2012年9月7日星期五

美味晚餐

最憎一條友落街揾食,所以如果唔煮飯,我就會煮即食麵醫肚。雖然話係醫肚,不過絕對唔係求其食得飽就算。對於食,我仲有最基本嘅要求,就係要好味。琴晚就煮咗個泡菜三丸麵,影完張相仲係熱辣辣,加埋罐啤酒,真係人生一大享受!

雖然只係cheap嘢,成本不過大約10蚊(唔計燃料費),但係就絕對得來不易。所謂「不易」,當然唔係指烹煮過程繁複,以本人懶到出汁嘅性格,麻煩嘅嘢就咪搞嘞。事實上,呢件產品係經過無數次反覆試驗先得到最佳效果,真係算得上千錘百鍊囉!

材料其實好簡單,計有即食麵一個、泡菜適量、開邊牛丸、貢丸、花枝丸、豆腐卜各一粒。做起嚟亦相當方便,凍水落晒所有配料同湯粉,水滾落埋個麵,再煮兩三分鐘就掂。製作可以咁簡單而味道又好,完全係因為材料方面經過精心挑選同不斷嘗試。

首先,作為晚餐,植物纖維點都唔少得。呢樣先最難搞,因為雪櫃裏面唔可能隨時會有新鮮蔬菜,而啲急凍雜菜又鬼死咁難食,根本唔會考慮。咁啱有一年去泡菜國旅行,突然想起用泡菜就可以解決呢個問題。成罌泡菜放喺雪櫃可以儲存好耐吓,用起嚟又方便,完全唔使洗洗切切。只係齋食太鹹,用嚟煮麵就啱啱好嘞。

至於其他配料,方便處理同儲存亦係首要條件,新鮮食材自然諗都唔會諗。罐頭之類,因為一次過未必食得晒,所以亦唔會考慮。已經調味、個頭適中嘅預製食品,諸如腸仔肉丸就最適合嘞。腸仔因為太唔健康,而且唔煎唔好食,未經輪選就已經出咗局。本來魚蛋魚片我都好鍾意,但係喺冰格雪過就會變得粗鞋無比,嚴重影響食味,試過幾次都係無奈放棄。最後選定牛丸、貢丸、同花枝丸,好食之餘,雪喺冰格亦唔會影響口感。一次過成斤買,然後開邊儲存喺冰格,都不知幾方便。事先開邊可以省卻解凍程序,直接喺冰格攞出嚟煮都唔怕中心部份唔熟。後來再加埋豆腐卜,雖然本身冇乜味,不過吸收咗啲湯汁都相當唔錯架。

當然啦,上述丸類絕對唔算健康食品,所以每種都只會用一粒。少食多滋味,多食壞肚皮,呢個道理我梗係明啦。不過最緊要都係唔好飲埋啲麵湯,否則鈉攝取量一定嚴重超標,命都短幾年呀!

提起麵湯,先發覺原來唔記得講個麵底,呢樣其實最緊要。即食麵我本身就鍾意,喺超市見到有新嘢都會買嚟試吓。結果都係覺得泡菜國品牌最好食,其中又以農心最啱胃口,雖然都係喺中國製造。除咗口感好,唔會浸吓就淋晒,調味亦相當唔錯。無論係石鍋拉麵、咖哩味、香菇味、鮮蝦味、辣白菜、抑或最基本嘅辛辣味,都同我精心挑選嘅泡菜三丸配料夾到無倫。

不過咁,味覺呢樣嘢好奇怪,會受心態影響。賤物未必唔好食,但係如果食得委屈,咁當然唔會欣賞到個中滋味。我就從來唔會同人比較,人地餐餐山珍海錯自然食得開心,但係我都好享受呢碗10蚊嘅泡菜三丸麵囉!

泡菜三丸麵

9 則留言:

  1. 我嘅煮法同你嘅有少少出入,就係麵會另外煮,走咗煮麵水,將麵放入預備好的湯度。

    我近日發現煮自己喜歡食的嘢,興趣大好多。

    回覆刪除
  2. Coffee,
    哈哈,要分開煮咁麻煩,當然冇我份啦,就算好食啲都係咁話!

    回覆刪除
  3. 呵呵,我仲平,齋麵冇配料,唔駛三文搞掂!

    另外,增加纖維素我會食蕃薯,勁有益呀!

    回覆刪除
  4. laulong,
    哈哈,齋麵又真係太寡咗啲喎!至於番薯,我都好鍾意,不過,我怕食咗會。。。。

    回覆刪除
  5. Errr,好多油。

    仲有缺少Vitamin B雜同各類水溶維他命。

    講完。

    回覆刪除
  6. 詩白爾:
    哈哈,我都知,呢個食譜高鈉、高脂、高膽、低纖,而且營養極其唔全面!不過勝在超平、超好味、同埋最緊要嘅:超方便!

    回覆刪除
  7. 嘩!淨係賣相已經 very good 刺!

    回覆刪除
  8. 泡菜放埋落D麵到煮,D泡菜唔係變到淡某某?

    回覆刪除
  9. Ebenezer,
    哈哈,淨係睇見個紅色嘅湯底,就已經令人食慾大振啦!

    佛爺:
    唔會架,泡菜本身勁鹹,煮過就啱啱好嘞!

    回覆刪除