2012年6月9日星期六

毛詩

毛詩,當然唔係指詩經啦,識鬼咩!我想講嘅係以下呢首詩:

暮色蒼茫看勁松
亂雲飛渡仍從容
天生一個仙人洞
無限風光在險峰

首詩係毛伯伯吟詠廬山嘅名作, 可謂無人不識。如果問我覺得呢首詩寫得好唔好,我嘅答案只有一個字:正!如果問我點好法,我又真係唔識講喎,唯有以O嘴回應啦。

毛伯伯讀扑扑齋出身,對中國古典文學有高深造詣。記得聽個大學同學仔講過,毛伯伯曾經入圍過諾貝爾文學獎遴選,去到最後階段先出局。雖然唔知真定假,不過佢嘅文學修養就絕對無容置疑囉。所以佢話「秦皇漢武,略輸文采;唐宗宋祖,稍遜風騷」同「數風流人物,還看今朝」,雖然係囂咗啲,有失文人謙遜之道,不過又真係吹佢唔脹喎。講開又講,其實我鍾意「沁園春」仲多啲添。

講番首廬山詩,我最喜歡係開頭兩句。不過我所以會知道呢首詩,完全係因為最後嗰兩句。幾十年前已經聽人講過,話呢兩句至係主旨所在,其實吟詠廬山只係幌子,「淫詠」江娘娘先係真正目的。至於點「淫」法,大家都係成年人,應該唔使我講到明啦。

嗰時都只係得個講字,直到近年先有人提出證據,話其實嗰兩句係脫胎自清代色情小說「花蔭露」第三回嘅開篇詩頭兩句:天生一個神仙洞,無限風光在玉峰。 講到似層層咁,又真係不由你不信囉。不過後來又有人反駁,話「花蔭露」喺2000年先至首次出現,根本係托古人之名嘅偽作,目的係要誣衊偉大舵手。究竟誰是誰非,我就完全冇嗌啲牙嘞。

話時話,嗰兩句詩又真係好易令人想入非非,切合晒現代人嘅淫謔風格。至於毛伯伯嗰陣,甚至更早嘅清代,係咪已經興啲咁嘅嘢,我對中國古典色情文學全無涉獵,當然唔敢妄下斷語啦。不過話呢兩句係用嚟「淫詠」江娘娘,我就覺得有個疑點嘞。對於「神仙洞」,我自然唔會有任何意見,但係「險峰」云云,就簡直係無中生有囉!至於首詩係旨在「吟詠」定「淫詠」,大家自己判斷啦!

睇咗咁耐,各位又有冇發覺呢篇嘢言之無物、講完等如冇講呢?哈哈,冇錯,其實以上一大堆文字可以不理,因為呢篇係我「詩情畫意」系列嘅頭砲,啲相先至係重點囉!

Dochula Pass, Bhutan

Matopo Hills National Park, Zimbabwe

Halong Bay, Vietnam

Dhaulagiri (from Poon Hill), Nepal

8 則留言:

  1. 我真是在報章看過以文言文寫的色情小說,但這是否現代人杜撰之作,要問校長至知了。

    我看到「天生一個仙人洞,無限風光在險峰。」兩句,我也想入非非喎!跟著才見到「諗廬山」。我至知道你不是在說情色內容。嘻嘻!

    回覆刪除
  2. 佛爺:
    哈哈,係唔係鹹濕詩我都唔清楚架,要問番毛伯伯同江娘娘先知!不過我唔想咁快就問佢地囉!

    回覆刪除
  3. 你有好多靚相,整合成一本畫冊都得喇!

    回覆刪除
  4. 哈哈,好彩其實我冇乜心機睇你寫咗啲乜野啫,月睇相就夠啦!

    回覆刪除
  5. Coffee,
    多謝!不過我已經唔晒相架喇!

    SKII,
    哈哈,其他內容唔緊要,不過嗰首詩就要睇嘞,因為啲相係為首詩度身訂造架!

    回覆刪除
  6. 哇哇哇,哩組相靚到呢~~~

    回覆刪除
  7. SKII,
    哈哈,咁就乖嘞!

    laulong,
    謬讚喇,多謝!

    回覆刪除