2012年1月9日星期一

熱氣球之旅

琴日喺報紙睇到一單好得人驚嘅新聞,十一個人喺紐西蘭南島遇到熱汽球意外,全部死晒。話說熱氣球降落時撞到架空電纜,然後著火焚燒,結果駕駛員同所有乘客(五對夫婦)無一倖免。話得人驚係因為熱氣球我都玩過兩次,不過就完全唔知道原來係要揾命博。

第一次玩熱氣球係喺土耳其奇石區(Cappadocia),而第二次就係喺肯雅瑪莎瑪拉草原(Maasai Mara)。玩熱氣球一來係貪新鮮,而且用鳥瞰角度睇奇岩怪石同野生動物,亦會有好特別嘅觀感。

事實上,坐熱氣球(其實係企)真係好過癮,同搭飛機完全唔同,係真正漂浮喺半空嘅感覺。雖然好玩,但係都幾辛苦吓架,因為要神咁早摸黑出發。熱氣球一定要喺日出前升空,如果太陽曬熱咗地面,氣流就會變得唔穩定,影響飛行安全。去到起飛地點,聽完一輪講解,又要等個熱氣球吹脹,真係少啲耐性都唔掂。雖然冇覺好瞓,不過喺半空睇日出又真係好正囉。

起飛過程一啲都唔簡單,淨係吹脹個氣球已經好考功夫,一唔小心就會連氣球都燒埋。飛行過程大約四十分鐘,跟住駕駛員就會揾地方降落。而家諗起先識驚,土耳其嗰次,降落地點又係有好多架空電纜,真係隨時死咗都唔知乜事。再諗番,其實肯雅嗰次都唔好得幾多。如果降落地點附近有獅子老虎,咁咪要變成猛獸嘅早餐?!又如果氣球跌咗落河,就實聽餵鱷魚都得嘞!

好彩,兩次降落都無驚無險。降落之後,等埋架早餐車嚟到,就可以享用高貴嘅香檳早餐嘞。不過啲食物就真係好失望囉,只係三文治之類嘅粗嘢,配香檳又點喎,就算有82年嘅罅Fit都冇用啦。哼,等我仲以為會有黑海魚子醬添!

咪話我大貪,事實上,玩熱氣球真係好貴囉。土耳其嗰次要千幾蚊,肯雅嗰次仲貴,要三千幾蚊,直頭係一個短線團嘅價錢!本來舊年喺坦桑尼亞都想玩多次,不過價錢實在太貴,要成四千幾,最後都係唔捨得。之前嗰兩次仲係用緊菲林機,大部分相都影到鬆郁朦,所以咪成日心思思想嚟多次囉。而家爆單咁得人驚嘅意外出嚟,睇怕以後都可死咗條心喇!

Balloon inflation, Cappadocia, Turkey

Balloon ride, Cappadocia, Turkey

Balloon ride, Cappadocia, Turkey

The pilot, Cappadocia, Turkey

We got our certificates, Cappadocia, Turkey

Balloon ride, Maasai Mara, Kenya

Balloon ride, Maasai Mara, Kenya

Zebras, Maasai Mara, Kenya

Deflated balloon, Maasai Mara, Kenya

Champagne breakfast, Maasai Mara, Kenya

10 則留言:

  1. 嘩!原來你係一個旅遊家嚟:)

    回覆刪除
  2. Ebenezer,
    哈哈,咪講笑啦,呢個世界點會有跟鴨仔團嘅旅行家啫!

    回覆刪除
  3. 點樣係荒山野外,擺檯放椅開餐?仲要用條紅檯布!

    仲有,咁樣放野出黎食,會引猛獸來分享。

    但係,你又無比獅子開餐,咁即係 ..... 嘻嘻!

    回覆刪除
  4. 佛爺:
    其實駕駛員一直有同早餐車保持聯絡,所以降落咗一陣,早餐車就到嘞。檯櫈同食物,當然係由早餐車運嚟啦。至於嗰張紅檯布,真係講起就嬲,巢掹掹咁,完全襯唔起個高貴嘅香檳早餐!仲有,我地食早餐嘅時候,有個陀鎗護衛侍候左右架,所以連獅子都唔敢埋身囉!

    回覆刪除
  5. 我畏高得緊要,哩樣完全吸引唔到我,不過自然又一樣少了很多人生樂趣。

    回覆刪除
  6. Coffee,
    講到畏高,真係好奇怪,以前完全唔會,而家就有少少。例如去到啲冇欄杆嘅懸崖,近年都唔會企到太出影相。

    回覆刪除
  7. 好 high 呀,坐完熱氣球原來係來食早餐!

    回覆刪除
  8. 啱啱有段新聞,笨豬跳斷繩都唔死,福大命大就無事架喇!

    回覆刪除
  9. 我是從劉朗兄出游過來的!

    在NZ沒玩balloon和笨豬跳,但坐直升機上冰川和激流噴射船,都是要簽生死狀!

    回覆刪除
  10. SKII,
    哈哈,直頭high到爆呀!尤其是土耳其嗰次,真係飛得好高好高!個早餐就唔係咁high嘞,食物只得三文治之類嘅粗嘢!

    laulong,
    如果係我就死梗嘞,就算唔俾鱷魚dap,都肯定會浸死,因為我根本唔識游水!

    space,
    哈哈,原來你都係玩得之人!紐西蘭真係好多嘢玩,直升機、噴射船、笨豬跳、white water rafting、skydiving、paragliding都玩過,想玩又未玩嘅就有mountain biking同滑翔風箏。

    回覆刪除