2012年1月11日星期三

一鞋不如一鞋

早兩日攞隻鞋去俾人車番,因為聖誕節旅行嗰陣發現隻左腳有啲爆線。間補鞋鋪大約一個月前幫襯過,係補番同一對鞋,都係爆線,不過係右腳。嗰次佢地做得唔錯,而且屋企附近我淨係知道呢間補鞋鋪,當然唔會揾過第二間啦。

入到去,得一個仔喺度。見佢擰轉咗面搞緊啲類似膠水嘅嘢,我就講咗聲「唔該」。其實人地忙緊,我都唔介意等一陣,點知佢頭都冇擰過嚟,就用好唔耐煩嘅語氣講:「有嘢就講啦!」一啲禮貌都冇,真係俾佢吹脹!算啦,我只係想補番隻鞋,禮貌嘅嘢,bonus嚟嘅啫。咁我就道明來意,話有隻鞋爆咗線想車番。仔聽完冇俾反應,直到搞掂手頭嘅嘢先擰番轉頭,攞起隻鞋睇咗一眼,跟住話:「四十蚊,六點嚟攞!」一個月前攞過另一隻鞋嚟車,當時只係收三十蚊,冇理由今次貴咁多啫,我有啲懷疑可能係個仔新嚟唔知價,就問佢係咪最近加咗價。佢又用嗰種好唔耐煩嘅語氣答番我:「係加咗價,咁你而家做唔做丫!」啲態度惡劣到呢,好似全區得佢一間補鞋鋪咁!事實上,我又真係唔知附近仲有冇其他補鞋鋪囉,咁唯有嗗聲吞咗佢,磅完水攞咗個號碼牌仔走人。其實我一直好懷疑究竟係咪加咗價,呢啲唔使開單嘅嘢,個仔落咗格都冇人知啦!

過咗幾粒鐘去攞鞋,除咗個仔,之前見過嘅另一位師傅都喺度。咁都好,如果隻鞋車得唔滿意,起碼都有得投訴先啦。果然俾我不幸言中,個仔完全係亂咁嚟。啲線步疏到離晒罩,原本車咗接近二十針嘅範圍,佢竟然五針就搞掂。而且爆開嘅兩邊又冇對番齊先車,結果車完都明顯睇得出係爆咗線。肉酸唔在講,好肯定一著上腳就會即刻爆過。咁我當然係唔收貨啦,咪同個師傅發爛渣囉。都算師傅有番啲商業道德,應承幫我做過。

再去攞鞋嘅時候,淨係得番師傅喺度,仔已經唔見咗,唔知係咪俾人炒咗呢?睇番隻鞋,手工回復再之前嗰次嘅水準,即刻收貨走人。

雖然單嘢最後完滿結束,不過無啦啦要行多次,又要受條仔氣,始終都係有啲唔順囉。仔手工差,絕對可以理解,如果唔係使鬼學師咩。但係自己搞唔掂嘅,就揾師傅出馬啦,冇理由搞到pat屎咁,都覺得個客會收貨啫。更難頂嘅係佢啲惡劣態度,簡直當正個客應份帶錢上門乞求佢補鞋咁。呢一代啲仔做嘢冇厘交帶,我當然唔會唔知,不過自從實施咗最低工資,情況又好似再差咗。鬼咩,而家度度都有最低工資,唔補鞋咪做茶仔、七仔、老麥囉,真係處處前景一片秀麗,博炒完全冇問題!諗番我地做仔嘅時候,唔好講話做得差,手腳慢啲都俾人鏟到反艇啦。唉,真係一鞋不如一鞋!

講到一鞋不如一鞋,又真係把幾火。對鞋著咗兩年就已經爆線,仲爆完右腳到左腳。記得09年7月喺智利海邊黃昏漫步,著緊嘅沙灘涼鞋忽然甩底。結果頂到返酒店,換番對Timberland就出去食晚飯。點知食完飯返到酒店,先發覺對鞋又甩埋底。兩對鞋相繼甩底,都算係史上最黑嘅一日嘞!因為行程緊密,第二朝一早就要飛去秘魯,唯有見步行步,步步為營,著住對甩底Timberland先啦。

