2014年9月30日星期二

致佔中三子及教協決策者

致佔中三子:

本人絕對唔認同你地嘅理念同抗爭手段,亦從來冇授權你地代表我!唔該你地唔好成日扮晒民意代言人,唔係所有香港人都支持你地架!

你地強佔公眾地方,破壞香港安寧,咁做唔止違法,亦剝奪咗其他人使用有關地方嘅權利,對住喺附近嘅街坊更造成嚴重滋擾。呢樣嘢唔可以同民主拉埋嚟講,唔該你地查吓有邊啲民主國家可以任你鍾意佔邊忽就佔邊忽先啦!

因為你地違法在先,警方多番勸喻無效先採取行動驅散非法集結嘅群眾,咁係維護法紀,試問何錯之有?本人絕對支持警方依例執法!你地譴責警方使用大殺傷力武器(lethal weapon),分明係屈得就屈,唔屈得都照屈。請問警方使用催淚氣體殺傷咗你地幾多位佔中義士呢?參考番你地推崇備至嘅歐美民主國家,使用催淚氣體已經唔算係乜嘢武力,唔好話俾我知你地未見過人地嘅警察將啲示威者當豬咁拖、當狗咁扑囉!話警方使用大殺傷力武器,你地而家當咗自己係小布薯?!

你地承認「公民抗命」唔可已迫使中央改變立場,而家又要求CY落台,話咁會解決到好多問題。究竟你地係思覺失調定腦積屎?就算CY辭職,由林鄭頂上,都根本冇可能俾到你地要求嘅「真普選」,跟住你地係咪又要林鄭落台呢?其實,你地嘅真正目的係咪只想搞到香港進入無政府狀態?

你地呢班屎一樣嘅人,搞埋晒啲屎一樣嘅嘢,根本就幫唔到香港人爭取民主。你地只會令香港越嚟越亂、越嚟越分化,迫我地呢班向來奉公守法、以和為貴嘅香港人企出嚟向你地大聲say no。琴日旺角就有駕駛者懷疑因為要取回道路使用權,駕車駛過被示威者強佔嘅馬路而造成混亂。有朝一日,香港變成泰國翻版,絕對係你地一手做成!

搞到香港冇啖好食,相信除咗你地幾條P街,根本就冇人得益。你地班支持者腦筍未生埋以至受人蒙騙,咁都可以話係咎由自取。我地呢班奉公守法嘅香港人先無辜,明明唔支持你地嘅做法,但係就要承擔埋你地造成嘅惡果。按合理推測,香港起碼有四成人唔認同你地嘅違法行為,而你地就將全港市民拉晒落水,當成政治籌碼,咁究竟算係乜叉民主?唔好講乜嘢官逼民反,全世界所有恐怖分子都係用呢個藉口為自己開脫架啦!其實你班P街根本同恐怖分子冇分別!


致教協決策者:

你地呼籲全港教師罷課,將政治鬥爭帶入校園,本人十分反感!

如果你地淨係呼籲大專院校教師罷課,本人都唔會出聲,畢竟大專學生已經成年,佢地應該有能力判別教師罷課係咪適當。而家你地連啲中小學雞都搞埋,本人就絕對唔同意!如果你地認為中小學雞已經成熟到可以理解複雜嘅政治鬥爭,點解你地唔順便幫佢地爭取埋選舉投票權呢?

而家絕大部分國家都將合法投票年齡定喺18歲,咁係因為青少年思想未夠成熟,而且涉世未深,容易受人唆擺同操控。作為專業教育人員,你地冇理由連咁都唔知啫!而家你地將班中小學雞拉埋落水,分明係想利用啲細路做人盾啦!

