範圍，要靠佢地自己嘅專業判斷。麥肥雞竟然批評政府發放太多消息，咁唔專業嘅嘢都講得出，真係令人懷疑佢有冇資格做妓協主席囉。佢話「並非昨日非公布不可」，咁言下之意，係咪政府以後發布消息之前要諮詢咗妓協先呢？連政府嘅策略性部署都要干涉，莫非麥小姐覺得佢係幕後凸首，要實行肥雞治港？

記得隻肥雞早前先鏟過警方冇及時發放罪案消息，而家政府俾料傳媒佢又嫌，都唔知個婆娘係咪思覺失調囉！有個人立場唔係問題，亂發噏瘋都唔係問題，但係講嘢前後矛盾就失敗啦！

肥雞治港？發夢冇咁早！肥雞自講就差唔多！

Kars, Turkey

顏射、多P、施暴

警告：本文涉及成人題材，未成年人士切勿獨自觀看，敬希留意！

見到個咁嘅標題，大家係咪以為我講緊日本4仔呢？哈哈，當然唔係啦！日本4仔只宜私下欣賞，實在唔應該攞出嚟公開討論，因為一定會引起部分人反感。不過，如果喺某啲特定群組，參與者都有共同興趣，咁自然唔係問題。

其實要講嘅係科大迎新營嘅益智遊戲，琴日明報就列出咗呢幾個：

模仿飲尿遊戲
男生雙腿夾水樽站在花槽上，女生蹲地用口接住男生雙腿所夾水樽射出來的水柱，狀似口交或飲尿

毛毛蟲
男女生梅花間竹席地而坐，後面的學生以雙腿蹺著前方學生，形成一條人鏈「毛毛蟲」爬行，這玩法令異性容易觸及對方敏感部位

TAKE
在不脫褲子下，強行把新生內褲扯破抽出

講真，呢類迎新營益智遊戲根本唔算乜嘢新聞，年年都有人鬧，但係啲學生就年年照玩。今年之所以再見報，係因為有科大男新生懷疑不甘底褲俾人扯爛，竟然危站高處，搞到校方要報警。按情節推測，該男生應該係玩（或被玩）咗「TAKE」呢個遊戲。

想像一下，要喺唔除面褲嘅情況下，將底褲扯爛抽出，場面一定非常暴力。就算係日本4仔，都只會喺少數變態施暴場面先會出現囉。本人自問唔係手無搏雞之力，但係要我徒手扯爛條底褲，相信都有一定難度（我當然未試過啦）。遊戲參與者者有幾如狼似虎，真係可想而知。而且咁玩法，隨時會搞到瀨尿，甚至有可能傷及重要部位添。

講到「模仿飲尿遊戲」，我相信係模仿日本4仔嘅顏射場面至真。畢竟，飲尿實在太重口味，就算喺4仔裏面都唔係咁常出現。班學生都只係廿歲人仔，應該唔會玩到啲咁高階嘅嘢囉。

至於「毛毛蟲」，好肯定係模仿4仔裏面嘅多P接龍。當然啦，咁只係得其形而不得其神，因為多P接龍一定要全男班上陣先有意義。不過班學生又唔係真搞，冇乜所謂啦。

由是觀之，班科大迎新營搞手應該對日本4仔有相當認識。本人自問思想開明，絕對唔覺得咁樣有乜問題。班學生早就過咗合法性交年齡，連扑嘢都有自主權，咁睇吓4仔，再將其中精粹融入啲益智迎新遊戲裏面，自然唔算係乜嘢啦。

不過咁，凡事都要顧及別人感受，更要計算可能產生嘅不良後果。如果個個新生都覺得呢啲遊戲冇問題，咁當然係皆大歡喜啦。但係只要有一個新生唔like，咁就大鑊嘞，因為呢啲遊戲隨時會構成性騷擾。就算唔使惹上官非，對校譽亦會造成嚴重影響。相信好多人都會對有關遊戲相當反感，事實上，大部分社會人士都唔會好似我咁開明囉。接近廿歲人，已經成熟到可以搞學運社運，出咗事就唔可以用年少無知做擋箭牌架喇！

