2013年9月18日星期三

低B列傳之:姣婆遇著脂粉客

忽然想潮吓,學人講吓本土文化。本人係一件老餅,當然唔知呢排MK仔或膠登仔興玩啲乜。今日想講嘅係一句比本人更老餅得多嘅本地俗語:姣婆遇著脂粉客。

有網民將呢句俗語理解為「當雞蟲遇上雞」,其實咁係絕對唔正確,因為句嘢既唔香豔,亦無關某種不道德交易。呢句俗語而家已經好少人講,啲細路唔知點解都好正常。其實真正意思係:兩個人(唔一定係一男一女)臭味相投,一拍即合。要注意一點,句嘢帶有貶義,所以「臭味相投」要按照字面意思理解。係咪有啲抽象呢?唔緊要,就等我舉個實例,大家睇完就會明架喇。

話說毛姑姑同飯桶威都鍾意惺惺作態,正係惺惺相惜、臭味相投。自從雙雙晉身垃圾會,佢地更萌生相逢恨晚之慨,結果一拍即合,組成一個名為「香肛本土」嘅政團。「香肛本土」嘅宗旨係將一切議題(包括但不限於民生、文化、甚至語文)政治化,利用無中生有、小事化大等政治技巧製造中港矛盾,誓要將香港搞臭,變成香肛。奈何先天所限,搞出嚟嘅嘢冇一樣唔係貽笑大方,簡直俾佢地笑爆嘴。呢兩條友,用「小丑」二字都不足以形容,我就話佢地直頭係低B囉!

「低B二人組」近排又有代表作,佢地化身「本土語文警察」,專捉啲用咗「大陸用語」(見下圖)嘅本地傳媒,仲去信通訊事務管理局要求關注添。毛姑姑更指出,CY成日將啲「大陸用語」講到朗朗上口,佢擔心引入咗呢一套,會成為大陸嘅統戰工具喎。

哈哈,真係俾毛姑姑笑死,人講統戰佢又講統戰,究竟條低B婆知唔知統戰係乜春?!如果用幾隻字就統到,咁香港俾架仔統咗九世啦。「達人」、「熟女」、「人妻」、「顏射」呢啲唔通都係本土詞彙?點解毛姑姑又唔批判吓呢?淨係識針對「大陸用語」,究竟係毛姑姑無知,定係佢吃裡扒外呢?不過咁,我又唔會話佢係漢奸,因為咁低B嘅人根本配唔起個「奸」字!

香港精神之一係包容多元文化,所以雖然我十分唔like架仔,都唔覺得引入呢啲詞彙有乜問題。而且語文係有機生命體,會自我演化,又會混種交配、互為影響,機制只得一個,就係「自然選擇」。事實上,唔少「香港用語」一早就已經反攻大陸啦。又例如,猩爺嘅無厘頭金句一樣可以傳遍神州大地。連經典如牛津大字典,好多年前都已經收錄埋嗰個F-word。估唔到喺呢個年代,竟然仲會有人鼓吹文化自閉,拒絕接觸「非本土」用語。飯桶威都算嘞,睇佢都唔似係有文化嘅人。毛姑姑先嚇死人,仲話係大學講師添!哈哈,話時話,唔知邊間大學咁有悻請到佢呢?本人喺度俾個建議毛姑姑,佢應該呼籲香港人唔好睇諾貝爾文學獎得主莫言嘅書,因為睇咗唔止會學到大陸用語,仲會學埋大陸農村用語添呀,肯定死多二錢重囉!

始終,香港有言論自由,「低B二人組」鍾意廢噏都只係自暴其短,唔算乜嘢大問題。不過佢地去信通訊事務管理局要求關注就離晒大譜嘞,咁根本就係干預傳媒嘅編採自主。唔知點解妓協冇人企出嚟講番兩句呢?