「我睇開陳奕迅演唱會, 你無啦啦叫我去睇林峰!」以上曾經傳頌一時嘅民主金句,唔知你地仲有冇印象呢?學生原本上開化學堂,而家無啦啦迫佢地聽公民教育,你地唔覺得有問題咩?!仲有,教書嘅最鍾意跟團旅行,你地應該好清楚行程一定要跟足行程表,雖然先後次序或可斟酌。如果要改行程,無論係旅行社抑或團友提出,都一定要全體團友同意先可以。同樣道理,你地要將化學堂改為公民教育課,事先亦應該徵得所有學生同家長同意。你地冇問過學生同家長就罷課,根本就係粗暴剝奪學生正常上課嘅權利,亦好有可能違背部分家長嘅意願。口口聲聲話爭取民主,但係就完全唔尊重別人嘅選擇權利,究竟你地仲有冇資格為人師表呢?!

如果有教師因為任何原因唔想授課,就應該循正當程序攞事假。而家民主白色恐怖氣氛瀰漫,相信校方唔會唔批,亦唔敢秋後算帳。你地硬係要搞埋啲學生,利用佢地做掩護,真係是可忍熟不可忍!

作為教師,你地應該幫助學生培養獨立思考能力,而唔係夾硬將自己認為正確嘅嘢塞晒俾佢地。今日教出一班只要自己認為正確就去做而完全唔顧別人感受、唔理後果嘅學生,你地遲早都會自嘗惡果。有朝一日,當你地俾自己一手訓練出嘅紅小兵文革式批鬥,我會食住花生睇得好開心囉!


後記:

今日去買餸,經過燒臘檔忽然想食叉燒,點知唔覺意俾我聽到啲「消失的民意」。叉燒佬一路斬一路同隔離油雞佬講:「班友搞到香港立立亂,嚇到班有錢佬撤資你地就知死!」入到街市,發現檔販都如常營業,竟然唔見有人響應罷市。經過魚檔又有嘢聽,魚佬同對面菜佬講:「警察一早就應該拉晒班帶頭搞事嘅XX啦,而家姑息養奸嘞!」咁就證明唔係只得我一個反對佔中啦。但係好奇怪,傳媒只係集中報導佔中人士嘅訴求,間中加插少少建制派政客嘅另類言論,而民間嘅反對聲音竟然一啲都聽唔到。連專做自由人生意、受影響最大嘅旺角藥房老闆都話支持佔中,真係估佢唔到囉!究竟係啲傳媒喺民主白色恐怖氣氛下唔敢得罪班佔中大帝,定係啲前線記者同編輯受為主觀使命感驅使而filter晒所有反對聲音呢?

言歸正傳,一行出街市,後頸忽然有啲濕濕地嘅感覺。弊嘞,唔通俾和平鴿空襲?抑或係有人喺後面向我放飛劍?跟住就聽到天雷滾滾,蠶豆大嘅雨點紛紛灑落。我心諗,好吖,既然相持不下,就等老天爺做個裁決,睇吓邊個會俾雷劈。究竟俾天收嘅會係助紂為虐嘅香港警察,定係捍衛民主嘅佔中義士呢?

哈哈,其實雷公劈邊個都好,基於香港民主派「公我贏字你輸」嘅遊戲規則,責任都係落喺香港政府度囉!劈死警察當然係佢地罪有應得,如果劈死佔中義士,就一定會入埋政府數,因為係政府迫佢地走去佔中架!香港民主派最叻就係自欺欺人,真係雷公都劈佢地唔醒!

Cow dung, Udaipur, India

Pigeon dung, Udaipur, India

11 則留言:

  1. 幅三屎相,比三個 like !

    回覆刪除
  2. 暴民佔中,香港告終,
    暴民流氓,禍國殃民。

    回覆刪除
  3. 我都憤怒!唔係講笑,我希望中央收回香港治權,港人根本治不好香港,港人中的漢奸比數也是全國最高!

    而教協?我早退會了,根本就係個賣國賣港組織!

    回覆刪除
  4. 遲早民意會轉向!發現遍地開花原來令自己遍體鱗傷!

    回覆刪除
  5. 匿名君:
    歡迎光臨!其實大家都應該出聲囉!