最後，我要俾個建議想入科大嘅同學：入迎新營記住要著紙底褲！一來預咗報銷，就算俾人扯爛咗都唔會肉赤。更重要嘅係一扯就爛，唔使受不必要嘅皮肉之苦！

補充：
如果有興趣，大家可以去以下網頁睇吓，裏面有好多相關迎新遊戲嘅相片。
科大淫亂迎新營玩人形蜈蚣 + 歷年荒淫事件簿

Pissing Boy, Brussels, Belgium

女神打救你！

好日唔搭吓邨巴出街，琴日一搭就遇到驚慄場面，嚇到魂飛魄散，搞到差啲冇命返屋企！大家唔使幸災樂禍住，唔係發生乜嘢交通意外，不過驚嚇程度就同九車連環相撞有得揮囉！

話說邨巴去到鬧市遇到塞緊車，正係行不得也哥哥。無聊之際，見到隔籬有架小巴都係塞到唔郁得。再睇真啲，就發現小巴車身有個廣告，寫住雞乸咁大嘅八隻字：「民主女神重返議會」，仲有某知名女子嘅肉照添。究竟有邊位女子可以令睇慣恐怖片嘅我都嚇餐死呢？哈哈，之唔係前垃圾會議員痰香聞囉！

講番張相，大家唔好誤會，並唔係啲乜嘢導彈警鐘之類嘅物體。事實上，呢類物體亦唔會令我嚇破膽囉。張「肉照」其實係痰小姐嘅大頭相，而「肉」係指終極橫練嘅面部肌肉。

喺度要澄清一下，本人係「平等機會」支持者，當然唔會攞痰小姐嘅無鹽之貌嚟大做文章。俾痰小姐嚇親，其實係因為佢嘅金面罩功夫，簡直已經練到刀槍不入水火不侵，絕對可怖可愄！佢竟敢以「民主女神」自居，面皮之堅厚，都可謂舉世無匹喇！

大家知啦，封痰小姐做「民主女神」，其實只係啲傳媒同好事之徒嘅揶揄戲謔。但係佢竟然唔自我反省，仲使出一招「女神借箭」，將呢句笑謔之詞攞嚟做宣傳口號，本人真係服到佢五體投地！

老實講，我就諗唔起痰小姐對香港民主發展、或者喺佢所屬功能界別方面有乜建樹嘞。不過咁，又唔可以話痰小姐一無是處，因為佢起碼識捉蟲。捉乜蟲？哈哈，之唔係捉甘奶威呢類咁嘅老淫蟲囉！

如果邊位屋企附近有色魔出沒，又或者成日俾人性騷擾，女神一定可以打救你！就算冇呢啲情況，女神一樣會打救你，不過「救」字就要讀第一聲嘞！

住喺九龍東嘅朋友，女神可唔可以重返垃圾會打救港人，就要睇你地點用手上神聖嘅一票喇！

Temple of Hathor, Dendera, Egypt

喜見飛魚

一向對體育節目冇乜興趣，但係每四年一次，都會捱更抵夜黐實部電視，睇到不眠不休。唔知點解，同一樣嘅運動比賽，喺奧運睇硬係覺得特別過癮。

今年奧運真係有個好開始，第一日就出現咗令人興奮嘅場面。孫楊喺400自奪金，實現咗中國男子泳隊喺奧運嘅「零的突破」。見佢喺決賽打敗死敵，牙斬斬嘅泡菜仔朴泰桓，直頭睇到笑咗出嚟。難得孫楊仲幾靚仔添，唔似得朴泰桓咁，橫睇掂睇都係薯仔一件！

我一向唔係啲乜嘢國家民族主義者，但係見到中國人有成就，都會覺得開心。事實上，孫楊憑努力登上頒獎台，贏得光明正大，相信冇人會有合理理由作出負面評語。不過香港真係乜人都有，竟然有掃蝗義士唔抵得，即刻喺網上發功。

