2012年11月10日星期六

雀王?千王!

雀王排行榜真係日日新鮮日日堅呀!長期佔據榜首位置嘅kkpang已經跌到落第三位,越戰越勇嘅Wongfanny就上到第二位,啱啱仲喺粒半鐘內打咗3000分,真係勁到無倫!至於早幾日先上榜嘅黃Sir,勢頭亦唔差,已經進佔第四位。

雖然冇上述幾位咁勁,但係自從上次公布過成績,本人亦稍有進帳,排名微升13位,去到37。而且積分已經突破20000大關,都算係一個小小嘅里程碑。

不過硬係有啲唔順,我已經好努力喺度磨爛蓆架啦,冇理由會同佢地爭咁遠啫。要解開呢個謎團,就要做少少數據分析嘞。費盡九牛二虎之力,卒之整咗個由10月19號到琴日嘅「每日進帳」列表。

從列表所見,陳主任、Wongfanny、黃Sir三位大發神威,分別係由11月1號、11月7號、11月6號開始。除咗黃Sir冇往績可尋,其餘兩位喺發威之前,每日進帳都冇乜突出之處。再對比番列表中其他人,就更顯得上述三位喺呢幾日嘅成績勁得異乎尋常。為咗揾出真相,本人做咗一樣好無聊嘅嘢。

冇錯,的確好無聊,我坐定定10分鐘,不停進出雀王排行榜,實呢三位嘅積分變化。哈哈,果然有驚人發現,佢地一鋪牌嘅進帳竟然可以超過100分!

事實上,喺雀王會館食到盡都係自摸10番,扣除抽水,每鋪進帳最多都只係得57.6分。好明顯,佢地嘅佳績已經超出咗運氣同技術嘅範圍。我可以好肯定咁講,呢個game已經俾人hack咗囉!

本來仲諗住轟轟烈烈咁參與呢場雀王爭霸戰,班友而家竟然出埋超技術,唔通真係要眼白白睇住人地上演一場千王群英會?

哈哈,本人疾惡如仇,當然唔會任由老千橫行啦,我已經寫咗封信俾Recax舉報佢地喇!


後記:

琴晚已經收到Recax回覆,佢地效率真係相當高,抵讚!回覆內容如下:

「我們將會對有關戶口作出觀察,另外亦跟你說明一下,雀王會館的分數並不是每局上傳,而是當分數差超過100,而又網絡許可的情況下才上傳,所以這幾位玩家可能在你觀察的時候已經玩了超過一局。」

關於分數上傳方式,本人當然冇得同佢拗,不過咁都絕對釋除唔到我對上述玩家嘅懷疑。舉個例,琴日先上榜嘅Kingqueen就喺4分3秒打咗202分,相當於3鋪自摸10番加一鋪自摸8番,如果話佢冇出術,我就真係打死都唔信囉!

Crowned crane, Arusha, Tanzania

雀王排行榜

每日進帳

8 則留言:

  1. hahaha, 你真係神心,我打打吓都放 pea 咗!

    每鋪進超過 100 分,絕對無可能,雀王榜應該揪出啲造假友,咁真正打嘅雀友才能夠得到應有位置!

    另外你努力呀,我認識的能問鼎前十的,靠你!

    回覆刪除
  2. laulong,
    雖然話舉報咗,不過Recax會唔會處理都仲係未知之數。啱啱check過雀王排行榜,又有新人上榜喇,而且一出現就排第六,睇嚟又係一個大老千囉!

    回覆刪除
  3. 佛爺:
    哈哈,我呢啲無聊人有乜嘢做唔出喎!

    回覆刪除
  4. 嘩,原來真係有人造假,不過 Recax 的管理真係唔啱喇,連用家都發現了,佢哋都未知,好彩有你咁精明!

    我雖然上分慢,但我都好享受玩的過程,我而家排四百幾名,十幾萬人玩,我認為自己都好叻架喇!

    回覆刪除
  5. Coffee,
    其實Recax都算唔錯架喇,佢地處理投訴真係相當有效率。我舉報完千王之王Kingqueen,佢地就即刻鏟咗條友個account。兩個禮拜前先聽你講話排七百幾,而家已經去到四百幾,進度都幾快喎!

    回覆刪除
  6. 可唔可以講下你嘅食糊心得?係咪全做大牌?

    回覆刪除
  7. Coffee,
    主要係做大牌,但係都要睇運氣週期,如果喺低谷位都仲死做爛做就死硬!講到尾,最緊要都係三個字:磨爛蓆!

    回覆刪除