    匿名君:
    歡迎光臨!哈哈,三個多謝呀!

    奕山:
    哈哈,押晒韻,好厲害呀!

    laulong,
    我反而想阿爺可以俾香港有「真普選」,更希望人渣傑之流可以當選,等班腦殘人士真正體會乜嘢叫做水深火熱!就算阿爺收回管治權,一樣會有人(當然唔會係佔中三屎,因為佢地肯定已經返晒祖家)繼續搞事,再嚟個64翻版就唔好啦!

    Coffee,
    我就冇咁樂觀嘞,一來反對佔中嘅人絕大部分都係比較低調,而且香港輿論俾啲傳媒操縱,有反對聲音都filter晒啦!

    回覆刪除
  6. 俾佢地做衰咗之後,咪又會賴以前嘅埋晒地雷呀染晒紅呀指揮唔到人做嘢呀之類。

    回覆刪除
  7. Arm:

    藥房老闆都支持佔中?你信唔信我信耶穌?嘻嘻!

    回覆刪除
  8. 我入藥房買嘢就聽見老闆大鬧,話要拉晒嗰幾個發起搞事嘅去打靶。(恕我轉述佢粗豪的說話)

    回覆刪除
  9. ""我反而想阿爺可以俾香港有「真普選」,更希望人渣傑之流可以當選,等班腦殘人士真正體會乜嘢叫做水深火熱!""
    不太認同,以前新世界大太子接棒主持,搞到鑊鑊金,前後兩次,桐叔叔都要死死氣出山兩大次救駕,賣資產保公司命,唉!跟你玩法,一個社會比呢d2打六做,會唔會救唔番呢?
    """我就冇咁樂觀嘞,一來反對佔中嘅人絕大部分都係比較低調,而且香港輿論俾啲傳媒操縱,有反對聲音都filter晒啦!""""
    我諗過,如果比佢地成功咗,可以冇篩選,咁,曾經出黎支持過"反佔中"既人,佢地手上既票會唔會要個d收黑金死廢物"埋單"呢?
    個人意見,只係討論討論,唔好笑我幼稚園小學雞 =.=!

    少留言

    回覆刪除
  10. eric,
    香港民主派的確最鍾意賴,人渣傑喺區選失利都賴蛇齋餅粽啦。不過激情過後,相信大部分香港人(除咗死硬反共或妄想港獨嗰啲)都會回歸實際,睇番普選出嚟嘅凸首究竟做到啲乜嘢成績。當然啦,呢個情況一定唔會發生,因為阿爺根本唔會俾香港有「真普選」,尤其是搞到而家咁嘅局面。

    佛爺 & Coffee:
    單嘢係喺是但台新聞睇到嘅,其實藥房老闆支持佔中都好易理解啫。藥房位處淪陷區,出得鏡接受訪問,老闆當然唔敢講反對佔中啦,唔通想連間舖都俾人燒埋咩!既然做唔到自由人生意,老闆只有兩個選擇,一係拉閘,一係開拓新客源。表示支持佔中,明顯係要討好班大帝,雖然佢地唔會買奶粉,但係咳藥水或者安全兔之類可能會賣多好多囉。講真,呢個老闆絕對係醒目仔嚟架!佛爺,如果教會有好多靚女等住你,你會唔會即刻還俗改投天主耶穌懷抱呢,哈哈!

    少留言君:
    歡迎光臨!任何一個泛民政客上台做凸首,香港只會即刻死囉!不過香港已經病入膏肓,與其苟延殘喘,都係死得痛快啲好!起碼咁都仲有個機會,有樣嘢叫做「置諸死地而後生」呀!有啲人真係唔死過就永遠唔會知道自己有幾天真架!當然啦,呢啲都只係幻想吓啫,以而家形勢嚟睇,阿爺幾強硬都做得出,根本唔會俾香港有「真普選」!

    回覆刪除