琴日喺網上睇到一段題為「朴泰桓揚言200自挫孫楊」嘅新聞，就有網名叫「Pamaalldead」嘅死剩種發咗條咁嘅留言：「加油, 桓仔, 勿讓蝗虫為禍」。要說明一下，我唔係黑心到要咒條友冚家Ｘ，其實係佢自己洩露身份囉。「Pamaalldead」即係「爸媽死晒」，咁條友仲唔係死剩種？

本來基於體育精神，就算為泡菜仔打氣都唔係問題，不過硬要扯埋蝗蟲嚟講，我就睇唔過眼嘞。人地係憑實力攞到塊奧運金牌，對香港又有乜禍害呢，唔通咁都會搶咗港人嘅資源？啲所謂熱愛民主嘅廢青，水平由此可見一斑！五年後普選凸首，我又一票，啲咁嘅腦殘人士又係一票，我真係有啲唔順囉！

Abraham Holly Pools, Sanliurfa, Turkey

精子識飛

警告：本文涉及成人題材，未成年人士切勿獨自觀看，敬希留意！

貞子喺電視同手機爬出嚟，已經搞笑到趴街啦，真係佩服啲蘿蔔頭諗得出！不過更搞笑嘅都仲有，話精子識飛，想像力又係咪太豐富咗啲呢？早幾日喺日月報睇到一段爆笑新聞，先知道原來想像力竟然係源自無知，都咪話唔得人驚！

【明報專訊】上海一對夫婦結婚後多年不育，為查清男女哪一方身體有毛病，早前到婦幼醫院檢查。醫生檢查發現，女方居然還是處女，經詢問得知，該對夫婦以為「精子可以飛來飛去」，結婚後睡在一起就會懷孕，令醫生哭笑不得。（新民晚報）

睇完段新聞，心裏面不禁有個疑問。唔通呢對夫婦一直以嚟都係生活喺伊甸園，仲要係冇蛇冇蘋果樹嘅伊甸園？報導話個女人仲係處女，好明顯佢地從來都冇搞過嘢。除咗未俾條淫蛇引誘嘅阿當同夏娃，真係想像唔到世上仲會有咁純潔嘅成年男女囉！

至於佢地唔知道要做愛先有仔生，以為精子識飛來飛去，當然係上海嘅性教育出咗問題，不過更大嘅問題肯定係源自對夫婦本身。佢地直頭好似不食人間煙火咁，唔通幾十年嚟從來都冇睇過鹹書或者4仔，甚至連街邊嘅無媒狗合都未見過？就算佢地真係白過白紙，但係結婚咁多年，都冇理由未見過大家嘅身體啫，有乜可能唔知道對方有樣嘢同自己夾到漏晒油呢？一啲探索精神都冇，真係上帝都幫佢地唔到啦！

諗深一層，其實單嘢都唔關性教育事，呢啲嘢使鬼人教咩！所謂「食色性也」，搞嘢從來都係動物嘅本能，唔通呢對夫婦連聖人之言都冇聽過？如果要教先識做，睇怕地球上根本就唔會有高等動物囉！

當然啦，為防啲細路太有探索精神，動不動就亂做實驗，正確性教育始終係有需要嘅。不過亦有人反其道而行，致力推行反面性教育。例如某權威組織就叫人唔好自慰，因為咁係不道德嘅行為。又有人強烈反對避孕，話唔想生就咪做。冇咁激嘅做法都有，就係斬腳趾避沙蟲，將性事極度簡單化。仲記得九十幾年前睇過一套粵語殘片，正正就係咁嘅例子。

因為實在太耐，成套戲係點已經冇乜印象，淨係記得其中一段情節。話說扮成男裝嘅女主角同身為將領嘅男主角喺軍營邂逅，兩人一見如故，都不知傾得幾投契。可惜歡樂時光過得特別快，眨吓眼已經天黑，男主角就邀請女主角到自己嘅營帳共度一宵。心邪嘅你一定以為男主角睇出對方係女扮男裝，想乘機咗佢。咁就錯嘞，其實男主角根本睇唔出女主角係女人，只係覺得同佢好啱嘴形，想同佢聯床夜話，秉燭談心啫。營帳裏面發生嘅嘢，套戲當然冇交代到，之後男女主角就各散東西嘞。跟住女主角竟然有咗，仲連仔都生埋添。到後來男女主角意外重逢，男主角竟然唔知發生過一單咁嘅香豔事件。

