2011年12月3日星期六

兩個爛蘋果,你會點揀?

有人話下屆凸首選舉係豬狼對決,真係極盡戲謔之能事,夠晒抵死。雖然呢個講法體現咗香港人自嘲嘅黑色幽默,不過就似乎悲觀咗啲。對於一啲避無可避嘅嘢,與其消極自嘲,不如樂觀面對。日子開心又係咁過,唔開心又係咁過,做乜硬係要難為自己呢?如果參考唐唐嘅金句,將凸首選戰睇成係龍馬之爭,咁都未嘗不可啫,因為震鷹哥係屬馬囉。車水馬龍同龍馬精神都係好嘢,寓意社會繁榮昌盛,人人精神奕奕,係咪正面好多呢?

不過咁,對於好多人嚟講,唔理係豬狼抑或龍馬,嗰兩位凸首候選人其實都只係爛蘋果,都揀唔落手。當然啦,絕大部分香港人都唔係選委,根本冇權揀。有部分人就好彩啲,可以揀選委,都叫做有間接嘅選擇權。而家就當你係選委,咁究竟兩個爛蘋果,你會點揀呢?

我當然唔係選委,亦冇權揀選委,要解答上述問題就只可以憑空想像。作為選委,投票取向不外乎基於兩個原則。一,根據界別選民意願去揀,扮演純粹代表嘅角色。二,按照主觀取向作選擇,咁係建基於選民嘅信任。熟優熟劣好難講,不過如果係後者,就應該清楚俾界別選民知道自己嘅理念,對下任凸首有乜要求。

正當兩位凸首候選人各出奇招,鬥個你死我活,另一邊廂嘅選委爭奪戰亦不惶多讓,進行得如火如荼。因為有朋友係某界別選民,我對該界別選委候選人嘅競選綱領都略知一二。大部分候選人嘅政綱都係由爭取業界權益出發,不過咁唔代表佢地冇政治取向,因為從佢地所屬政團或組織已經可以睇到。另外有三幾個就淨係表明自己嘅政治立場,並冇提及有關業界嘅議題。咁當然冇問題,其實都只係從一個較為宏觀嘅角度出發啫。不過其中有一位就比較特別,可以攞嚟講吓。

呢位候選人嘅政綱好簡單,重點只有兩個。一,只會提名同投票俾泛民嘅凸首參選人。二,如果凸首候選人之中冇泛民代表就會投白票。佢嘅理念係:等待中央祝福嘅參選人都係爛蘋果,與其用選票提高爛蘋果嘅認受性,不如以白票嚟表達無權者嘅不滿。

首先,我欣賞佢夠坦白,毫無保留咁表明自己嘅取向。不過對於佢嘅理念,我就不敢苟同。所謂「甲之蜜糖,乙之砒霜」,得到中央祝福嘅係咪就係爛蘋果,咁就見仁見智嘞。我只知道,基於客觀條件,得唔到中央祝福嘅凸首,對於絕大多數香港人嚟講,肯定係毒蘋果囉!相對於爛蘋果,毒蘋果可能好睇好多、好味好多,不過食咗會死人架!

仲有,如果凸首候選人當中冇泛民代表,係咪就應該頭白票呢?以白票表達不滿,只會喺一種情況下有意義,就係投票俾任何候選人都唔會起到正面作用。究竟實情係咪咁呢,投票俾爛蘋果真係一啲好處都冇?

就算兩位凸首候選人都係爛蘋果,都實會有一個比較爛,一個冇咁爛啫。如果想未來幾年,香港相對上會好啲,咪揀冇咁爛嗰個囉。如果想元旦七一遊行墟撼啲,就要揀比較爛嗰個嘞。咁點會話冇得揀呢,主要係睇你想要點嘅效果啫。話投票會提高爛蘋果嘅認受性,咁都講唔通,因為根本冇乜人會覺得呢個凸首選舉遊戲有認受性囉。而且以投白票表達不滿,亦冇任何意義。再下屆嘅凸首已經係由普選產生,以非理性行動嚟表達對一個即將被淘汰嘅制度嘅不滿,根本就係除褲放屁!講到尾,嗰位候選人只係想宣洩不滿情緒,態度非常消極囉!

要積極爭取一個選委席位,目的淨然係代表業界放棄爭取,咁嘅做法唔止消極,仲好矛盾添。與其採取放棄態度,不如積極啲為自己著想,用對腳投票啦!我指嘅唔係去遊行,而係移民囉!

如果呢位候選人成功當選,我對有關界別真係無話可說,對香港嘅未來亦會冇晒信心!至於呢個係乜嘢界別,我就唔講嘞,你地自己估吓啦!

5 則留言:

  1. 你同我都做唔到選委,個蕷果爛唔爛都唔到我地管。

    不過,又用另一個角度睇,若跑出泥嘅爛蘋果被港人極不接受,香港嘅穩定會好有問題,呢㸃,我諗阿爺唔會最理嘅,因此,曲線地,最後係邊個跑出,民意應該具有一定嘅影響力。

    回覆刪除
  2. 唔到唔悲哀,二個爛蘋果,然後其中一個仲有毒!

    回覆刪除
  3. Ebenezer,
    我相信阿爺俾選委嘅自由度其實好大吓,不過會唔會有啲選委硬係要揣摸上意就好難講嘞。不過咁,對於嗰啲擺明車馬對著幹嘅候選人,阿爺梗係唔會接受啦!

    Coffee,
    其實喺任何制度之下,都保證唔到參選者嘅質素。就算所有候選人都係爛蘋果,只要當選嘅係冇咁爛嗰個咪得囉!

    回覆刪除
  4. 我始終覺得梁蘋果好過唐蘋果,一個人有冇料聽其言就知了,唐蘋果日日搞笑話,只一個混人而已,梁蘋果有說服力好多!

    回覆刪除
  5. laulong,
    震鷹哥手段高明好多,就算做唔到實質嘢,起碼都招架得住班扮民政棍,唔使我地睇到咁眼冤囉!

    回覆刪除