2011年12月18日星期日

髮型進化史

早兩日去剪髮,個飛髮佬又向我猛噴口水。都幫襯咗佢幾年,冇理由唔知我唔鍾意吹水啫,真係俾佢吹脹!

剪髮係我其中一樣好討厭但係又定期要做嘅嘢,所以我盡量會等頭髮長到忍無可忍先去剪,通常都係個半至兩個月先剪一次。除咗怕啲飛髮佬煩,我又好憎佢地喺我釣緊魚嘅時候,用一陽指篤我額頭。不過我咁討厭剪髮,亦可能係因為有啲童年陰影。

小學嗰陣對自己嘅髮型完全冇自主權,點剪法由老豆話晒事。嗰時好羨慕啲同學仔嘅蛋撻頭,而我就剪親都係短到同皮頭(skinhead)差唔多嘅陸軍裝或者紅毛裝。更甚嘅係要幫襯啲後巷飛髮鋪,雖然有公仔書睇,不過飛髮過程就俾啲路人甲乙丙到晒。剪到個頭咁肉酸,仲要一啲私隱都冇,感覺上就好似當眾凌遲咁,想冇陰影都難啦!

後來上到中學,老豆開放髮禁,喺髮型方面開始有少少自由度。雖然唔使再做光頭仔,不過亦唔係想點剪都得,所以嗰幾年基本上都係保持住個薯頭look。到入咗大學,真正嘅解放先至出現。可能係出於反叛心態,有段時間學人留長頭髮,留咗幾耐已經冇印象,淨係記得頭髮長到可以掂到膊頭。話時話,長毛飛唔係個個都適合做,長髮留得好睇嘅男人其實唔係咁多囉。而且大三嗰年開始做兼職,所以就轉番薯仔頭,仲一直維持到出咗嚟做嘢。

一來靜極思變,而且個薯仔頭又真係太薯,所以做咗嘢冇耐就學人玩電髮。啱啱電完髮感覺真係唔錯,型仔(當時覺得啦)之餘仲好易打理添。但係過得一個月就知大鑊嘞,頭髮長咗,鬆到成個波咁,十足Medusa重現人間,都咪話唔嚇人!所以電咗幾次之後,最終都係決定放棄。

雖然唔再電髮,但係亦冇回歸薯頭look,而係開始玩gel頭。嗰陣gel頭同而家有好大分別,唔會特登摷亂啲頭髮,而係將個頭蠟到變頭盔。而家睇番啲相都覺得恐怖,個頭蠟到高過ICC,而且仲有個向前凸出嘅大騎樓添,真係唔明點解嗰時會覺得好睇。講到呢個頭盔look,而家諗番起都怕怕,因為搞一次肯定要超過半粒鐘。首先要洗頭,用風筒吹到半乾,然後落mousse吹乾定型。跟住落gel再吹,直至個頭硬到鋼盔咁先大功告成,就算打風都吹唔散。其實我都唔想咁麻煩架,不過我啲頭髮天生企得好硬,唔用咁嘅程序唔掂囉。都唔知點解嗰時可以咁有恆心,朝朝返工前都搞啲咁麻煩嘅嘢。

後來個人越嚟越懶,亦覺得鋼盔頭太誇張,所以就放棄咗落mousse嗰個步驟,淨係用gel。而頭髮亦唔會留得太長,gel起嚟有啲海膽feel,其實感覺都唔錯。Gel頭嘅習慣維持咗十幾年,直至後來連嗰個簡化咗嘅程序都嫌太麻煩,就轉咗剪天天頭。

唔知天天頭係乜?其實好簡單,基本上係平頭,但係最前嗰一執仔就留到超長,而且要整到向上翹。呢個髮型易打理好多,就算落gel都係兩三下手勢就搞掂,而且唔用gel亦冇問題。不過自從冇喺中還返工,轉咗喺屋企附近剪髮,就冇再剪天天頭嘞。唔係唔想剪,而係轉過好多個師傅,竟然冇一個識剪天天頭。冇所謂啦,而家還原基本步,轉番剪平頭。人老咗就係咁架喇,對外觀已經唔會再咁執著囉。

不過咁,唔再執著並唔表示乜都冇所謂,有啲嘢到而家都仍然好堅持,例如我肯定唔會瞓醒覺未洗頭就走落街。又好似我接受唔到染到個頭五顏六色,以前唔得,而家唔得,將來亦唔得。我覺得,每個人都會有啲不可踰越嘅底線囉!






















9 則留言:

  1. haha, 0係街到, 仲未番屋企, 但忍唔住咯, Arma 有幾張好似張國榮啊, 有兩張心口好勁, 真係打得兩咀, 而且仲一定玩到震波 @@

    回覆刪除
  2. 嗱嗱嗱,「好似張國榮」,似讚定彈先!哥哥嗰個長髮披肩look,我而家諗起都打冷震囉!

    回覆刪除
  3. CHOK得起喎,尤其電線杆側跟嗰張,真係CHOK贏林峰!

    回覆刪除
  4. 黃色衫果張,個胸尖尖地嘅?

    回覆刪除
  5. 嘩!以Arma兄嘅姿色,我諗你D女朋友一定由尖沙咀排到去長沙環,仲要個個又霸尖又打交咁,你都咪話唔煩呀。。。
    Derek

    回覆刪除
  6. Coffee,
    哈哈,其實呢幾張都好正常架喇,更搞笑嘅相我仲有大把呀!

    minor,
    講開又講,最多人話似高雄囉!至於古天樂,我就唔覺得有邊忽似嘞!

    Ebenezer,
    嗱嗱嗱,你咁講即係懷疑我打假波啫!我可以用人格擔保,個騎樓由內至外都係真材實料,既冇利用填塞物僭建,亦冇借助外來結構承托架!

    Derek,
    哈哈,你好誇張啫,講到我仲勁過陳冠A!

    回覆刪除
  7. 講起巷仔鋪簡直係人間悲劇啦(淚)
    最恐怖係你鏟平頭無電剪﹐用把鈍剪鏟頭﹐簡直痛到哎救命!!
    班阿伯洗頭仲離晒罩﹐當你個頭唔係頭一樣!

    回覆刪除
  8. 文少:
    哈哈,照估你唔係我嗰代,應該未試過後巷飛髮鋪架喎!至於阿伯點洗頭就唔知嘞,因為我嗰時係齋剪嘅。

    回覆刪除