2012年7月21日星期六

精子識飛

警告:本文涉及成人題材,未成年人士切勿獨自觀看,敬希留意!

貞子喺電視同手機爬出嚟,已經搞笑到趴街啦,真係佩服啲蘿蔔頭諗得出!不過更搞笑嘅都仲有,話精子識飛,想像力又係咪太豐富咗啲呢?早幾日喺日月報睇到一段爆笑新聞,先知道原來想像力竟然係源自無知,都咪話唔得人驚!

【明報專訊】上海一對夫婦結婚後多年不育,為查清男女哪一方身體有毛病,早前到婦幼醫院檢查。醫生檢查發現,女方居然還是處女,經詢問得知,該對夫婦以為「精子可以飛來飛去」,結婚後睡在一起就會懷孕,令醫生哭笑不得。(新民晚報)

睇完段新聞,心裏面不禁有個疑問。唔通呢對夫婦一直以嚟都係生活喺伊甸園,仲要係冇蛇冇蘋果樹嘅伊甸園?報導話個女人仲係處女,好明顯佢地從來都冇搞過嘢。除咗未俾條淫蛇引誘嘅阿當同夏娃,真係想像唔到世上仲會有咁純潔嘅成年男女囉!

至於佢地唔知道要做愛先有仔生,以為精子識飛來飛去,當然係上海嘅性教育出咗問題,不過更大嘅問題肯定係源自對夫婦本身。佢地直頭好似不食人間煙火咁,唔通幾十年嚟從來都冇睇過鹹書或者4仔,甚至連街邊嘅無媒狗合都未見過?就算佢地真係白過白紙,但係結婚咁多年,都冇理由未見過大家嘅身體啫,有乜可能唔知道對方有樣嘢同自己夾到漏晒油呢?一啲探索精神都冇,真係上帝都幫佢地唔到啦!

諗深一層,其實單嘢都唔關性教育事,呢啲嘢使鬼人教咩!所謂「食色性也」,搞嘢從來都係動物嘅本能,唔通呢對夫婦連聖人之言都冇聽過?如果要教先識做,睇怕地球上根本就唔會有高等動物囉!

當然啦,為防啲細路太有探索精神,動不動就亂做實驗,正確性教育始終係有需要嘅。不過亦有人反其道而行,致力推行反面性教育。例如某權威組織就叫人唔好自慰,因為咁係不道德嘅行為。又有人強烈反對避孕,話唔想生就咪做。冇咁激嘅做法都有,就係斬腳趾避沙蟲,將性事極度簡單化。仲記得九十幾年前睇過一套粵語殘片,正正就係咁嘅例子。

因為實在太耐,成套戲係點已經冇乜印象,淨係記得其中一段情節。話說扮成男裝嘅女主角同身為將領嘅男主角喺軍營邂逅,兩人一見如故,都不知傾得幾投契。可惜歡樂時光過得特別快,眨吓眼已經天黑,男主角就邀請女主角到自己嘅營帳共度一宵。心邪嘅你一定以為男主角睇出對方係女扮男裝,想乘機咗佢。咁就錯嘞,其實男主角根本睇唔出女主角係女人,只係覺得同佢好啱嘴形,想同佢聯床夜話,秉燭談心啫。營帳裏面發生嘅嘢,套戲當然冇交代到,之後男女主角就各散東西嘞。跟住女主角竟然有咗,仲連仔都生埋添。到後來男女主角意外重逢,男主角竟然唔知發生過一單咁嘅香豔事件。

真係離晒大譜,你話咁嘅情節係咪教壞細路?男女同床夜話竟然搞出人命,有冇人會信就唔知嘞,不過我就覺得荒謬到無倫囉。本人細細個已經有分析能力,識得獨立思考,唔會好似而家啲大中小學雞咁頭腦簡單,人講乜就信乜嘅。根據劇情分析,男主角明明以為女主角係男人,都仲要半夜搞人地,當然係另有圖謀啦。要玩斷袖分桃,但係又前後不分搞錯地方,究竟係男主角白痴定係導演當觀眾白痴呢?不過既然劇情冇交代到當晚營帳裏面嘅情況,其實係女主角採取主動都有可能。無論係邊個搞邊個都好,咁都係違反咗作為朋友嘅誠信,利用對方對自己嘅信任而乘機佔人地便宜。我話套戲教壞細路就係呢一點嘞。

當然啦,啲頭腦簡單嘅小學雞未必會諗得咁深入,佢地睇完套戲,可能真係相信男女瞓埋一齊就會搞出人命囉!哈哈,會唔會嗰對上海夫婦都係細個時睇得太多滬語殘片,所以先以為精子識飛呢?

5 則留言:

  1. 就算睇咗單新聞知道來龍去脈,我都接受唔到呢對夫婦咁無知,難以相信!

    回覆刪除
  2. 真係好難接受喎,無知到咁既地步!仲有,就算佢地再無知,兩公婆訓埋一張床都可以冇發生事,佢地的夫妻生活實在係匪夷所思!

    回覆刪除
  3. 佢地係咪外星人黎架?墜落哩個危險嘅地球仲以為自己仲係百分百外星人?

    真係天下之大,無奇不有!

    回覆刪除
  4. Arm:

    佢地會唔會未試過玉帛相見,以為夜晚係床上攬埋一舊,就無端端會有佐,我細過果陣都係咁諗架!嘻嘻!

    回覆刪除
  5. Coffee,
    哈哈,只可以話:林子大了,甚麼鳥都有!

    菲菲:
    歡迎光臨!有理由相信,佢地係阿當夏娃(食蛇果之前)托世囉!

    laulong,
    哈哈,呢種「無為」嘅繁殖方式,睇怕連外星都唔會有囉!我就話佢地係神嘞,唔係點會識「神交」呢?

    佛爺:
    哈哈,你細個時好純情呀,令我有啲慚愧添!

    回覆刪除