2011年12月6日星期二

揾笨

琴日去咗P街超市,本來係想買樽芝士粉,結果揾極都揾唔到,真冇癮!去開呢間,係因為佢最近屋企。不過自從幾個月前翻新過,啲嘢全部執晒位,到而家都仲未適應到。雖然揾唔到芝士粉,但係就另有收穫,喺條巷仔見到食開嗰隻賤格牌燕麥飯做緊特價,600g賣$23。咪講笑,即刻掃番幾包先!不過真係好白痴囉,食咗燕麥飯兩年幾,P街一直都係做緊特價$25,從來未見過佢賣正價$30,都唔知個特價有乜意義!話佢賤格亦有原因,煮一次飯大約要用50g,一包只係用到十二次,都唔明點解唔出大啲嘅包裝,方便吓消費者都好啫。我承認懶架,連開包都覺得麻煩囉!

跟住行番出大街,竟然又有重大發現,喺當眼位置見到隻新出嘅一公斤優惠裝。睇吓價錢,原來冇做特價,賣$48。雖然我係懶,不過喺呢種情況,做少少心算就點都唔慳得架喇。點知一計之下,唔止貴過600g裝啱啱做緊嘅特特價,連長期做開嘅特價都仲抵啲。真係可怒也,將貴啲嘅「優惠裝」擺出大街,P街分明係想誤導顧客啦,好彩我喺巷仔發現咗啲筍貨啫!

自問唔算一個好精明嘅消費者,因為我唔會周圍格價。而對於唔同嘥屎嘅同一產品,亦唔會計吓邊隻抵啲,因為常識話俾我知,嘥屎越大,單位價格應該會越低。點知原來貨品定價可以咁騎呢,真係隨時做咗傻仔都唔知囉。不過都係自己懶,咁又怪得邊個呢?!

講到買得多反而仲蝕底咗,最近有單嘢就真係好激氣。一直幫襯開一個相熟嘅街市豆腐檔,其中鳳尾蝦(見圖)同牛丸都係每次買一斤,雪喺冰格慢慢食。講開又講,鳳尾蝦真係幾好食架,就算急凍過都仍然爽口彈牙,魚蛋魚片之類就唔得嘞。而且仲好方便,唔使解凍就煮得,我主要攞嚟煮麵。話說早排啲鳳尾蝦食晒,就去豆腐檔入貨。我啱啱講完要買一斤,隔籬有個師奶就無啦啦插嘴,同豆腐婆講唔知道鳳尾蝦可以斷斤買,仲問一斤賣幾錢。佢又話平時喺度買開十蚊四條,唔知係咪買貴咗喎。呢位師奶都算幾冇禮貌,係問都等人地秤完俾我先啦。點知豆腐婆竟然停晒手,應酬咗個師奶先,話鳳尾蝦賣$40一斤,散買十蚊四條肯定抵啲。師奶似乎好滿意呢個答案,即刻買咗四條。

俾個師奶打尖,其實我已經有少少不滿,不過聽完豆腐婆同佢嘅對答,就更加唔舒服,唔通豆腐婆一直揾緊我笨?返到屋企數一數,一斤得十五條,果然係散買抵啲!真係把幾火,揾笨都唔緊要嘞,最㷫係豆腐婆竟然當住我面講出嚟,等同兜口兜面話我係傻仔囉!喺呢單畸屎,豆腐婆直頭犯咗三宗罪。一,俾師奶打尖,違反咗公平購物原則。二,定價策略荒謬絕倫,散賣竟然平過斷斤賣。三,喺客面前講出佢做咗傻仔嘅事實,完全冇顧及對方嘅自尊心。

其實我都算係熟客啦,每個禮拜起碼會幫襯呢個豆腐檔一兩次,估唔到咁都揾笨。我而家仲考慮緊,以後應唔應該再幫襯佢囉。抑或下次買嘅時候,講明$40要有16條,當係分四次散買呢?最衰我係一個面皮薄嘅麻甩佬,買嘢從來唔會講價,覺得價錢啱就買,唔啱就唔買。唉,睇嚟都係要做硬傻仔架喇,不過留番啲餘地,唔好當面插爆我囉!

