2014年7月2日星期三

烏合之眾

622公投有78萬香港人投票支持「公民提名」,本人一啲都唔意外。主辦單位當然認為空前成功,話數字說明咗港人對「真普選」嘅強烈訴求喎,究竟事實係咪咁呢?

78萬呢個數字肯定存在相當水分。票數只有極小部分係嚟自實體票站,要喺網上或手機投票出術,真係話都冇咁易。只靠身分證號碼同電話號碼把關,投票人年齡check唔到,身分證號碼係咪合成嘅又check唔到,你想點玩都得啦。而家連小學雞都有手機,咁啱啲未夠秤(未滿18歲)嘅細路又係比較激嘅一群,你估佢地會唔會乖到唔投票?根據網上資料,香港流動電話數目差唔多係全港人口兩倍。好似啲的士佬咁,五六部手機一字排開,如果要投票,你又會唔會相信佢地誠實到只係投一次?仲有,只要屋企有一個佔中粉屎,亦好可能會冚家「被投票」。水分有幾多真係好難講,如果話有五成都唔出奇,不過點都唔會係主辦單位講嘅微不足道囉。

71遊行,主辦單位話最少有51萬人參與,比舊年多一萬。警方就話高峰期有9.86萬,而「港大民研」同港大學者葉兆輝嘅數字分別係17.2萬同12.2萬。民陣年年作到狗咁大,呢個已經係不爭嘅事實,本來唔需要再攞出嚟講。本人奇怪嘅反而係點解班友今年會咁克制,作得51萬咁少囉。

622公投都有78萬人表咗態,佢地冇理由唔行晒出嚟瞓身支持啫。當然啦,可能有部分人琴日要返工,又可能有部分人不良於行唔能夠參與。不過另一方面睇,有大量622冇得投票嘅人(例如未夠秤或非香港永久居民)補充,而且71遊行涵蓋嘅議題更廣,人數點都冇可能得咁少囉。由此可見,622公投嘅水分可能比我想像更嚴重。究竟主辦單位喺622公投有冇作data,因為冇實質證據,本人就不予置評嘞。

講真,承接622公投嘅聲勢,民陣起碼要作到80至100萬先算「合理」。而家只係作得51萬,相信係政治上嘅折衷。根據往績推斷,如果遊行人數有40萬,班友一定敢作夠100萬。按合理推測,實際遊行人數一定好少,可能連20萬都唔夠,所以民陣都唔敢作得太大。

不過點都好,遊行人數一定唔可以少過50萬。首先,今年有東北發展爭議、622公投、一國兩制白皮書等大單嘢催谷,如果公布嘅數字竟然少過舊年,民陣無異政治自殺。再者,50萬呢個數字亦別具意義,說明咗當前形勢可以同2003年香港嘅歷史性黑暗時刻相提並論。民陣將舊年71遊行人數由43萬「修正」為50萬,顯然亦有考慮咗其中歷史意義。幾理想丫,舊年50萬,今年51萬,更上一層樓。跟住出年52萬,後年53萬,每年加一萬,有排先到700萬啦,簡直長玩長有呀。

其實民陣年年老作,真係鬧佢都嫌嘥氣。不過班友細眉細眼,全無大家龜獸風範,咁就唔批評吓唔得嘞。啲數字刀斧痕跡咁明顯,可謂「司馬昭之心,路人皆見」,欺瞞公眾嘅意圖已經無從掩飾。講真,班友嘅狼子野心,俾我地呢啲路人甲乙丙見到根本就冇所謂,只要班同路人見唔到就得啦。古人講得好,「量小非君子,無毒不丈夫」,又唔係第一次造數,點解唔索性造大啲呢?今年作到80萬,出年作夠100萬,要信嘅人仍然會信。就算作到超過香港人口都冇問題,因為有大量反共自由人湧落嚟參與囉,只要求其俾個解釋,熱愛民主嘅香港人一樣會相信。又要作大,又要畏首畏尾,搞到啲數字咁expected,可謂欲蓋彌彰!

所以話呢,民陣班友只不過係烏合之眾,腦筋同啲小爬蟲差唔多,實在難成大器!

National Museum of Anthropology, Mexico City, Mexico

10 則留言:

  1. Arm:

    呢班友喺度玩緊細胞分裂遊戲.今日有唔少人講,至少130萬人!我見過最離譜嗰個,話有七百至八百萬人.成班友,第日最好去研究天文學,數星星.嘻嘻!

    回覆刪除
  2. Armadillo:

    有關622公投的準確性,在審計角度來看,是不能被確認得到的。

    回覆刪除
  3. 佛爺:
    哈哈,所以話民陣班友死蠢囉,橫掂作到幾大香港人都會信架啦!話時話,香港人肯定具備做科學家嘅條件。事實上,佢地已經做到一半,係「大膽假設」嗰半!

    Ebenezer,
    可惜誠信度亦冇辦法從審計角度確認!系統明明存在極大漏洞,班德高望重嘅發起人仍然敢話無損公投認受性,簡直全無誠信可言!

    回覆刪除
  4. 政治方面的東西真係我嘅死穴,腦汁用盡都想不出個所以然。

    回覆刪除
  5. 哈哈,我 click 入嚟之前睇錯咗做“鳥合之眾”!

    我年輕時(八九六四)好 buy 民主黨,但近年佢地愈嚟愈不知所謂!

    回覆刪除
  6. Coffee,
    對政治唔感興趣絕對係好事,證明你尚算滿意而家嘅生活囉。

    S,
    哈哈,我用拼音輸入,係冇可能會鳥烏不分架!民主黨可謂進退失據,佢地放棄中間選民,但係要爭激進選民又輸九條街俾癲狗長毛之流,注定失敗收場。不過都唔怪得晒佢地,呢個係香港兩極化嘅必然結果。

    回覆刪除
  7. 年年作假,愈吹愈大,我都俾佢地吹到有啲麻木咯!

    回覆刪除
  8. laulong,
    哈哈,越吹越麻木,咁就證明你係一件老餅啦!你睇吓學聯班細路,一個二個俾人吹到高潮迭起,都不知幾過癮!

    回覆刪除
  9. 老餅同強勁,見仁見智 XDDD

    回覆刪除
  10. laulong,
    哈哈,其實老餅同強勁並無衝突,因為「老而彌堅」呀!仲有,啲後生仔一觸即發,跟住無以為繼,真係隨時唔夠我地呢啲麻木嘅老餅強勁囉!

    回覆刪除