2012年1月19日星期四

食者有其鮑

兔年真惡頂,投資損手爛腳唔在講,仲要生活所需樣樣都狂加,真係搞到冇啖好食!冇啖好食係因為我學咗歐豬五國,實行節約開支政策,其他方面已經減無可減,唯有喺伙食費用開刀。事實上,11年嘅伙食開支就足足比10年減咗兩成。當然啦,仲有飯開已經唔敢埋怨架喇,不過粗茶淡飯食足成年,餐團年飯(我自己煮嗰餐)食得好少少都無可厚非啫。所以琴日就特登走去大昌,諗住年尾豪一次咁多,買罐車輪鮑整番個每年團年飯嘅必備菜式,冬菇海參炆鮑魚。

點知去到大昌,一睇個價錢牌就即刻嚇到傻咗,以前買開嘅1.5頭車輪鮑,一罐竟然要$928!呢幾年買親車輪鮑,我都會揀大昌,因為一定唔會有假嘢。對上一次買係09年尾,嗰時做緊超筍特價$399。呢個價真係好筍,08年佢地都賣緊$480,而07年喺華潤買過,反而仲貴啲,要$538。見佢咁抵,嗰次就掃清晒佢地鋪頭嘅存貨,買咗五罐。不過幾個月之前已經食晒,所以今年團年要買過。

點知車輪鮑兩年之間竟然貴咗一倍有多,都咪話唔得人驚!莫講話九百幾蚊遠超我嘅負擔能力,加幅亦令人難以接受。所以最後都係買唔落手,轉咗買隻做緊超筍特價嘅蚊型南非湯鮑(飲食行內叫罐頭鮑魚做湯鮑),12頭嘅星嘜鮑,$328一罐。

以湯鮑嚟講,墨西哥嘅車輪鮑當然正,不過南非出品都唔錯,一定唔會差過澳洲貨。反而以乾鮑聞名於世嘅日本,湯鮑就未必都係咁正,不過就賣得好貴。幾年前貪新鮮,喺安記買咗罐日本吉品湯鮑試吓,嗰時都要賣$650。但係食落就一般,肯定及唔上車輪鮑,細隻好多都算嘞,最主要係鮑魚味唔夠濃。

講番隻星嘜鮑,雖然我以前未食過,不過見佢做緊超筍特價,都買咗兩罐試吓。返到屋企將其中一罐連罐煲三粒鐘,一打開就聞到好香嘅鮑魚味,果然冇買錯。咪講笑,即刻連飯都唔煮住,趁大昌仲未收鋪,走去掃埋佢地嗰幾罐存貨。

我超鍾意食鮑魚,一罐湯鮑真係唔多夠喉,所以通常會買多幾隻新鮮南非孔雀鮑一齊炆,效果都相當唔錯。炆鮑魚其實唔算難,只係工序比較多啲。我會先用蒜茸乾蔥薑片爆一爆啲鮑魚,跟住濽酒,再用上湯蠔油老抽冰糖慢火炆兩粒鐘。最後放埋冬菇同海參,再炆多半粒鐘就可以用生粉埋芡,倒落預先準備好用嚟墊底嘅蒜茸炒豆苗就得嘞。

當然啦,我呢啲只係家庭式製作,連街坊酒樓嘅出品都尚且不如。如果我敢話好味,恐怕會俾人恥笑囉。至於鮑魚可以好味成點,我就真係想像唔到嘞。鮑魚要整得好食,唔只要有上乘嘅材料,仲要有出色嘅廚藝。眾所周知,鮑魚之中當然以乾鮑最好。而芸芸鮑魚名廚之中,又以阿一地位最尊崇。聽一個從事金融行業嘅中學同學講,有客曾經請佢去富臨食阿一鮑魚,真係正到無倫,可以稱得上天下之美味。但係價錢亦貴到無倫,要過萬蚊一隻!我都知溏心鮑魚正,有人請就話冇所謂啫,如果要我用個幾月人工食一餐,真係殺咗我好過啦!

唉,有時諗落都覺得好灰,想食到自己鍾意食嘅嘢,其實只係好卑微嘅願望啫,點解會咁難實現嘅呢?溏心乾鮑已經係諗都唔敢諗嘞,而家連湯鮑都貴到食唔起,想唔灰都唔得啦。講真又好唔公平囉,有人買唔起樓,政府就用公帑資助佢地置業。而我呢啲食唔起鮑魚嘅香港公民,點解政府又唔幫吓呢?所以我強烈要求政府推出食者有其鮑計劃,資助我地呢啲窮人食鮑魚,仲要係溏心乾鮑添!可能有人會覺得我無理取鬧,冇鮑魚食都唔使死啫。咁我又反問一句,大家又有冇見過任何人因為買唔起樓而燒炭呢?又可能有人會質疑我太貪心,點解湯鮑都唔肯收貨,一定要政府資助食乾鮑。大家可能仲記得紅灣半島,呢個海景居屋王嘅出現,就係因為社會上有咁嘅觀點:點解窮人唔可以擁有無敵海景居所!而舊年喺一片要求復建居屋聲中,又有某大狀政黨建議政府用幾塊臨海地王起資助房屋。咁我要求政府資助食乾鮑,究竟算唔算太大貪,大家自己判斷啦!

冬菇海參炆鮑魚(星嘜鮑&孔雀鮑)

星嘜鮑

星嘜鮑

冬菇海參炆鮑魚(車輪鮑&孔雀鮑)

車輪鮑

車輪鮑

孔雀鮑

孔雀鮑

吉品湯鮑

12 則留言:

  1. 話唔家今年鬍鬚曾又賣大鮑,俾你食者有其鮑呢?!

    回覆刪除
  2. Ebenezer,
    六千蚊相信只夠食一隻輕量級阿一鮑魚,可以話係雞肋囉!最怕係好似吸毒咁,試一次會上癮,咁就大鑊喇!你知啦,財爺冇可能年年都派錢啫!

    回覆刪除
  3. 冬菇海參炆鮑魚(車輪鮑&孔雀鮑)賣相好吸引,真係識食好玩!

    回覆刪除
  4. Coffee,
    雖然味到尚且比唔上街坊酒樓嘅鮑片,不過我都係鍾意大啖咬,可以滿足吓卑微嘅虛榮感!

    回覆刪除
  5. wow, 果然係擦家!祝你龍年頭頭是道,贏突晒,一千文罐飽魚一買百幾二百箱 ^^

    回覆刪除
  6. laulong,
    哈哈,首先多謝你嘅祝福!不過如果有能力買二百箱車輪鮑,我都唔會買囉,因為到時一定會升呢轉食阿一溏心鮑魚!

    回覆刪除
  7. 返到屋企將其中一罐連罐煲三粒鐘,一打開就聞到好香嘅鮑魚味,

    咪住先,連鐵罐一齊煲?係放落水到煲?我有冇誤會到?煲罐頭?

    回覆刪除
  8. 佛爺:
    冇錯,就係連罐放落水慢火煲三粒鐘,啲酒樓大廚都係咁處理罐頭鮑魚架!

    回覆刪除
  9. 完全無諗過可以咁煲罐頭既!

    回覆刪除
  10. 佛爺:
    因為罐頭鮑通常比較硬身,要煲幾粒鐘先夠霖,而且越煲鮑魚味會越濃添。而連罐煲就肯定係最方便嘅處理方法!

    回覆刪除
  11. Arm:

    唔該哂!我有一罐澳洲鮑魚,係人地送既!就快到期,真係要試一下連罐煲。

    回覆刪除
  12. 佛爺:
    澳洲鮑魚都係正嘢嚟架,祝你成功呀!

    回覆刪除