2012年11月17日星期六

奇牌

以本人嘅定義,奇牌係指少見嘅牌。大牌唔一定係奇牌,好似十三么咁,根本一啲都唔奇,琴日我就連續食咗兩鋪。

至於點至係奇牌,以下係三個實例:



呢鋪係傳說中嘅十八羅漢!呢種牌好罕見,莫講話食,之前就連叫糊都未試過,卒之琴日俾我遇到一鋪嘞。鋪牌嘅四個槓,有啲係先碰後槓,有啲係人地打俾我槓。其實最初我都冇留意,不過睇睇吓,見幾隻反轉嘅牌間得好整齊,先發覺係十八羅漢。鋪牌都算順利,中局開始已經碰晒叫單吊。碰完最後隻三萬,手上剩番東同紅中,諗咗一陣,都係打隻紅中出去。因為成鋪牌嘅主調係藍色,留番隻東比較順眼啲。點知隔咗兩轉,竟然摸番隻紅中(見圖),真係激到我彈吓彈吓。本人最唔信邪,諗都唔諗就飛走隻紅中。結果又揀錯,下家即刻跟紅中。最後鋪十八羅漢都係食唔出,俾下家食咗3番雞,原來佢揸住一對東做眼。算啦,唯有發揮吓阿Q精神,十八羅漢呢啲奇牌,叫到糊其實已經好難得架喇!



呢鋪牌只係清一色平糊,打出得8番,本來冇乜特別,奇就奇在過程順利到冇人有。鋪牌我做莊,開牌有9隻筒子,已經算幾靚吓。點知上家打得仲靚,佢打一隻我上一隻,過咗四個轉,已經單吊一筒。跟住下家仲即刻出埋隻一筒,結果一隻牌都唔使摸就有糊食。其實順利並唔係必然,如果揀錯牌上,就唔一定接得晒上家4隻牌架喇。始終,打牌除咗講運氣,牌章都好緊要囉!



清一色對對糊雖然有10番,不過都唔算係乜嘢奇牌。做牌過程亦冇乜特別,開牌8隻萬子,有3對。以本人作風,有3對就會做對對糊。其實打法唔係好正路,有牌唔上,生章牌死扣爛扣,熟章牌就算有黐都照打,總之不成功便成仁啦。結果幾經辛苦打到單吊,最後對家出銃。咁當然唔算好特別,奇就奇在竟然截埋下家鋪3番雞。都唔知點解,電腦特別鍾意玩截糊,3番雞截我10番都試過幾次。如果同下家叫埋同一隻牌,電腦就會玩自摸,真係俾佢吹漲!呢鋪截番電腦轉頭,你話係咪奇牌?!

7 則留言:

  1. 唉吔,原來咁樣叫十八羅漢,仲係奇牌,哈哈,我都試過一次,又係見每組整整齊齊反轉一隻才留意,可惜冇食出,我的不是清一色,當時仲諗如果食出,會唔會比混對高番呢!

    回覆刪除
  2. 唔明,因我唔係好識打牌:(

    回覆刪除
  3. 我都睇唔明十八羅漢,好複雜。

    回覆刪除
  4. 哈哈,我以為淨係校長至會寫打牌!

    回覆刪除
  5. Coffee,
    十八羅漢當然係奇牌啦,因為肯定難過十三么、小四喜、大三元,我打咗咁耐,都係第一次叫咋!

    Ebenezer,
    哈哈,唔識打牌,真係香港少見嘅好男人呀!

    佛爺:
    十八羅漢即係槓晒4坎牌,所以如果食糊就會有18隻牌。槓牌喺遊戲會以反轉一隻牌顯示,如果冇玩開麻雀game,真係會睇唔明囉!

    SKII,
    哈哈,校長當然係始作俑者啦,我會玩雀王會館,都係因為睇到佢寫咋!

    回覆刪除
  6. 哈哈,爭啲睇漏哩篇,我發覺雀王會館有個程式,就係你打隻牌出去(特別係番子),好快趣就會摸番嗰隻,十試八靈!

    回覆刪除
  7. laulong,
    哈哈,係呀,雀王會館真係有好多奇怪嘢架,等我揾日一次過寫晒出嚟先!

    回覆刪除