2012年12月22日星期六

十月懷胎

閉關三個禮拜,今日終於可以出關喇,因為我個私伙麻雀game嘅phase 1已經完成咗。所謂phase 1,係指流程部分,即係由洗牌開始,跟住摸牌、打牌、上牌、碰牌、槓牌、食糊、到最後計番,全部都搞掂晒。

唔係賣花讚花香,小弟嘅麻雀game比坊間產品更有彈性,可以提供到更多唔同選項。例如,用家可以自己揀由幾番起糊同最大打到幾番、可以選擇打唔打花、打唔打jackpot、可以揀傳統香港麻雀或者加入咗台灣牌元素嘅混合模式,甚至連每種牌幾多番都可以自訂添。為咗方便數牌,打咗出地下嘅牌又可以用唔同排序顯示。如果連排好嚟數都嫌太麻煩,仲可以㩒一個掣就睇到每一隻牌剩番幾多隻,唔使好似坊間啲麻雀game咁,數牌數到頭暈眼花。

當然啦,呢啲只係花巧嘢,並唔係一個麻雀game嘅核心部分。其實最難做係AI嗰part,即係點樣令到電腦識打牌。如果以需要花嘅時間嚟計,而家做咗嘅連十分一都唔知有未。不過作為一個programmer,見到自己嘅產品已經出咗個雛型,點都會覺得好興奮囉。就好似大肚婆走去照超聲波,個胎照出嚟明明似舊叉燒多過似人,但係就完全唔會影響到女人將為人母嘅喜悅。哈哈,而家本人嘅心情就係咁嘞!

講真,如果要同市面上嘅麻雀game比,鄙人嘅手作仔淨係graphics同animation已經輸九條街啦。不過咁,嚴人寬己係人類嘅天性,幫自己嘅出品打分自然會鬆手好多。又好似啲女人咁,明明生咗舊叉燒出嚟,都會覺得自己生嗰舊係世上最可愛、最美味嘅叉燒囉。

講返轉頭,雖然話最難搞嘅AI部分仲未開始做,但係咁並唔表示電腦只有捱打冇還手。而家電腦就好似初學打牌嘅人咁,有得上就上、有得碰就碰、冇黐冇搭嘅就打,基本上冇策略可言。不過如果手風順,一樣會有糊食囉。要靠運氣先有糊食就梗係唔掂啦,我嘅目標係要令電腦做到攻守俱備,仲要識睇牌路添。咁當然唔易做,而且,就算做到都會出現另一個問題。如果電腦變得太聰明,打親都贏,咁我自己就唔過癮啦。其實女人都係一樣,既希望阿仔聰明伶俐,但係又擔心如果佢太精叻就會唔聽教,下下駁嘴駁舌棧激死自己。

事實係,搞呢壇嘢真係有啲似十月懷胎,既辛苦又期待。話時話,十個月搞唔搞得掂,其實連我自己都唔知架。如果最後變咗石胎,又或者生出嚟嘅係鈍胎,咁就嘥心機捱眼瞓啦!

基本排序

另類排序

另類排序

一眼睇晒

加入台灣牌元素

電腦都有糊食

8 則留言:

  1. 嘩!認真夠勁!寫了幾多行指令?

    有個提議,不是搞笑,去申請專利好喎!港台麻雀一條龍!製造埋Android同iPhone apps,做埋Windows Surface app,咁你仲有積極性呀!

    回覆刪除
  2. 佛爺:
    到而家大約寫咗三千幾行啦,不過最辛苦都唔係寫,而係testing同debugging囉!至於呢壇嘢,純粹係搞嚟自娛,根本冇商業考慮,亦唔會有商業價值囉!

    回覆刪除
    回覆
    1. 咁又係,唔試清楚,容乜易電腦自己都打錯牌架!

      刪除
    2. 勁呀!program 都識寫…

      刪除
  3. 閉關多日了,睇嚟好用心呀,如果唔係唔會聯想到懷胎十月。

    回覆刪除
  4. 佛爺:
    話時話,打出去嘅牌唔係我揀嗰隻,初時真係試過架!

    詩白爾:
    哈哈,我都覺啲豬肉佬好勁架!手起刀落,又快又狠又準!如果換轉係我,左手一早就冇晒手指喇!

    Coffee,
    之前我打雀王會館都好用心架,點知最後都係爛尾,希望呢次唔會啦!

    回覆刪除
  5. 哇,厲害!

    努力,放上網,打低雀王會館,跟住坐喺度收錢 ^^

    回覆刪除
  6. laulong,
    哈哈,我呢啲純粹自娛嘅手作仔點攞得出嚟見人架,咪棧貽笑大方!

    回覆刪除