2011年8月14日星期日

三入急症室(2)

上回講到早幾日去急症室睇醫生,結果搞咗成六粒鐘。喺急症室要等到變化石先見到醫生,呢樣就係人都知。至於等六粒鐘值唔值得,咁就真係見仁見智嘞。

其實等嘅時間都係一種成本,最簡單嘅方法係以最低時薪$28計算。當單喺私家診所可以一粒鐘搞掂,咁去急症室嘅成本就係$100+5x$28=$240,仲未計要搭的士去。雖然仲係比私家診所平少少,但係如果計埋喺急症室悶到發瘟咁等多五粒鐘造成嘅精神折磨,根本就一啲著數都冇。事實上,我係喺私家診所越搞越大鑊,都唔知係咪感染到啲抗藥性超級惡菌,所以先去急症室。始終對香港嘅公營醫療比較有信心,就算等耐啲都唔介意。

不過咁,喺急症室等到媽媽叉叉嘅都大有人在。有兩個原本三九唔識七嘅男人,可能因為等得太悶,無啦啦就咁傾起上嚟。喺咁嘅情況,話題當然離唔開急症室服務啦。佢地一致認同,就算冇病都會等到病。佢地又講到如果啲菲傭爭取到居留權,肯定會迫爆急症室。呢樣我又有同感喎,如果單真係成事,急症室絕對係首先淪陷嘅地方!就當日所見,非華裔求診者就佔咗接近兩成。雖然我唔知啲少數族裔佔香港人口嘅確實比例,不過就好肯定冇兩成咁多。聽啲醫生叫名先搞笑,讀到甩甩咳咳,真係懷疑啲少數族裔求診者會唔會聽得明。

最近大狀黨因為幫外傭爭取居留權單,俾人鬧到狗血淋頭。佢地就話係啲政敵抹黑,誇大咗單對香港公共資源造成嘅潛在壓力。班友身嬌肉貴,就算睇病都係去私家醫院,當然唔會知道急症室嘅walk-in clinic係乜世界啦!

雖然等成幾粒鐘真係悶到嘔,不過其實急症室都幾多睇架,我指嘅係人生百態。坐低咗冇幾耐,就見兩三個差人夾住個金毛飛入嚟,跟住又見另外兩三個差人同一個中年女人入埋嚟。原來係家暴事件,個仔喺屋企發神經,阿媽阻止嘅時候發生糾纏,混亂中兩母子都受咗傷。後來有人報警,結果齊齊入急症室驗傷。為免佢地喺急症室再大打出手,嗰兩母子要分開坐,五六個差人分成兩批,分別傍住佢地。

件金毛大約二十歲,一睇就知唔係好人,喺大庭廣眾(包括阿sir面前)不停un身un勢,個格有啲似嗰位淫照事件嘅男主角,不過個樣就差天共地,絕對係樣衰格衰嗰隻!個女人咁啱坐咗喺我附近,所以佢同差人嘅對話都聽得好清楚。原來係兩母子相依為命,阿媽含辛茹苦養大個仔,不過阿仔就好食懶飛,成日打交生事,上差館多過上酒樓。咁都不特止,阿仔仲成日攤大手板攞錢,滿足唔到佢嘅需索就發晒癲咁喺屋企搗亂。阿媽聲淚俱下咁同差人哭訴,話為咗個仔搞到破過產、攞過綜援,唔明點解阿仔會當佢係仇人。難得幾位阿sir又有耐性聽佢講啲不斷重複嘅,仲關懷備至咁加以安慰同輔導,連社工嗰份都做埋。

講講吓,個女人忽然情緒激動起嚟,晒地之餘,仲話要生要死添。一眾阿sir即刻大為緊張,有啲㩒住佢,有啲就安慰佢。事件發展成咁,當然馬上吸引晒候診室所有人嘅目光,只有一個除外。隔冇幾遠嘅阿仔竟然氣定神閒咁同唔知邊個傾電話,對單完全視若無睹!

跟住我就被召咗入醫療室處理傷口,出番嚟已經唔見咗嗰兩母子,應該係輪到佢地驗傷。之後嘅就無從得知,亦冇興趣知。阿仔係人渣當然毫無疑問,不過我亦唔會覺得阿媽好可憐。做咗幾十年人,有一樣已經睇通晒,就係有果必有因!喺呢單裏面,我反而關心公共資源有冇浪費。咁嘅都要搞成幾粒鐘,仲要全程由五六個差人傍實,我就覺得係浪費警力嘞。喺得急症室嘅walk-in clinic等,都係非緊急或者次緊急嘅症,就算再等多一陣都唔會有大問題,我自己就完全唔介意俾佢地兩母子打尖嘞。唔係話要特別優待佢地,我只係覺得唔值得為咗啲咁嘅嘥晒警察嘅時間。

喺香港呢個人權大晒嘅社會,浪費公共資源嘅情況真係無處不在。就以急症室為例,而家只係收一百蚊,以前仲免費添,call白車又唔使錢,有乜可能唔俾人濫用呢?!記得嗰時政府提出急症室要收費,一班為民請命嘅尊貴議員同啲病人權益組織曾經大力反對。佢地話咁會令啲低下階層有病都唔敢去醫院,係草菅人命。呢班友提出嘅理據當然係荒謬絕倫,不過當時又真係有好多人buy喎。點解荒謬絕倫?就等我分析吓啦。

輪街症都要俾錢,反而call白車去急症室就免費,啲人梗係事無大小都直接去急症室啦,咁仲唔係鼓勵濫用?!當然啦,班友絕對唔會同意有濫用嘅情況,因為佢地覺得香港人個個都係好公民。好,又當冇人會濫用。不過班友講到話有人會因為嗰一百蚊而唔去求醫,咁急症室唔收錢,又係咪間接鼓勵啲人有病唔去輪街症,要等到小病變成大病先去急症室呢?!仲有,政府已經講到明有困難嘅人會獲得豁免,都唔知班友仲有乜好嘈!

最後,如果真係有人會為咗慳番一百蚊而攞自己條命做賭注,我只可以奉勸佢地一句:萬般帶不走!

圖片說明:
張相係啱啱拆完線嘅頭頂,因為過份血腥,驚住會引起觀眾不安,所以就用Photoshop搞咗兩。仲有,頭頂出現嘅疑似地中海,其實係縫針之前俾人剃嘅,絕對唔係男人最痛嗰隻!

5 則留言:

  1. 你對所見聞的人生百態描寫得很到位,讓人親歷現場般。

    好在你有張小圖相,如果唔係,被你PS過後,都唔知係咩嚟架:P

    回覆刪除
  2. 你的頭頂影像,似磁力共振掃描多D。嘻嘻!

    回覆刪除
  3. coffee,
    其實嗰日仲有一單好搞笑架,有個阿嬸向當值醫生投訴另一個醫生,不過好多細節都唔記得咗,所以冇得寫。都唔知點解,呢幾年啲記性真係差咗好多!

    佛爺:
    哈哈,係呀,我係特登執成咁架!

    回覆刪除
  4. 急症室見盡人生百態!

    這個社會有病,再加上啲政棍訟棍,蒼穹之下就成了個活脫脫的急症室!

    回覆刪除
  5. laulong,
    我就再睇得悲觀啲,其實呢片土地已經變成停屍間,因為香港精神已死!仲未可以入土為安係因為個個都仍然喺度吵鬧不休:有人想救番生佢、有人要做死因研究、有人混水摸魚大發死人財、不過最多人係喺度等緊分身家!

    回覆刪除