2012年4月20日星期五

那媽是爹

心邪嘅你梗以為我又喺度講粗口嘞。咁又唔怪得晒你嘅,香港人一聽到「那媽」或者「老母」,都唔知點解一定會聯想到啲衰嘢。其實「那媽是爹」係問候人嘅語句,好嘢嚟架!

雖然話係好嘢,不過邏輯上就好似講唔通囉。人人都知阿媽係女人,當然亦知阿爹係男人,咁「那媽」就冇可能「是爹」啦。話時話,「那媽是爹」又真係唔可以用中國人嘅邏輯嚟解釋喎,因為呢句係尼泊爾話「namaste」嘅譯音,係「你好」咁解。

復活節去咗尼泊爾行山,短短個零禮拜,呢句嘢都唔知講咗同聽咗幾多次。如果喺香港,真係十年加埋都唔會有咁多問候人同俾人問候嘅次數。

尼泊爾人相當友善,見到遊客有時都會主動打個招呼問候吓。呢樣嘢喺香港就唔可能發生嘞,如果喺猩肛大道同啲自由行講「你好」,人地一定會覺得你係黐線佬,再唔係就會以為你係拐子佬囉。

主動同遊客打招呼,相信香港人會覺得難以理解。不過更估佢唔到嘅都仲有,喺尼泊爾,互相問候得最多嘅竟然係遊客之間,尤其是喺山上。四月同十月係當地行山旺季,山上遊客多如過街老鼠。而且大部分山路都比較窄,有人上山又有人落山,好易會狹路相逢。當喺山上遇到對頭人,雖然三九唔識七,大家好多時都會用「那媽是爹」問候對方。呢樣肯定係尼泊爾獨有嘅旅遊文化,就算喺第啲地方都有咁嘅情況,遊客間互相問候都只係會講「蝦佬」,而唔係用「那媽是爹」。

事實上,以我幾十年嚟旅行所見,三九唔識七嘅遊客真係好少會互相問候。就算撞到同聲同氣嘅香港團都係咁話,打招呼就唔會嘞,爭位影相、爭位食飯搞到打交就有份。尤其是喺啲發達地區或者熱門旅遊地點,無論係當地人抑或遊客,都唔會俾到人友善嘅感覺。試想喺巴薩隆拿,如果有個陌生人無啦啦走埋嚟say hello,我實會覺得佢係有啲不軌意圖囉。反而喺啲比較偏遠落後嘅地方,遊客之間會表現得比較友善,有時都會互相打吓招呼。

其實唔使講到咁遠,就睇番我地生活緊嘅地方,人與人之間嘅關係都好疏離。好似我住緊嗰度,就算係同層鄰居,等嘅時候都係互相當透明,莫講話唔會打招呼,連眼神接觸都可免則免。都唔知點解,啲人硬係要去到啲山卡啦地方先會表現得比較友善。好似喺尼泊爾山區,嗰種感覺就相當唔錯。不過咁,去行幾日山就過癮啫,如過要喺嗰度長住就咪搞嘞。對於我嚟講,物質條件點都比風土人情緊要。市儈?我認架!

Syauli Bazar, Nepal

Banthanti, Nepal

Tikhedhunga, Nepal

4 則留言:

  1. 那媽是爹!

    唔見你一排知你梗係去咗玩咯!行山嘅文化有啲唔同,好多年前喺大陸行山碰頭有時都會嗲兩句,依家國家富咗人反而冷漠咗,真係禮失求諸野!

    回覆刪除
  2. 你真係勁秋,咁既地方都去埋,有無遇到老虎呀?

    回覆刪除
  3. 單睇題目,真係以為你在鬧啲乜咯。

    旅行該佔你生活中很大的部分。

    回覆刪除
  4. laulong,
    人地話社會越富裕,心靈越貧乏。如果真係好似魚與熊掌咁不可兼得,我就寧願要物質上嘅富裕嘞。要憂柴憂米真係咪搞我,話知佢禮崩樂壞啦!

    佛爺:
    哈哈,老虎當然冇,馬就有好多,搞到成條路都係馬屎,仲恐怖過地雷陣!

    Coffee,
    其實去旅行都唔係用好多時間,啲善後工作先攞命!每次旅行都影幾千張相,莫講話執,淨係每張相編個code已經有排搞!

    回覆刪除