真係離晒大譜，你話咁嘅情節係咪教壞細路？男女同床夜話竟然搞出人命，有冇人會信就唔知嘞，不過我就覺得荒謬到無倫囉。本人細細個已經有分析能力，識得獨立思考，唔會好似而家啲大中小學雞咁頭腦簡單，人講乜就信乜嘅。根據劇情分析，男主角明明以為女主角係男人，都仲要半夜搞人地，當然係另有圖謀啦。要玩斷袖分桃，但係又前後不分搞錯地方，究竟係男主角白痴定係導演當觀眾白痴呢？不過既然劇情冇交代到當晚營帳裏面嘅情況，其實係女主角採取主動都有可能。無論係邊個搞邊個都好，咁都係違反咗作為朋友嘅誠信，利用對方對自己嘅信任而乘機佔人地便宜。我話套戲教壞細路就係呢一點嘞。

當然啦，啲頭腦簡單嘅小學雞未必會諗得咁深入，佢地睇完套戲，可能真係相信男女瞓埋一齊就會搞出人命囉！哈哈，會唔會嗰對上海夫婦都係細個時睇得太多滬語殘片，所以先以為精子識飛呢？

71假大空

呢排忙於執相，直頭執到天昏地暗日月無光，搞到連鬧人都唔得閒添。不過睇見今年嘅71遊行，完全係一場假大空鬧劇，咁就真係忍唔住，百忙中都要抽時間鬧吓嘞！

假，好簡單，班友根本就係假民主。

71當日，遊行隊伍高舉住捍衛民主嘅旗幟，浩浩蕩蕩操過銅鑼環。途中就發生咗一段小插曲，有十幾個人竟然唔識死，攞住支持新凸首嘅橫額插隊。辜勿論佢地係咪喺唔適當嘅時間地點做唔識當嘅嘢，但係喺呢個標榜言論自由嘅場合，相信亦冇人可以提出合理嘅理由阻止佢地。不過在場遊行人士根本唔使提出乜嘢理由，就即刻喊打喊殺，圍兇呢十幾個人。最後佢地被迫收起支持震鷹嘅橫額，先至唔使俾人打。又有一個70歲阿伯，攞住自製嘅紙板支持震鷹，結果連紙板都俾人搶埋。

71嘅銅鑼環竟然變成民陣嘅專屬示威區，異見人士完全禁止踏足。所爭取嘅言論自由原來只適用於一種聲音，遇到唔同意見就用恐嚇、甚至暴力手段打壓。總之人多勢眾就係王道，大聲夾惡至係真理。老弱傷殘就最好蝦，因為佢地冇反抗能力。唔通呢啲就叫做民主？有冇人敢企出嚟確認吓呢？

哈哈，當然有啦，仲有好多添，71當日就有40萬人企咗出嚟示範乜嘢叫做民主啦！

大，仲簡單，即係作大。

民陣話今年遊行人數有40萬，警方就話有6.3萬，真係大纜都扯唔埋。其實雙方各有主觀政治立場，公布嘅數字未必可信，都係參考番中立人士嘅調查比較有個譜。今年就有兩位學者做咗獨立統計，得出嚟嘅結果分別係7萬至9萬同9.8萬至11.2萬。將學者公布嘅數字攞個平均，得出9.25萬，再打個8折，就係7.4萬，竟然同警方嘅數字好接近。

點解要打8折？咁就要聽我分析吓嘞。啲學者根本唔敢得罪民主派，所以統計好可能會採取宜鬆不宜緊嘅態度。而且幫佢地數人嘅學生，10個有11個都係支持爭取民主嘅熱血青年，受主觀意願影響，點算時會不自覺數多咗都唔出奇。

就算唔buy我嘅8折理論，用番9.25萬，咁都已經證明咗民陣作大作到離晒罩啦！其實民陣年年玩作大，個個都已經習以為常。不過今年除咗作得特別大之外，仲揭示咗一個好得人驚嘅真相：香港原來有好多盲目同愚昧嘅人！

