2012年9月1日星期六

肥雞治港?

古語有云:小露露於野,大露露於市!

究竟露乜?當然唔係露體啦!想露體,梗係要喺鬧市露啦,如果喺荒山野嶺露,真係揾鬼睇咩!

而且,文章開頭冇加上警告語句,自然係講緊啲老幼鹹宜嘅健康嘢,而唔係露體呢啲咁重口味嘅另類行為藝術囉。

要露得健康,當然非露營莫屬。中學末期先第一次去露營,地點係大浪西。仲記得,夜晚坐喺沙灘,望住黑掹掹嘅海同黑掹掹嘅天,不禁驚嘆宇宙浩瀚,頓感神遊物外,差啲到達天人合一嘅境界添。幾十年後再諗番,都唔明點解嗰時會咁幼稚!

睇番而家啲中學雞,一樣係十幾歲人,但係已經識得「大露露於市」嘅道理,拉隊去政府總部露營。我地中學時代去露營,淨係玩埋晒啲小兒科嘢,好似煮吓公仔麵、唱吓「月兒像檸檬」。而家啲中學雞當然唔會咁幼稚,要玩就玩啲大鑊嘢,絕食唔在講,仲要當眾派個大檸檬俾新任凸首添。結果喺傳媒嘅鎂光燈大閃特閃之下,隻隻中學雞即刻變身成為抗拒強權嘅大英雄。真係諗極都唔明,究竟班中學雞係食乜嘢奶粉大嘅呢,竟然連毛都未出齊就咁有大將之風!

中學雞係香港嘅未來主人,俾個尿兜我做膽都唔敢對佢地嘅做法有任何質疑,真係前世未俾人批鬥過咩!不過以本人性格,唔揾啲嘢鬧吓就寢不安席食不甘味,咁唯有鏟吓另一隻雞啦。

今日睇日月報,喺中學雞露營單嘢版面,就見到條咁嘅標題:「三大政策同日公布 記協﹕霸新聞版位」。妓協主席麥肥雞「直指交津及賣地並非昨日非公布不可的議題,質疑政府以連串消息霸佔版面,『報紙版面、電視媒體air time有限,講了這樣就講不到另一樣,政府這樣為難傳媒,不是開誠態度』。」

係咪好搞笑呢?傳媒嘅責任係適時同如實咁報導每日收到嘅新聞材料,因為版面限制而要有所取捨,根本就係正常工作範圍,要靠佢地自己嘅專業判斷。麥肥雞竟然批評政府發放太多消息,咁唔專業嘅嘢都講得出,真係令人懷疑佢有冇資格做妓協主席囉。佢話「並非昨日非公布不可」,咁言下之意,係咪政府以後發布消息之前要諮詢咗妓協先呢?連政府嘅策略性部署都要干涉,莫非麥小姐覺得佢係幕後凸首,要實行肥雞治港?

記得隻肥雞早前先鏟過警方冇及時發放罪案消息,而家政府俾料傳媒佢又嫌,都唔知個婆娘係咪思覺失調囉!有個人立場唔係問題,亂發噏瘋都唔係問題,但係講嘢前後矛盾就失敗啦!

肥雞治港?發夢冇咁早!肥雞自講就差唔多!

Kars, Turkey

6 則留言:

  1. 張相好可愛好靚!

    >>唔揾啲嘢鬧吓就寢不安席食不甘味!

    想鬧咩咪鬧咩咯。

    回覆刪除
  2. Coffee,
    哈哈,梗係想鬧邊個就鬧邊個啦,香港勝在有言論自由呀!

    回覆刪除
  3. 中雞初病,肥雞老病!

    中雞俾人利用,老雞自己發癲!

    回覆刪除
  4. laulong,
    班中學雞梗係食咗啲問題日本奶粉,搞到腦部發育唔健全啦,俾人用咗嚟做政治籌碼都唔知,仲以為自己好醒添!至於隻肥雞點解會發雞瘟,咁就無謂深究嘞!

    回覆刪除
  5. 簡直可恥,傳媒竟然講連十二歲男生也去支持絕食人士。十二歲?不如話他們支持十歲便可娶老婆。

    回覆刪除
  6. 佛爺:
    哈哈,呢啲叫做後生可畏呀!話時話,香港而家嘅細路真係有啲文革時代紅衛兵嘅風範囉!

    回覆刪除