2012年1月14日星期六

方便冇煩惱?

忽然急尿,點算好呢?問嚟都多餘嘅,當然係即刻去廁所啦!但係如果附近冇廁所,咁又點算好呢?

對於女士嚟講,以上問題我就唔識幫佢地解決嘞。至於麻甩佬就容易好多,基本上唔算太難搞。如果喺荒山野嶺就最簡單,因為度度都係廁所。就算身處通衢大道亦冇乜難度,求其揾個有牆嘅地方面壁就掂。哈哈,做男人真好,方便冇煩惱!

不過咁,以上結論亦有一個例外情況。如果你有咁嘅榮幸(或不幸),貴為保家衛國嘅戰士,就千祈咪亂咁方便嘞,否則唔止煩惱,仲隨時會惹禍上身添!

話說有幾個花旗大兵,執勤時忽然急尿,喺急不擇地嘅情況下方便,竟然痾咗落幾個塔脷斑嘅屍體度。唔知點解,麻甩佬痾尿都有人影,條片仲俾人放埋上youtube添。結果唔止喺花旗國外引起廣泛譴責,連國務輕欺拉你都鬧埋一份,仲話一定要追究有關大兵嘅責任。

呢單嘢我喺報紙睇到,報導中仲有一張條片嘅screen capture,不過喺幾位大兵嘅重要部位就打咗格仔。本來我對單嘢唔係咁有興趣,不過因為冇見過大蛇痾尿,喺好奇心驅使下,就上網摷吓,睇吓揾唔揾到啲uncensored嘅版本。總算皇天不負有心人,喺網上幾經轉折,卒之俾我揾到。不過睇完先呻笨,我連老花鏡都出埋,竟然完全見唔到我想睇嘅嘢。又話啲鬼佬好勁,原來係呃人架!

雖然條片冇料到,不過啲留言就反而有啲啟發性。我地成日叫人痾督尿照吓,原來真係有道理架,千祈咪睇小中國嘅民間智慧呀!幾個大兵嘅尿,就好似一塊魔鏡咁,反映出留言者嘅心態。條片有萬幾條留言,我當然冇可能睇得晒。事實上,我只係睇咗一頁,所以我嘅分析絕對講唔上全面。而家又唔係做學術研究,冇需要咁認真啫,唔啱睇就當我廢噏啦。

喺我睇咗嘅留言當中,差唔多全部都係支持嗰幾位花旗大兵。其中有啲留言好激,有人話日日痾屎落可X經,又有人話用可X經嚟抿屎。只有以下呢條比較理性,而且有啲內容:

After all of the things that we actually helped with in this country (Schools, Jobs, Funding etc.) a 1 minute video by some 19 year-olds completely destroyed it... Not all Marines are like this, but the few that are ruined the image of the United States. Theres no arguing with this comment, it’s the fucking truth

原來花旗佬打殘阿褲汗係為咗幫佢地,呢個觀點同我一向嘅理解簡直南轅北轍。我初初睇到,仲以為係自己啲英文屎,曲解咗條留言添。不過諗深一層,又係喎,唔炸到班友冚包散,又點幫到人地重建呢?!我咁講係有根據架,喺倚天屠龍記裏面,張無忌醫番殘廢多年嘅余岱岩之前,就要先捏碎晒佢啲骨,然後再搽療傷聖藥黑玉斷續膏。至於軍事行動導致大量平民傷亡,當然亦無損花旗國嘅正義形象。郁民都講過啦,喺所有為公義而戰嘅群眾運動裏面,社會都要付出代價囉。而且炸死啲不知民主為何物嘅化外賤民,令到阿褲汗可以進化成一個民主公義人權法治乜都齊嘅文明國度,根本就係花旗國賣大包,免費幫佢地大換血。但係世人竟然忘記咗花旗國嘅狼虎用心(弊嘞,又打錯添,係良苦用心至真),因為啲雞毛蒜皮嘅小事就喺度嘈生晒,又難怪有啲網民睇唔過眼嘅。

睇完有關留言,連我自己都獲益良多,對單嘢有咗全新嘅理解。喺嗰幾位花旗大兵長大嘅國度,空氣同水源都洋溢住人權公義,佢地嘅尿自然亦充滿民主養份。能夠受到佢地嘅楊枝甘露滋潤,對於嗰幾個死鬼塔脷斑嚟講,根本就係幾生修來嘅造化,旁人真係恨都恨唔到呀!

常言道施比受更有福,但係嗰幾位花旗大兵嘅無私奉獻,反而換嚟世人唾罵,直頭係冇天理啦!唉,做隻畜牲仲好啲,鐘意幾時痾都得,喺邊度痾又唔會有人干涉。或者嗰幾位花旗大兵應該為自己打算吓,唔好淨係顧住幫人,不妨考慮吓即刻投胎做畜牲,起碼唔使受到咁唔公平嘅對待先啦!

相片說明:
第一張相係堅嘅,我真係喺度方便緊。而喺其他相片裏面,主角都係方便緊,不過就絕非本人。

Amsterdam, Netherlands

South Island, New Zealand

Delhi, India

Taktsang Palphug Monastery, Bhutan

10 則留言:

  1. 嘩乜你對大蛇屙尿咁有興趣想睇。。。。

    回覆刪除
  2. 你這篇文好似笑話咁,最笑話就係你企係街邊呵尿!乜荷蘭D公廁咁開放架?飛隻禿鷹出黎,隻雀唔係無埋!嘻嘻!

    回覆刪除
  3. eric,
    其實我係對神話傳說之類嘅嘢有興趣啫,而今次呢單嘢就令一個西方神話徹底破滅囉!

    佛爺:
    Ams嘅公廁真係好開放,另外仲有一款see-through螺旋圍板式小便亭,方便緊都唔會同街上行人有絲毫隔膜架!當然啦,女廁係點我就唔清楚嘞!講到人身安全問題,我喺尼泊爾行咗十日山,基本上小解都係喺大自然中進行,不過就從來冇俾啲蛇蟲鼠蟻飛禽走獸襲擊過囉!

    回覆刪除
  4. haha, 當街疴 shu shu, 打冷震 fing 極唔清咪好難睇?

    回覆刪除
  5. 點解你去小解都被人影?

    回覆刪除
  6. 你幾時去荷蘭的?我好耐好耐之前去,唔覺有咁嘅野?

    回覆刪除
  7. 原來你又唔鐘意做格仔佬,鐘意去公眾席嘅^^

    回覆刪除
  8. laulong,
    哈哈,阿伯痾尿有鬼人睇咩!不過嗰度始終係大街大巷,點都要顧吓儀態嘅。所以我事前已經諗好晒每一個細節,喺腦裏面預演咗一次,務求喺實戰嘅時候,整套動作可以一氣呵成、瀟灑流暢!

    Coffee,
    哈哈,係我叫人幫我影架!咁特別嘅廁所,梗係要影啦!不過齋影個廁所又太寡,影其他用家我又驚俾人打,咁咪唯有自己粉墨登場囉!

    SKII,
    大約年半前啦。以我嘅印象,呢類廁所喺紅燈區好似比較多啲,不過相中嗰個就唔係喺紅燈區。

    Ebenezer,
    想做格仔佬都唔得啦,喺條街根本就見唔到有成大座嘅廁所!

    回覆刪除
  9. minor,
    哈哈,我有時真係好底死架!

    回覆刪除