2011年12月8日星期四

白的疑惑

見到一條呈波浪形嘅不明白色毛髮,大家會有乜反應呢?等我估吓先,最大可能性係衝口而出爆咗句咁嘅嘢:「啋,真係大吉利是,以後仲使賭錢?!」

哈哈,大家可以放心,我絕對唔會衰格到摷啲污穢嘢出嚟害人嘅!其實呢條係頭髮,只不過形狀特別啲,比較似某啲部位嘅毛髮啫!

話說琴晚對鏡自憐,檢視吓有幾多白頭髮,竟然俾我發現部分白髮發生不尋常異變,呈現波浪形。搞吓搞吓,有一條仲甩咗添。

本來頭髮有少少弧度好正常,相信唔會有人嘅頭髮係完全直嘅囉。事實上,我一直知道自己有部分頭髮(主要係黑髮)弧度比較大,不過都只係單方向捲曲。而琴晚就發覺啲弧度大嘅黑髮唔見晒,代之而起嘅竟然係呈波浪形嘅白髮,感覺真係好怪異。

睇番條白頭髮,髮尾係尖嘅,好明顯係新生出嚟架啦。咁就有個疑問嘞,以後再生出嚟嘅白頭髮會唔會都係咁嘅呢?如果過多幾年,到時成頭白晒,咁咪好大鑊?!隨時會俾人以為我玩植髮,而且植到冇得再植,連某啲部位嘅毛髮都用埋添。

其實我都唔清楚自己幾時開始有白頭髮,淨係記得若干年前有一次剪髮,竟然發現啲頭髮碎幾乎係黑白參半。當時心情好難形容,話震撼又未至於,而係有啲異樣嘅感覺。自此以後,我都不時會留意吓啲白髮有冇多到,所以間中會對鏡自憐囉。

本來有白頭髮都好平常,我就識得有人喺中學時代已經成頭白髮。呢啲應該係遺傳因素,就算白了少年頭,都係等閒事,唔需要空悲切。不過對於啲波浪形白髮嘅出現,就令人有啲唔安樂,都唔知會唔會係踏入暮年嘅訊號。

仲記得先父晚年脫髮,甩咗再生番出嚟嘅,就係好似BB仔頭髮咁,柔軟而稀疏,仲有啲捲曲添。真係好奇怪,人生路去到尾段,竟然會出現番人之初嘅光景。究竟嗰啲波浪形白髮,會唔會係老人家當中嘅普遍現象呢?試過上網摷資料,不過就冇乜發現。

話時話,大家可能會覺得我小題大做,只係一條白頭髮啫,根本唔需要咁緊張。其實令我產生疑惑嘅,並唔係嗰條白頭髮,而係當中暗示嘅一個避無可避但係又唔想面對嘅事實:老之將至。而箇中感受亦好複雜,連自己都分唔清係好奇、迷惘、抑或恐懼。

記得細個時成日想快啲大個仔,到而家大個仔嘞,又想時光可以倒流,去番以前無憂無慮嘅日子。借用錢鐘書喺「圍城」嘅講法,人生就好似一座被圍困嘅城堡咁,城外嘅人想衝入去,城裏嘅人想逃出嚟。唉,究竟係邊個同我地開個咁大嘅玩笑呢?

11 則留言:

  1. 乜咁煩呀,白頭髮?搽左d咩呀?黃禁禁咁既?梳D美源髮彩啦,想逐漸變黑又得,立即變黑哂亦得!

    回覆刪除
  2. 哈哈,想逐漸甩又得,立即甩晒亦得!白頭髮啫,冇乜所謂喎,搞到脫髮先大鑊呀!

    回覆刪除
  3. 唉,人生白頭,我仲係接受唔到!

    回覆刪除
  4. laulong,
    接受唔到都要接受架喇,天命難違呀!話時話,睇你啲近照又唔見有白頭髮喎,你梗係用咗美源髮彩嘞!

    回覆刪除
  5. 有少少白頭髮咪仲有男人味,幾好吖。。。其實,每一個年紀都可以活得精彩嫁,最緊要係身體健康,唔信你睇下佢:http://www.esquire.com/features/don-wildman-0508
    呢個直情係我偶像嚟嫁!
    Derek

    回覆刪除
  6. Derek,
    嘩,75歲人仲要進行地獄式訓練,呢位唔止係「野人」,直頭係神人添啦!哈哈,不過呢啲咁辛苦嘅嘢就咪搞我嘞,而且,我都唔知會唔會有75歲命囉!

    回覆刪除
  7. 染髮梗有喇,不過唔係美源。

    到有一日唔再介意白頭,就真係不滯於物了!

    回覆刪除
  8. 見你寫白髮,不如賞下古詩詞。

    蘇軾 念奴嬌 赤壁懷古

    大江東去,浪淘盡,千古風流人物。
    故壘西邊,人道是,三國周郎赤壁。
    亂石崩雲,驚濤裂岸,捲起千堆雪;
    江山如畫,一時多少豪傑。
    遙想公瑾當年,小喬初嫁了,雄姿英發,
    羽扇綸巾,談笑間,強虜灰飛煙滅。
    故國神遊,多情應笑我,早生華髮。
    人生如夢,一尊還酹江月。

    回覆刪除
  9. laulong,
    哈哈,人地話男人嘅白頭髮係智慧嘅象徵呀,就睇吓任總,都不知幾型仔!

    Coffee,
    等我又揾番幾句先:
    莫等閑,白了少年頭、空悲切。
    縱使相逢應不識,塵滿面,鬢如霜。
    君不見高堂明鏡悲白髮,朝如青絲暮成雪。
    白頭搔更短,渾欲不勝簪。
    白髮三千丈,離愁似箇長。
    艱難苦恨繁霜鬢,潦倒新停濁酒杯。

    回覆刪除
  10. 你部相機好勁,咁幼條白髮都影得咁清晰!

    回覆刪除
  11. 佛爺:
    張相係大光圈手揸,已經打咗折扣架喇,如果用埋腳架仲清呀!

    回覆刪除