2013年11月22日星期五

撞鬼

係咪覺得今日張相好熟口熟面呢?冇錯,張相基本上係之前嗰篇chok相其中之一。係就係,唔係就唔係,點解會話「基本上係」呢?想知點解,大家就要坐定定,聽我娓娓道來喇。

其實上篇嗰張相曾經執過……哈哈,咁講真係好多餘,我所有相都執過先出街架啦!特別強調「執過」,係因為除咗光暗色調減噪呢啲基本嘢,仲做咗啲結構上嘅改動,執走咗一啲嘢。

話說幾十年前去八仙嶺行山,途經一間荒廢村屋,覺得幾有懷舊feel,就喺門口影咗張相留念。當時影完就走,冇諗過要入去探險,因為呢類廢屋,肯定會成為行山人士解決三急嘅地方。

啲相晒咗出嚟,第一時間就喺晒相鋪睇,效果都相當滿意。揭吓揭吓,揭到去廢屋嗰張,竟然發現下巴有幾條類似血痕嘅嘢,一張俊臉立時變得詭異非常!當時反應係:有冇搞錯,晒成咁都得?!即刻摷番張底片睇吓,當堂嚇到傻咗,原來連底片都有!再睇清楚,啲「血痕」呈瘀紅色,總共有五條。無論喺顏色或形態上,都十足十俾人用手搲出嚟咁,真係好得人驚囉!當時就諗,會唔會係有「人」唔鍾意我喺佢屋企門口影相呢?

整啲咁嘢出嚟,幾十年前當然無計可施,唯有收埋張相喺櫃桶底啦。到而家呢個數碼年代,用Photoshop消滅區區幾條血痕簡直係依斯執,張相終於可以重見天日嘞。

睇住張相,自然又諗番起當年行山所見。雖然嗰帶已經了無人煙,但係山墳沿途都見到唔少,相信係附近村民最後安身之所。既然唔係搬到冇雷公咁遠,得閒返舊居行吓都係「人」之常情啫。咁啱見到有不速之客喺屋企門口擺款影相,用另類方法下逐客令都唔出奇。間廢屋伶伶仃仃,左右唔見有其他鄰居,睇嚟屋主並唔係好客之「人」囉。

哈哈,情節同「凶兆」有啲相似,唔知咁算唔算係撞鬼呢?雖然有過疑似撞鬼經歷,其實我係唔多信鬼神之說架。不過唔信唔代表唔怕,尤其是去到陌生地方。以前返大陸出差,一返到酒店房就會開晒所有燈,就算瞓覺都唔會熄囉。咁當然係唔環保,不過鬼叫我怕黑咩!話時話,好彩本人光撐撐都瞓得著啫!

講到怕黑,可能係因為有過童年陰影。咁又要講吓一單陳年舊事嘞。

話說九十幾年前,本人只得幾歲。嗰時屋企有個執人地嘅古老衣櫃,其中一邊櫃門鑲咗塊全身鏡。有晚半夜起身交水費,只係開著一盞昏暗嘅檯燈照明。交完水費,經過衣櫃前面,好自然咁停低照一照,點知咁就照出事嘞。

鏡中所見,除咗自己之外,竟然仲有另外一個「人」!佢企咗喺我左後方,係一個著住工人褲、比我更細嘅細路。屋企無啦啦出現咗個陌生「人」已經夠怪架啦,不過有樣嘢仲怪,佢塊面冇眼耳口鼻架!如果遇到咁嘢畸屎,唔知大家會有乜反應呢?

我當時覺得好奇怪,擰轉頭睇吓,根本唔見有其他「人」。再望吓塊鏡,淨係得番我自己,咁咪上床繼續瞓囉。嗰時又真係唔識驚喎,可能係因為嗰個「人」嘅樣完全唔恐怖啦。佢冇眼耳口鼻,塊面凹凹凸凸,就好似一個菠蘿包咁。對一個幾歲嘅細路嚟講,又真係冇乜驚嚇效果啫。如果係啲青面獠牙、或者條脷泵到落肚臍嘅鬼樣,話唔定會嚇到我瀨屎囉。哈哈,嗰時啱啱交完水費,想瀨尿都唔得啦!

後來再大啲,對「鬼」嘅認知多咗,諗番起單嘢先識驚,而且越諗越驚添。又再後來,本人已經唔信鬼神之說,就算再諗起都唔會當係乜嘢一回事。不過單嘢始終解析唔到,而影響亦持續到今時今日。自從後來識驚之後,我喺光線唔充足嘅環境係絕對唔會照鏡架!話時話,我都聽過好多人講,話夜晚唔好照鏡,否則隨時會見到啲唔想見嘅嘢囉。

有時都覺得好矛盾,我明明唔信有鬼,但係又會驚撞鬼。夜晚完全唔照鏡當然冇可能,所以本人一早就諗定對策。常言道:人怕鬼三分,鬼怕人七分。萬一見到啲唔想見嘅嘢,我會大喝:X!死X開啦!說明一下,兩個「X」係分別代表唔同嘅字。好彩,本人一直未有機會使出呢招殺手鐧!Touch wood!

八仙嶺

9 則留言:

  1. 係女鬼 dap 你糖,咀完你又摸你幾吓 :P

    話時話,黑夜之鏡,太邪太恐怖,我都唔夠胆望!

    回覆刪除
  2. laulong,
    哈哈,如果摸吓都要見紅,咁一個唔好彩俾女鬼責,咪實聽粉身碎骨都得?!

    回覆刪除
  3. 嘩,好得人驚!速逃!

    回覆刪除
  4. Coffee,
    驚還驚,我建議你都係諗定應變方案好啲,萬一夜晚照鏡見到……

    回覆刪除
  5. 吾!……你應該穿件道士袍來瞓覺。嘻嘻!

    回覆刪除
  6. 佛爺:
    哈哈,如過撞著隻鍾意玩cosplay嘅女鬼,咁可能仲大鑊喎!

    回覆刪除
    回覆
    1. 咁又喺,所謂道高一尺,魔高一丈。Cosplay女鬼當你喺方丈咁上身,真喺比鬼渣乾。嘻嘻!

      刪除
  7. 佢同你玩下啫,好彩無事咋!

    回覆刪除
  8. 佛爺:
    哈哈,方丈都好啲喇,如果當咗唐僧,咁就渣都冇得剩囉!

    Jessica,
    哈哈,咁玩法,心血少啲都死得人架!

    回覆刪除