事實上,麻甩佬去街市買餸,真係難逃俾人揾笨嘅命運,就算幫襯相熟檔販都係咁話。俾人呃秤唔在講,仲成日會買到次貨。啲魚佬菜婆次次都話幫你揀啲正嘢,其實只係想清咗啲籮底貨,因為嗰啲貨色根本就逃唔過精明師奶嘅法眼。例如有一個相熟魚佬,成日推介佢啲海青斑,不過次次食落都係好普通,搞到我對青斑冇乜好感。有次喺另一個魚檔,魚佬又係極力推薦一條海青,咁我當然係耍手擰頭啦。魚佬就話真正海青其實少之又少,平時喺街市買到嗰啲,十條有十一條都係養嘅。見佢講得咁實在,就買條試吓啦,不過價錢真係貴好多。試過之後,先知道原來一直都俾人呃,呢條青斑同以前食開嗰啲比較,簡直係判若雲泥。我話俾人呃,唔係指價錢方面,而係魚佬唔應該將養斑講成海斑囉!

忽然又諗起「就係唔幫襯地產商」嗰個光頭仔添,佢話自己淨係幫襯啲鋪頭仔,因為人地有人情味,唔會揾熟客笨喎。唔通佢真係咁好彩,未試過俾啲鋪頭仔揾笨?咁當然冇可能啦,以佢咁簡單嘅頭腦,就算俾人揾咗笨都永遠唔會發覺囉。就嚟四十歲人,竟然唔知乜嘢叫做唔熟唔食,條友都算係天生異稟喇!

話時話,其實我覺得啲思想單純嘅人都幾幸福架。佢地嘅世界黑白分明,判辨忠奸完全冇難度,因為奸人額頭都會鑿住個「奸」字!佢地唔使處處提防俾人暗算,生活壓力自然少好多啦!不過咁,我又唔會羨慕佢地喎,俾人呃吓秤就冇所謂啫,如果俾人跣鋪大大鑊嘅,隨時永世翻唔到身架!





9 則留言:

  1. 既然你知道麻甩佬去街市買餸,真係難逃俾人揾笨嘅命運,點解你唔去搵個煮飯婆幫你去買餸煮飯?計落有著數喎!

    BTW,點解你去買餸嘅街市寫韓文嘅?

    回覆刪除
  2. Ebenezer,
    哈哈,因為我煮得一手好飯囉!如果係由第二個煮,起碼我自己就食唔落嘞!至於啲街市相,當然係旅行嗰陣影架啦,如果攞住部單反嘅本地街市影相,我會覺得好樣衰囉!

    回覆刪除
  3. 我覺得逢親要秤的,那些人都呃人嘅!

    btw,以便,韓國街市梗係寫韓文啦!

    回覆刪除
  4. Coffee,
    我覺得啲魚佬菜婆係專揀男人呃秤架,一來男人好呃啲,而且就算事後知道俾人呃咗,多數都只係暗啞抵,好少會追究囉!

    回覆刪除
  5. 街市呃鬼你好正路咯,我都俾人呃唔少,光頭仔不明就裏,永世自我感覺良好,咪由佢永世俾人呃咯!

    回覆刪除
  6. laulong,
    所以話呢,從另一個角度睇,光頭仔其實都幾幸福架,日常接觸到嘅都係好人。唔好理佢係咪發緊夢,只要呢個夢一日唔醒,佢一日都會覺得自我感覺良好囉!

    回覆刪除
  7. 我覺得賣蝦個豆腐婆﹐實在太脆緻啦﹖
    個腦咩構造呢ga﹖點做生意ga﹖
    我老死都話斷斤買梗係平D﹐然後說個師奶買一斤啦﹖

    回覆刪除
  8. 至於個光頭仔﹐人家要靠插李超人上位﹐兼已經出左位嘛﹖
    比人呃秤﹐或者行街市有機會跣到眼癱癱呢類事﹐梗係唔會同報紙佬講﹐啞子食黃蓮啦﹖

    回覆刪除
  9. 文少:
    哈哈,我就相信豆腐婆係擔屎唔偷食嗰隻囉!至於個光頭仔就更係極品,我估佢食黃蓮都唔會覺得苦架!

    回覆刪除