至於兩件低B提供嗰個「兩地用語對應表」,又係笑死人冇命賠。成個表由頭睇到尾,除咗有部分譯名香港人可能用唔慣,其他「大陸用語」我就唔覺得有問題。而且有啲根本就唔係新近引入,例如「內地」一詞,起碼我自己就用咗幾十年嘞。而「冷氣」係口語,老師都有教我地書寫嘅時候要用「空調」囉。

而且,佢地所謂嘅對應用語,好多根本就唔完全對等,其實存在住若干細微分別,例如「勢頭」同「趨勢」、「水災」同「汛情」、「山泥傾瀉」同「泥石流」、「完美」同「到位」、「二世祖」同「富二代」、「好評」同「正面評價」等等。最搞笑係「小電影」同「微電影」,簡直係南轅北轍添。飯桶威冇理由未睇過小電影啫,咁都搞得錯?!咪住,其實飯生未睇過嘅可能係微電影喎,所以先以為等同小電影囉。

呢啲都算嘞,兩條低B唔俾人用「祖國」,就真係火都嚟埋。佢地要數典忘祖,或者要幻想自己係石頭爆出嚟,呢啲係佢地嘅事,但係有乜理由干涉埋人地點諗先。我祖先世世代代都喺廣東生活,直到我老豆嗰代先落嚟香港,咁中國唔係我祖國係乜!另外,釣魚島係中國領土,中國官方用得呢個名,呢個名就有絕對權威性,兩條低B有乜資格喺度指手畫腳先!

最搞嘢係居然連啲電影譯名都攞埋出嚟講。就算人地啲戲名譯得唔好,都只係喺大陸用啫,關你兩條低B叉事咩!而且,佢地提供嘅所謂譯名,其實只係啲無聊網民嘅惡搞之作。兩條友求其喺網上摷到啲嘢就如獲至寶,完全唔查證吓資料嘅真確性,仲懶醒咁攞出嚟公諸同好。連資料蒐集都馬虎成咁,都算低中之低喇!等我醒吓佢地啦,如果想揾電影譯名,應該去國內嘅電影資訊網站,例如「豆瓣電影」。

講開電影,又順帶一提「好萊塢」。呢個譯名喺文字媒體已經用咗好多年,都唔知點解兩條低B仲會攞出嚟大做文章。等我估吓先,飯桶威梗係成日唱「荷里活大酒店」啫。如果用「好萊塢」代替,咁又真係唔啱音囉。哈哈,其實我都識唱架:荷里活有間大酒店……

大家睇完以上實例,係咪對「姣婆遇著脂粉客」呢句俗語了解多咗呢?

Serbia

網上圖片

10 則留言:

  1. 「小電影」等同「微電影」?真係笑死人!

    兩條廢契,一個爛缽,一條廢柴,香港廢物毒物真係太多!

    回覆刪除
  2. 唔知點解有唔少人成日俾位人入,想說服別人都冇啲力嘅!

    btw,我唔睇小電影,但我睇微電影,千祈咪變成睇小電影呀:p

    回覆刪除
  3. 天氣唔好,近來真係好多人有病。

    回覆刪除
  4. laulong,
    哈哈,校長你好絕呀!「一個爛缽,一條廢柴」,既象形又會意,真係夠晒抵死!仲有,你啲霞浦相越出越正,睇到我流晒口水添!

    Coffee,
    哈哈,其實諗落都幾好啫,雖然我睇嘅係小電影,但係都可以扮吓潮,話俾人知我鍾意睇微電影!

    Ebenezer,
    嗰兩件低B都只係有病,但係我就隨時會俾佢地笑死,真係好蝕底呀!

    回覆刪除
  5. 姣婆就是是毛蚊淨和飯桶威,脂粉客就是一些B低市民囉!

    回覆刪除
  6. 佛爺:
    冇錯,講得啱,其實任何事物都可以從唔同角度去睇!

    回覆刪除
  7. 哈哈,去霞浦喇,唔太遠!

    但我啲相,就黎消乏喇,派完貨就冇 XDDD

    回覆刪除
  8. laulong,
    哈哈,睇到「消乏」兩個字就即刻聯想到「指頭兒告消乏」添,罪過罪過!講真,其實我嘅口水係往肚裏流,要披星戴月咁辛苦,都係咪搞嘞!

    回覆刪除
  9. 係人都有九噏o既自由,好似淫老師隨街吠咁。最慘係 D 正義傳媒同佢地大吹特吹,好多老鼠跟住魔音,就o黎飛墮懸崖。

    回覆刪除
  10. 嚴嶺鋒:
    梭得堆!啲垃圾傳媒正喺度製造緊一大班偏視偏聽、缺乏獨立思考能力嘅愚民!墮崖係必然嘅事,最慘係香港俾佢地搞到臭氣薰天、冇日安寧!

    回覆刪除