2012年7月12日星期四

71假大空

呢排忙於執相,直頭執到天昏地暗日月無光,搞到連鬧人都唔得閒添。不過睇見今年嘅71遊行,完全係一場假大空鬧劇,咁就真係忍唔住,百忙中都要抽時間鬧吓嘞!

假,好簡單,班友根本就係假民主。

71當日,遊行隊伍高舉住捍衛民主嘅旗幟,浩浩蕩蕩操過銅鑼環。途中就發生咗一段小插曲,有十幾個人竟然唔識死,攞住支持新凸首嘅橫額插隊。辜勿論佢地係咪喺唔適當嘅時間地點做唔識當嘅嘢,但係喺呢個標榜言論自由嘅場合,相信亦冇人可以提出合理嘅理由阻止佢地。不過在場遊行人士根本唔使提出乜嘢理由,就即刻喊打喊殺,圍兇呢十幾個人。最後佢地被迫收起支持震鷹嘅橫額,先至唔使俾人打。又有一個70歲阿伯,攞住自製嘅紙板支持震鷹,結果連紙板都俾人搶埋。

71嘅銅鑼環竟然變成民陣嘅專屬示威區,異見人士完全禁止踏足。所爭取嘅言論自由原來只適用於一種聲音,遇到唔同意見就用恐嚇、甚至暴力手段打壓。總之人多勢眾就係王道,大聲夾惡至係真理。老弱傷殘就最好蝦,因為佢地冇反抗能力。唔通呢啲就叫做民主?有冇人敢企出嚟確認吓呢?

哈哈,當然有啦,仲有好多添,71當日就有40萬人企咗出嚟示範乜嘢叫做民主啦!

大,仲簡單,即係作大。

民陣話今年遊行人數有40萬,警方就話有6.3萬,真係大纜都扯唔埋。其實雙方各有主觀政治立場,公布嘅數字未必可信,都係參考番中立人士嘅調查比較有個譜。今年就有兩位學者做咗獨立統計,得出嚟嘅結果分別係7萬至9萬同9.8萬至11.2萬。將學者公布嘅數字攞個平均,得出9.25萬,再打個8折,就係7.4萬,竟然同警方嘅數字好接近。

點解要打8折?咁就要聽我分析吓嘞。啲學者根本唔敢得罪民主派,所以統計好可能會採取宜鬆不宜緊嘅態度。而且幫佢地數人嘅學生,10個有11個都係支持爭取民主嘅熱血青年,受主觀意願影響,點算時會不自覺數多咗都唔出奇。

就算唔buy我嘅8折理論,用番9.25萬,咁都已經證明咗民陣作大作到離晒罩啦!其實民陣年年玩作大,個個都已經習以為常。不過今年除咗作得特別大之外,仲揭示咗一個好得人驚嘅真相:香港原來有好多盲目同愚昧嘅人!

今年民陣係等警方同兩位學者出晒數字,佢地最後先公布。班友睇到警方同學者嘅數字,都仲敢話有40萬,即係表示佢地有信心無論作到幾大都有好多蠢人會信,事實亦證明真係咁。不過我就好鄙視呢班友嘞,唔係因為誠信問題,而係睇唔起佢地咁細眉細眼。既然香港有咁多蠢人,點解唔再作大啲呢,不如作夠800萬啦,700萬香港市民再加100萬由內地落嚟撐場嘅自由行,你慌冇人信咩!

單嘢後來仲引發咗一場小風波,有熱愛民主嘅人士因為不滿有關學者「報細數」,不斷用電話同電郵滋擾人地。真係搞笑,班友之前先因為中方「干預學術自由」而力撐呢位學者,但係轉個頭就將自己最珍惜嘅學術自由當狗屎咁踐踏。呢種輸打贏要嘅無賴行為,正好印證咗我話班友係假民主嘅講法!

空,係指班友腦空無物,淨係識空嗌口號,一啲理性思維都冇,全無建設性可言。

睇番遊行人士嘅訴求,不外乎以下呢啲:平反六四、徹查李旺陽事件、凸首同所有高官即刻下台、所有舊嘢唔准拆、所有基建唔准搞、土地唔准賣俾地產商,只可以起公屋居屋、自由行唔准嚟、做生意嘅唔准賺錢、工資要由工人決定,加到佢地滿意為止。

首先,六四同李旺陽事件絕對唔係香港人嗌幾句口號就掂,中央仲有好多政治考慮。不過香港人要嗌亦無妨,呢啲始終係言論自由。但係因為呢兩單嘢而否定大陸嘅一切,甚至搞全面對抗,就係因噎廢食,完全不切實際嘞。

至於其他訴求,一句講晒,只會令香港停止運作。如果真係順應民意,睇怕香港要時光倒流到前殖民時期,變番做漁村先得囉。咪住,全民捕魚會嚴重破壞海洋生態,啲環保人士一定反對。咁唯有變身做農村啦,仲要係100%有機耕作嗰隻添。到時人人自給自足,過住環保嘅綠色生活,又唔使再俾啲無良奸商剝削,社會自然可以達至真正和諧啦!

學陶淵明歸園田居,咁又真係幾過癮喎!哈哈,不過都係唔好預我嘞,如果香港有咁嘅一日,我寧願移民去阿老阿土囉!

Llama dolls, Peru

Pyramid of Khufu, Giza, Egypt

Lake Titicaca, Puno, Peru

4 則留言:

  1. 李旺陽事件發生在湖南省,,香港管埋佢地。若果在西方的聯邦體制,即刻比另一個州或省的人鬧到飛起,唔理你果件事係對或錯。即係咁,美國加州州長管埋佛羅里達州,你話得唔得呀?香港成班黐線友,當佐自己凌駕中央政府之上咩!

    希特勒都要擺平各方面利益,未有香港果班友咁黐線,好似全中國由香港來管治咁,簡直發神經。

    回覆刪除
  2. 民陣班奸狗,那會有一個誠信的人!

    至於遊行的,將垃圾亂拋有之,將垃圾貼紙黐到警察鐵馬唔成形有之,都係低水平嘅蠢民,仲有班俾人利用嘅花0靚,笑住咁墮落,好有勇氣咁無知!

    回覆刪除
  3. 三張相都好靚,你去旅行一定好唔得閒。

    回覆刪除
  4. 佛爺:
    哈哈,淫人妻女笑呵呵!呢種就係典型香港民主派嘅心態,自己干涉人就得,人地講一句關於香港嘅嘢就鬧到飛起,話破壞一國兩制喎!

    laulong,
    而家中學雞都結社論政,直頭已經俾啲政棍同傳媒洗晒腦!我諗再過多幾年,連小學雞同幼稚雞都會有樣學樣添,港式文革指日可待呀!

    Coffee,
    哈哈,係去完旅行好唔得閒囉!

    回覆刪除