2014年1月23日星期四

小一入學題?

連續鏟咗日月報幾鑊,不過都仲未諗住換畫。始終睇咗咁多年,點都有啲感情囉。尤其是去屎坑,冇佢陪住真係覺得好空虛架!

早兩日睇日月報又發現咗一單過癮嘢,明明唔係教育版,不過就登咗一段英文。段嘢最尾仲有咁嘅一行中文:聖方濟各小一入學題(見下圖)。如果想知道自己有冇小一英文程度,咁就唔好睇埋落去住,試吓解答呢條問題先啦!

雖然自問英文好屎吓,但係斷估都有band 2學校中三程度囉。小一入學題?簡直不屑一顧啦!唔係喎,橫掂都要等運到,試吓都冇壞啫。點知睇清楚,當堂俾佢嚇親。唔係啩,小一入學題?!可以好肯定,就算中一嗰時,我連條題目問乜都未睇得明囉,莫講話要答啦!不過咁都好,有番少少挑戰性。

初初主攻頭兩句,真係俾佢考起,竟然完全冇頭緒添。太抽象喇,都係轉攻第三個空格。食得嘅,應該會實質啲啩。弊嘞,仲係諗唔到。都係唔好再嘥時間,跳去最後嗰個空格先。12345,bingo!

雖然只用5秒就攻破最尾嗰個空格,但係頭尾總共用咗成兩分鐘先答到呢條題目。相信好多人考試都係咁,鍾意順住次序答題,遇到kick手題目又死咬住,唔肯跳過做下一題,結果搞到答唔晒份卷。呢個係性格問題,唔關答題技巧事。

言歸正傳,究竟用兩分鐘答呢條問題係唔係太慢呢,會唔會連小學都唔收呢?話時話,都唔記得當年報讀小一使唔使考試添。仲有,其實嗰時幼稚園有冇教過英文呢,真係一啲都諗唔起喎。唯一有印象係小學(定係中學呢?)有課書教過「A man and a pan」,比起而家啲小一入學題,嗰時嘅英文課程簡直低B到無倫!不過咁,呢條小一入學題又真係深咗啲,相信唔係所有幼稚雞都識答囉。

啲人成日話香港貧富懸殊有幾嚴重,不過如果有個乜乜係數量度香港學生嘅英文程度差距,我諗一定勁過堅尼係數啫。聽個教書嘅朋友講,佢學校有啲中二生,連A至Z都未識得齊囉。我當時又唔好意思問,究竟嗰啲學生點解可以由中一升上中二嘅呢?但係另一方面,香港有啲細路英文就勁到無倫。我成日搭都聽到啲四五歲嘅豆釘(當然唔係鬼仔啦)同啲賓賓對答,英文都不知幾流利,而且發音仲好準添,肯定唔係賓賓教嘅。呢條小一入學題,真係未必難得到佢地囉。

雖然我好肯定個答案唔會錯,不過都睇埋相關報導內容。話說記者喺網上見到呢條「小一入學題」,佢自己用咗五分鐘先答得出(哈哈,仲屎過我!),覺得會唔會太難咗啲,所以就揾有關小學校長確認吓。最後證實單嘢同嗰間小學無關,純粹係網民惡搞。

上網摷過,其實呢條IQ題已經流傳甚廣,仲有好多唔同嘅變奏添。咁究竟係邊個喺度造謠生事呢?講明話係「聖方濟各小一入學題」嘅網頁都摷到幾個,其中以名為「我哋唔政經」嘅飛屎卜最早post出嚟,暫時嫌疑最大。都唔知啲友乜嘢心態,無聊就上鹹網打發時間啦!搞埋晒啲咁嘅嘢,等我仲以為自己啲英文連小學雞都不如添!

7 則留言:

  1. Arm;

    我睇見只有一字喺答案,心裡面即喺諗,Fucking bullshit ,咁難嘅!跟住諗,會唔會喺Fucking呢?不過,估錯唔好鬧我,我只喺本能反應咋!無心機去諗呀!等你開估喇!

    回覆刪除
  2. 佛爺:
    哈哈,「eat fucking」?講唔通囉!反而「bullshit」就有啲近磅。英文有「eat shit and die」嘅講法,如果唔係有7-letter word呢個要求,「shit」都勉強講得通架。其實要答呢條題目,關鍵反而係喺一句中文:「萬般帶不走,唯有業隨身」。西人向來冇「業」呢個概念,所以後半句唔使理。話時話,近年好似都有啲白痴西人學人講乜嘢karma,不過應該未成氣候囉!

    回覆刪除
  3. 我火星文 5++

    英文?乜黎架 XDDD

    回覆刪除
  4. nothing!

    不過是以前睇過的:p

    回覆刪除
  5. laulong,
    班環保聖鬥士都講啦,地球就嚟玩完架喇!人類遲早要移民火星,你識火星文就最殺食啦!

    Coffee,
    中咗,不過冇獎!只要集中火力專攻第四個空格,呢條題目其實一啲都唔難囉!

    回覆刪除
  6. 呢啲似喺智力題同英文好唔好好似冇關係啵。

    回覆刪除
  7. eric,
    呢條根本就係IQ題。英文好都唔一定答到,但係唔識英文就一定答唔到!

    回覆刪除