2012年4月5日星期四

死都死得衰過人

下晝就要飛,而家仲未執完嘢,真係踢晒腳呀!不過踢腳還踢腳,有單嘢就點都要鬧兩句先得。

琴日有個女人喺太古城玩跳樓,由三十幾樓飛落街,咁啱責正個路過嘅菲傭,結果雙雙去咗賣鹹鴨蛋。

我唔知,亦冇興趣知個女人點解要自殺。不過為求得到解脫,竟然害死個無辜路人,如果佢泉下有知,又會唔會安樂呢?死咗係咪一了百了我當然唔知,但係好似呢個女人咁自私,如果真係有afterworld嘅話,佢一定會落地獄囉,而且仲要日日受刀山油鑊之苦添!

唔知邊個話人死為大,死人點都唔鬧得,呢種講法真係好荒謬。唔通死就大晒,可以隨便揾人陪葬?咁嘅行為,根本就係冇特定目標嘅恐怖襲擊!

如果多幾個呢啲自私人,就連屋企樓下都會變成危險地帶,日日落街都要提心吊膽。今次唔好彩嘅係個菲傭,下次又唔知會輪到邊個,總之就人人有機會啦!

Rom, Norway

7 則留言:

  1. 高空擲物,係好唔啱嘅!

    回覆刪除
  2. 對哩種咁百萬中無一的事,真係嘆一句︰生死有命!

    回覆刪除
  3. 就算佢唔責死個菲傭,淨係佢自己死喺果度都嚇親啲街坊啦!

    回覆刪除
  4. Arm:

    這個女人生前有「反社會傾向」,自己想死之餘,也有同歸於盡的心態。

    回覆刪除
  5. 咁哥歌呢?又唔見有人話佢?

    回覆刪除
  6. 哇,有咁嘅事?真係陰功!

    啲人都唔諗吓掟嘢出街都會揼到人,掟自己落街,咁大件物體,掟到人机會真係好大。

    回覆刪除
  7. Ebenezer,
    咁當然係唔啱啦,一來製造垃圾影響市容,更甚嘅係仲會危害其他人嘅生命財產安全添!

    Coffee,
    雖然話生死有命,不過呢種人為意外其實係完全可以避免嘅囉!

    SKII,
    聽講話嗰個女人唔係住喺太古城,係特登跨區跳樓架!太古城啲街坊真係多得去唔少喇!

    佛爺:
    哈哈,你對心理學真係好有研究!其實我都相信,有啲人真係變態到死都要揾人陪葬囉!

    匿名君:
    哈哈,呢啲咪雙重標準囉!就算嗰次真係責到人,相信個個都淨係會關心哥歌架咋!

    laulong,
    係囉,都唔知點至可以安全啲,行騎樓底又驚佢會冧,行出啲又驚會俾人責死!

    回覆刪除