二十八個半

琴晚睇新聞，話臨時最低工資委員會已經就建議最低工資水平達成共識。雖然發言人唔肯講係幾多，不過有消息話係介乎28到29蚊之間。

唔係事後孔明，我一早就估係28蚊啦，使乜搞咁多啫！資方話唔可以高過24，勞方又話企硬33，分歧真係好大。其實世界上邊有企硬呢回事？！兩個數字加埋除二等如28.5，唔要個零頭就係28。而且香港人好鍾意28，貪佢諧音易發，好意頭。

其實應唔應該就最低工資立法，我當然有自己嘅睇法，但係我唔敢講，驚會俾人打。而家有個數字出咗嚟都好，起碼唔使日嘈夜嘈，樂得耳根清靜。最頂唔順係成日聽到人鬧僱主無良，係吸血鬼。你諗吓，如果20蚊一粒鐘嘅工都大把人爭，佢地做乜要用33蚊嚟請人？香港係一個自由經濟體系，工資同商品價格都係由供求關係決定，唔係話商人想幾多就幾多。而且作為牟利機構，佢地想賺到盡又有乜唔啱？

又講返轉頭，最低工資亦都唔係乜洪水猛獸，睇吓定喺邊個水平啦。觸發結業潮云云，真係靠嚇。無可否認，可能有效率低、缺乏競爭力嘅中小企會執笠。呢個係自由商業社會嘅正常現象，經自我調節，好快就會去返平衡狀態。喺電視新聞裏面，有酒樓發言人話實行最低工資後會加價。呢個講法好合理，絕對可以預見。但係茶客就話酒樓唔應該將增加嘅成本轉嫁俾消費者，應該由企業自己承擔。真係唔明人嘅思維，唔通人地蝕本都要為你提供飲食，你當人地係善堂咩！如果你覺得貴，咪唔好幫襯佢囉。

至於最低工資點先算係合理水平，有意見話唔應該低過攞綜援。呢點我又同意喎，如果每日做足十粒鐘仲得少過攞綜援，捱得咁辛苦究竟為乜？不過呢樣係相對嘅，你話係而家人工太低又得，話係綜援太高（或者俾得太濫）都得。我就唔敢講嘞，費事又俾人打。

我唔係喺度講風涼話，更加唔係唔知民生疾苦。其實我細個時屋企都好窮，而且當時基本上係冇社會福利，生活條件比而家受綜援網保護嘅人仲要差好多。唔只玩具都冇多件，衫都係執親戚唔要嘅舊。放學之後要幫手穿膠花，學彈琴同埋學畫畫之類嘅興趣活動真係諗都唔敢諗。講真，我最有資格抱怨，因為呢都唔係我揀嘅。但係我冇，因為我明白一味埋怨係唔會令生活得到改善。

凡事總有因果，唔係所有都係政府或者社會嘅錯。低薪勞工問題嘅癥結，係人口結構同產業結構嚴重失衡。希望嗰有識之士可以喺呢方面做吓，而唔係獨沽一味幫草根階層爭取福利。至於點解會有咁嘅失衡情況我就唔知嘞，只係覺得呢個係死症，冇計。不過咁，如果一個普通市民都諗得掂，仲要班高官同尊貴嘅議員嚟做乜？