2011年12月13日星期二

邊爐怪再戰江湖

蟄伏咗接近一年,邊爐怪終於又再出動喇!呢排咁凍,烚吓烚吓都咪話唔盞,今晚已經係連續第四日喺屋企打邊爐。其實今日已經暖番好多,睇嚟今年都應該可以收工嘞。

我習慣一個鍋底打兩次,四晚啱啱好整咗兩個鍋底。頭兩日係用我最拿手嘅秘製花雕鍋底(之前已經介紹過),配料就以海鮮做主打。琴晚轉吓口味,整咗個比較冷門嘅番茄蘑菇豬骨湯底,效果亦相當理想。呢個鍋底唔算難整,不過材料就比較多,計有番茄、蘑菇、薯仔、紅蘿蔔、洋蔥、西芹、火腿、蜜棗、蒜片、Bay Laurel。淨係湯底材料已經ut實晒成個煲,都咪話唔震撼。不過大家有冇覺得奇怪,點解我反而冇提到主角之一嘅豬骨呢?好簡單,因為我用咗家落牌豬骨膿湯寶囉。如果用埋豬骨熬湯,睇怕要好似啲火鍋鋪咁,擺隻大鑊上檯先掂嘞。講開又講,有時我都會用同樣嘅材料煲湯,不過就唔會落蘑菇。當然啦,我煲湯唔會好似芝芝嬸咁用膿湯寶,而係會落牛骨或者牛腩。

至於火鍋料方面,我嘅原則係盡量唔重複,所以連續打四晚邊爐都諗到幾頭痕吓。以下就係呢幾次用咗嘅火鍋料:

今晚:龍躉、桶蠔、鮑魚仔、油麥菜、大蘑菇、番薯、粟米。

琴晚:手切急凍肥牛、鮮蝦滑、芝士腸、貢丸、墨魚丸、炸海鮮丸、魚肉釀豆卜、豆苗、番薯、響鈴卷。

前晚:扇貝、象拔蚌、大蜆、娃娃菜、豆苗、番薯、響鈴卷。

大前晚:虎蝦、膏蟹、墨魚滑、象拔蚌仔、西洋菜、茼蒿、豆腐、生根、炸芋頭。

雖然話火鍋料盡量唔想翻兜,不過豆苗、番薯、響鈴卷始終都係重複出現咗,因為呢幾樣嘢係我嘅至愛。其中響鈴卷係近來新寵,同生根係二揀一嘅火鍋最佳配角。響鈴卷有好濃嘅豆香,稍為淥一陣,口感就非常正。不過亦同生根一樣,都係好唔健康嘅食品,因為勁多油。冇辦法啦,鬼叫好食嘅嘢多數都唔健康咩!







9 則留言:

  1. 一個星期打四次?好多喎!要唔要連續一個星期飲涼茶當水飲先清到d熱氣呀?

    回覆刪除
  2. 睇到我流哂口水,你可以開火鍋店!看你此帖子,好似就快有得食咁!

    回覆刪除
  3. 真係睇到都想食呀!!

    回覆刪除
  4. 有種邊邊我諗你未試過,就係......打齋!!!

    天寒地凍去打齋,包你好食到冇朋友,哈哈!

    回覆刪除
  5. 嘩!D海鮮好正呀!!!呢餐喺街食閒閒地都過千啦!!
    Derek

    回覆刪除
  6. 哇,我睇見咁多食物就想暈,好重好重,我就黎要辟穀喇!

    回覆刪除
  7. minor,
    哈哈,叫得做邊爐怪,我梗係日日打都唔會有事啦!反而食親炸嘢,就會即刻中招囉!

    佛爺:
    開火鍋店就咪搞嘞,一來冇資本,而且又要勞心勞力,唔啱我囉!

    Coffee,
    擺晒出嚟就好吸引囉,不過背後嘅洗洗切切(尤其是啲海產),真係諗起都想死呀!

    Ebenezer,
    哈哈,年尾流流約人去打齋?俾人打一身就有份!

    Derek,
    二人份量,四餐夾埋啱啱一千蚊。如果喺街打,啲平價任食火鍋都差唔多係呢個價錢,不過就唔係呢啲料囉!

    laulong,
    咁講我就唔同意嘞,食係人生一大享受,如果因為健康而戒絕一切美食,做人仲有乜樂趣呢?其實我晏晝嗰餐已經食得好齋(粟米同生果),就係要留番啲quota,等夜晚嗰餐可以食七咁食!

    回覆刪除
  8. 哦,朝一暮六,咁都有解嘅!

    回覆刪除
  9. laulong,
    哈哈,好彩唔係朝三暮四同朝秦暮楚!

    回覆刪除