2010年3月31日星期三

𡃁仔

琴日睇咗一篇blog文, 講家陣𡃁仔返工諸多埋怨, 真係好有共鳴.
其實𡃁仔有問題都唔係呢幾年嘅事, 十年前喺舊公司已經見唔少. 佢地主要嘅問題係: 自我中心, 目光短淺, 同埋冇責任感.

𡃁仔成日埋怨人工低, 覺得自己唔止值咁少. 佢地會根據自己嘅評估, 覺得人工係應得嘅五成就交五成貨. 而家當上司盲嘅咩, 結果升職加薪咪冇佢地份囉. 呢就係目光短淺. 受得工司份糧又冇盡力去做, 就係冇責任感. 其實盡力做好對自己都有好處, 一來上司會睇到, 自己又可以吸收多經驗. 其實嫌人工少咪過第份囉, 真係唔知𡃁仔點諗!

以前喺廣告公司做, 不過係後勤部門. 因為嗰行人特別鍾意玩跳槽, 所以張顧傭合約比較辣, 辭職要兩個月通知. 有日有個𡃁仔遞信俾我, 話到份新工, 仲問我可唔可以早放佢走. 梗係得啦, 補錢俾公司囉. 點知佢好慘情咁, 話唔想賠錢, 仲話張約好唔公平, 出面根本冇公司肯等兩個月, 即係叫人成世唔使轉工啫. 真係俾佢吹到啤一聲! 份約又係你自己簽嘅, 你簽約嗰陣唔知要兩個月通知嘅咩? 換轉係公司即炒你, 公司都要補返兩個月糧俾你啦, 所以份約絕對公平. 跟住佢就問點解之前阿邊個可以早走又唔使賠錢, 話我分明玩佢. 又係啤一聲! 玩你? 你估我好得閒咩, 定係你覺得自己好好玩? 之前放阿邊個走係因為請到人替佢個位, 而家部門仲有另外一個空缺都未請返, 有乜可能會放你走呢吓? 想我幫你? 你又試吓喺我嘅角度睇, 你辭工即係炒公司魷魚, 喺部門人手短缺嘅時候咁做即係攪我檔攤, 點解你又唔可以幫吓我呢? 個𡃁仔卒之冇聲出.

如果到另一份好工, 人地又肯等一個月嘅話, 咪賠返一個月糧俾公司算囉, 使乜搞到搲爛塊面呢? 相對於以後嘅大好前/錢途, 一個月糧溼溼碎啦. 如果真係覺得留喺度好冇前途, 不如索性遞咗信先慢慢, 有同事真係咁樣做架. 所以話呢, 𡃁仔真係目光短淺.

其實我又冇怪佢. 佢平時做好有交帶, 間中仲有user表揚吓添, 只係思想唔多夠成熟啫.

呢個都算好喇, 另外有一個仲吹漲. 佢又係遞咗信想早走, 仲話其實公司夾硬留多佢一個月都冇好處, 因為佢都唔會有心機做. 吓, 而家你算係恐嚇我呀? 雖然佢冇講到明, 不過我梗係get到佢嘅意思啦. 冇心機做就會好易出錯, 到時搞衰咗就唔好啦. 真係俾佢吹到啤啤聲! 一日受緊公司份糧, 就要俾心機做啦, 一責任感都冇! 佢都唔諗吓, 以佢咁嘅態度, 封reference letter都唔慌會有好啦. 而且有公司仲會員工嘅舊顧主問返佢嘅添. 咁樣搲爛塊面又有乜好處呢? 有時真係俾𡃁仔激到嘔血!



沒有留言:

發佈留言