2012年1月16日星期一

我冷血之唔該死遠啲

注意:如果有人睇完想鬧我冷血嘅就可以慳番嘞,因為我一早已經自插咗!

琴日睇日月報,鋪天蓋地都係台灣大選嘅消息。呢個肯定係近期最熱門嘅話題,不過我自己又唔係有乜嘢真知灼見,都係費事獻醜嘞。而喺一個唔顯眼嘅位置,就見到一單相信唔會有太多人留意嘅新聞。攞呢單嘢嚟講,都應該會係獨家評論喇啩。

話說有個男人爭落人十幾萬賭債,就走咗去一個朋友屋企暫住,避吓風頭。點知佢趁友人入醫院大修,竟然喺人地屋企燒炭自殺。直到友人同佢失去聯絡,覺得有啲唔妥,先至揭發呢單嘢。

一個人搞到要自殺,背後梗有佢嘅原因,而作為路人甲,我本來亦唔應該評論啲乜嘢。所以我想講嘅唔係佢因乜要燒炭,而係點解佢要喺朋友屋企自殺。佢喺走投無路嘅時候得到人地收容,呢位朋友都算唔話得啦。而家搞到人地屋企變成兇宅,假如佢泉下有知,又於心何忍呢?如果呢位朋友係住喺公屋都好啲,話唔定可以申請調遷。最弊人地住嘅係私人屋苑,俾佢咁樣一搞,樓價肯定即刻大跌兩三成,隨時唔見咗幾十萬。如果層樓係租嘅,咁個業主就更無辜嘞,真係喊都無謂,唯有眼淚在心裏流啦。

類似事件其實發生過唔少,有人走去朋友屋企跳樓,又有人不惜長途跋涉,特登去到冇雷公咁遠嘅屋邨尋死。唔知幾時開始,啲人又鍾意租某知名小築燒炭,害到經營者雞毛鴨血。

咪以為喺自己屋企尋死就影響唔到其他人,其實咁都隨時會連累無辜。跳樓責死人,都唔係未試過啦。開煤氣更危險,因為有機會引起大爆炸。而燒炭就仲大鑊,隨時會搞到火燭,危害難以估計。就算唔係真係想死,都一樣會害人。早排就有條友玩企跳,結果間接導致一個差人跌死。

人死咗自然係一了百了,但係如果因為自己嘅解脫而連累無辜,咁就係造孽啦!我唔係話要譴責任何人,事實上,譴責死咗嘅人亦唔會有任何意義。

其實有乜咁大不了,點解啲人一定要了結自己嘅生命呢?嗰啲為咗啖氣、或者因為感情問題自殺嘅先最無謂,佢地需要嘅唔係死,而係時間!就算真係非死不可,亦唔好俾自己嘅痛苦變成其他人嘅不幸,要死唔該死遠啲!

Old cemetery, Gevas, Turkey

Old cemetery, Gevas, Turkey

7 則留言:

  1. 吾!觀大師所言,最佳歸塵土之法,莫過於石榴裙下死,做鬼也風流!嘻嘻!

    回覆刪除
  2. Ebenezer,
    唔止累街坊,亦令到親人痛苦,所以自殺係一種好自私嘅行為!

    佛爺:
    係喎,所以召妓唔戴套應該係世上最舒服嘅自殺方式!

    回覆刪除
  3. 嘩!真係大吉利是,本來人之將去,其行善也,但要咁累人!

    回覆刪除
  4. Coffee,
    如果係出於一時衝動(例如跳樓就有可能係呢種情況),真係唔會考慮咁多,雖然我絕對唔認同,但係都可以理解。不過好似燒炭咁,事前要做好多準備,過程亦會維持一段時間,如果咁都唔諗吓會連累人,就真係極度自私囉!

    回覆刪除
  5. 生就累人死就累街坊,從來都是人中渣滓!

    回覆刪除
  6. laulong,
    你咁講隨時會俾人話冷血架!大家都知啦,香港人極富同情心(覺得自殺已經好慘),而且又識得尊重人(不過就只限於死人)!

    回覆刪除