第二日去到秘魯嘅Cusco,實在太多嘢睇嘞,根本就冇時間買鞋。最後要喺晚飯前先抽到十五分鐘,喺餐廳附近嘅一間運動用品店買咗對鞋。嗰度嘅運動鞋,選擇都唔算少,不過款式就麻麻地,而且價錢相當貴。卒之揀咗一對叫做VASQUE嘅牌子,款式好平實吓,價錢算係比較平,不過折番港紙都要千幾蚊,肯定貴過我對甩底Timberland。VASQUE呢個牌子我未聽過,既然喺嗰度賣到最平咁滯,當然唔會係名牌啦。秘魯嘅人均收入每月只有二千幾蚊,一對普通運動鞋就要成半個月人工,都咪話唔得人驚囉!

講番對Timberland,甩底絕對係非戰之罪,因為已經著咗超過十年。又因為夠舒服,平時又著,去旅行又著,結果咪搞到積勞成疾囉。記得嗰晚將對鞋放入酒店房嘅垃圾桶,真係好唔捨得,始終佢都陪我走過唔少難忘嘅艱苦旅程,包括00年去尼泊爾行山同03年喺東馬上神山。係呀,我個人比較念舊,就算係冇晒利用價值嘅嘢,好多時都唔忍心掉架!

當多數人都貪新忘舊,我反而覺得新不如舊。對VASQUE除咗冇咁舒服,款式亦太平實,所以平時唔會著,只係旅行先著,貪佢感覺上夠硬淨。點知著咗啱啱兩年,舊年7月去土耳其旅行,右腳已經爆咗線。跟著聖誕節喺印度,左腳又爆埋。不過咁,雖然對鞋唔係咁正,我都唔會輕易放棄佢。就係呢對鞋,喺10年陪我登上人生最高點,踏足4900米嘅南美高地,冇功都有勞啦!



12 則留言:

  1. 從你著鞋嘅習慣上就可以睇到,你唔係一個始亂終棄嘅人!

    回覆刪除
  2. 哈哈,我絕對唔係一個貪心忘舊嘅人嚟架!不過鞋同人始終有分別,一個人可以擁有幾對喜歡嘅鞋,但係要同時鍾意幾個人就好大鑊囉!

    回覆刪除
  3. vasque開倉都七八舊,係咁上下價錢,好野物有所值!

    回覆刪除
  4. 最後有冇問番個老師傅個口靚仔有冇落格?

    回覆刪除
  5. 好多女人戀鞋,買好多,我唔係呀,好彩!

    回覆刪除
  6. 就快過年,唔好再鞋鞋聲喇!嘻嘻!

    回覆刪除
  7. 對舊鞋嘅情意結,我同你一樣呀!

    回覆刪除
  8. 詩白爾:
    對鞋淨係旅行先著,只係兩年就爆線,我對呢個牌子真係好失望囉!

    minor,
    當時個仔都在場,梗係唔方便問得咁明白啦,萬一佢老羞成怒,用通渠水淋我咪死!

    Coffee,
    最經典係艾美黛,佢有三千幾對鞋,就算每日換三對,都要三年先著得晒!

    佛爺:
    哈哈,就快龍年,咁就講個龍字啦:龍爭虎鬥、猛龍過江、虎膽龍威、臥虎藏龍!

    laulong,
    係呀,尤其是舒服嘅鞋,真係可遇而不可求,著到爛都唔捨得掉呀!

    回覆刪除
  9. 轉AKU囉,我返工日日著日日周街行,年半都黎緊頭,除鞋底磨到光頭外無穿無爛依舊防水。

    呢對一千上下,你咁有米買多兩對送俾大家都好丫。

    回覆刪除
  10. 詩白爾:
    哈哈,我係老人家,唔識啲潮牌架!仲有,我而家接受唔到新事物架喇,所以就算係再買鞋,都只會買Timberland、Cat、或者Clarks。

    回覆刪除
  11. 唔好意思 我想問你去車鞋個間鋪頭有冇地址? 我最近有對鞋又係爆左線 唔知去邊度整返好。。。。

    回覆刪除
  12. Chris,
    唔使客氣!嗰間鋪頭喺紅磡黃埔新邨(近仁孚大廈),不過我諗其實任何一間連鎖補鞋店(例如喺港鐵站嗰啲)都應該得囉。

    回覆刪除