今年民陣係等警方同兩位學者出晒數字，佢地最後先公布。班友睇到警方同學者嘅數字，都仲敢話有40萬，即係表示佢地有信心無論作到幾大都有好多蠢人會信，事實亦證明真係咁。不過我就好鄙視呢班友嘞，唔係因為誠信問題，而係睇唔起佢地咁細眉細眼。既然香港有咁多蠢人，點解唔再作大啲呢，不如作夠800萬啦，700萬香港市民再加100萬由內地落嚟撐場嘅自由行，你慌冇人信咩！

單嘢後來仲引發咗一場小風波，有熱愛民主嘅人士因為不滿有關學者「報細數」，不斷用電話同電郵滋擾人地。真係搞笑，班友之前先因為中方「干預學術自由」而力撐呢位學者，但係轉個頭就將自己最珍惜嘅學術自由當狗屎咁踐踏。呢種輸打贏要嘅無賴行為，正好印證咗我話班友係假民主嘅講法！

空，係指班友腦空無物，淨係識空嗌口號，一啲理性思維都冇，全無建設性可言。

睇番遊行人士嘅訴求，不外乎以下呢啲：平反六四、徹查李旺陽事件、凸首同所有高官即刻下台、所有舊嘢唔准拆、所有基建唔准搞、土地唔准賣俾地產商，只可以起公屋居屋、自由行唔准嚟、做生意嘅唔准賺錢、工資要由工人決定，加到佢地滿意為止。

首先，六四同李旺陽事件絕對唔係香港人嗌幾句口號就掂，中央仲有好多政治考慮。不過香港人要嗌亦無妨，呢啲始終係言論自由。但係因為呢兩單嘢而否定大陸嘅一切，甚至搞全面對抗，就係因噎廢食，完全不切實際嘞。

至於其他訴求，一句講晒，只會令香港停止運作。如果真係順應民意，睇怕香港要時光倒流到前殖民時期，變番做漁村先得囉。咪住，全民捕魚會嚴重破壞海洋生態，啲環保人士一定反對。咁唯有變身做農村啦，仲要係100%有機耕作嗰隻添。到時人人自給自足，過住環保嘅綠色生活，又唔使再俾啲無良奸商剝削，社會自然可以達至真正和諧啦！

學陶淵明歸園田居，咁又真係幾過癮喎！哈哈，不過都係唔好預我嘞，如果香港有咁嘅一日，我寧願移民去阿老阿土囉！

Llama dolls, Peru

Pyramid of Khufu, Giza, Egypt

Lake Titicaca, Puno, Peru

黑仔

今日真黑仔，無啦啦整親條腰！

頭先去P街超市，諗住買幾件濕碎嘢。但係經過餐酒區，見到做緊特價，買滿6枝有85折，有啲飲開嘅牌子仲有特別優惠，打孖買再平一大截。我喺P街從來唔會買正價餐酒，一定等佢做特價先買，因為隨時會平一半有多。咪講笑，即刻推番架車仔出去超市入口，加多個購物籃準備掃貨。

唔使五分鐘已經掃咗廿枝，諗住今日都夠皮嘞，咁咪推住架好重嘅車仔去找數囉。點知行咗兩步就俾個肥仔職員叫住，話打孖優惠啱啱冇咗嘞。佢話講定俾我知，費事出到去收銀處先拗數喎。見佢手上揸住一大疊黃色紙仔，原來係喺度換緊價錢牌。

P佢個街吖，更新價錢有乜理由喺呢個時候做架，梗係應該預先搞掂，喺收鋪後或開鋪前做啦！真係俾佢吹漲，淨係得85折，我做乜要買啫！已經谷鬼氣，我當然唔會逐枝酒幫佢放番上架啦，咁咪成籃放喺地下算囉。點知咁就出事嘞，捧起個籃嘅時候竟然整親條腰。

而家一彎腰就痛，被迫挺直腰骨做人，真係俾P街害得慘喇！

Bulawayo, Zimbabwe

Sankaber, Ethiopia