2013年8月23日星期五

謹此致歉!

先賢教我地要不時自我檢討,有「吾日三省吾身」之說,本人向來奉為座右銘。啱啱屎坑走一回,趁等運到之際諗番呢兩日做過同講過啲乜嘢,果然發現自己有不足之處。早兩日講過林老屍單嘢,而家再睇番,先發覺篇文真係有問題。

本人雖然墨水唔多,但係勝在中肯持平,論點當然唔係問題所在。文中對林老屍同眾粉屎嘅批評,絕對係有碗話碗有碟話碟,並無誇張失實或任意扭曲。只係行文之時,態度稍有輕挑,措辭略嫌尖刻,有負讀者對一位謙謙君子嘅期望,本人深感歉疚!

首先,本人曾提及林老屍副尊容,話佢「肥腫難分」、「疑似豬頭」、「連砵蘭街阿伯都唔吼」。冇錯,呢啲都係事實,林老屍的確生得貌賽無鹽。不過生得醜唔係林老屍嘅錯,只可以話係一個悲劇,佢同佢老母都唔想嘅囉。本人冇對身罹不幸嘅人溫言安慰、勸佢節哀,反而連番嘲弄,真係非常慚愧!

再者,本人竟然冇懷住悲天憫人之心,唔識體恤弱勢社群,實在罪過!大家有冇覺得奇怪,林老屍明明如狼似虎,直頭強悍無匹,又何弱之有呢?咁就要聽我道來喇。

本人喺屎坑分析過,林老屍嘅言行作為絕非任何正常人做得出,結論只有一個:佢有病!

就短片所見,林老屍唔止口出狂言,辱罵警員時仲張牙舞爪,肢體動作極多,顯然係處於極度亢奮狀態。條片6分幾鐘,開始嘅時候林老屍已經鬧緊,一直鬧到條片播完都未停過。佢全程鬧咗幾耐雖然不得而知,但係就肯定遠超一般潑婦罵街嘅範疇。由此推論,佢好可能患有躁狂症。另一方面,頻繁而突兀嘅肢體動作,伴隨住可怖而扭曲嘅面容,亦有可能係由肌肉痙攣或腦癇症引起。

林老屍語無倫次,言詞內容極其低B之餘又九唔搭八,如果唔係有語言障礙,就可能係精神錯亂所致。林老屍要X警員老母,亦表示佢可能有性別認同障礙,覺得自己係男人。事實上,得睹林老屍粗獷不文嘅風範,真係連我呢個麻甩佬都自愧不如囉。話唔定佢仲幻想自己有啫啫添,咁就係思覺失調嘞。

條片曝光之後,林老屍否認講過嗰句四字真言,仲話係俾人配音插贓。本人絕不懷疑林老屍嘅誠信,相信佢唔係存心抵賴,但係鐵一般嘅事實擺喺眼前又點解析呢?好明顯,林老屍做咗又即刻唔記得,應該係患咗腦退化症。至於插贓嫁禍云云,亦說明咗林老屍可好能係妄想症患者,成日幻想自己俾人迫害。

對一個百病纏身嘅可憐人嚴詞譴責,未免稍欠愛心同包容,實在於心有愧!所謂「錯就要認,打就企定」,本人謹此向各位扑友鄭重致歉!至於林老屍,本人亦專誠揾咗隻移居英國、趁暑假返鄉下尋根嘅科索沃小學雞向佢致意!

作為一個有公民責任感嘅扑客,淨係道歉當然唔夠。所以本人亦希望亡羊補牢,諗吓有乜方法可以幫到林老屍呢位可憐人,算係為香港嘅弱勢社群稍盡棉力。

首先,社處應該即刻關注林老屍呢個畸屎,睇吓有冇需要轉介佢去青山。任由林老屍喺街頭遊蕩,只會令病情惡化,喺青山佢先會得到最適切嘅照顧。雖然社會上普遍支持精神病患者融入社群,但係林老屍好可能有暴力傾向,肯定會嚇親班小學雞,所以留喺學校並唔適當。

如果連青山都唔收,民間志願組織亦應施以援手。舉個例,希望紫藤可以屏除門戶之見,考慮破格收容,幫吓呢位可憐嘅姐妹。正如一位網友所言,林老屍係「師中之婊」,其實咁都算有啲同門之誼,希望紫藤可以認真考慮吓囉。

向積極方面睇,有病唔等同無能,只要有機會發揮所長,病人一樣可以對社會作出貢獻。八大不妨建立調理農務學院,並於其下開設蘭花系,誠邀林老屍出任系主任。呢個係多贏方案,無論對林老屍、大學、以至香港都有好處。

蘭花系開正佢嗰瓣,林老屍精神有所寄託,自然唔會隨街發癲,真係藥箱都變首飾箱啦。至於大學本身,有林老屍坐鎮,啲熱愛民主嘅學生就唔會走堂去示威遊行,絕對有助提升學術水平。最後,憑住林老屍喺蘭花系嘅卓越成就,香港亦有望一吐多年烏氣。大家都知啦,喺近年熱演嘅雙城記,香港鑊鑊輸俾新加坡,仲要輸足九條街添。作為香港一分子,本人都覺得好冇面囉。有林老屍呢位蘭花系高手出馬,將新加坡國花撚到出神入化,香港肯定可以贏番鑊啦,話唔定坡佬會再一次向香港取經添呀。哈哈,為港爭光就全靠林老屍喇!

Young Kosovo immigrant now living in UK, Pristina, Kosovo

11 則留言:

  1. 這個婆娘,影衰女人,有損市容,應該長載面紗,唔好獻世!

    回覆刪除
  2. laulong,
    戴咗面紗都仍然可以爆粗,造成噪音污染,所以佢都係入青山長住好啲!另外,貴扑而家冇得留言,咁我唯有喺呢度講啦。你霞浦啲相真係正到無倫,睇到我心郁郁添!不過跟攝影團要披星戴月,真係太辛苦喇!

    回覆刪除
  3. 佢應該係情緒易失控的,因為記得條片中佢大吼話佢老公同佢一樣咁癲!

    回覆刪除
  4. Coffee,
    哈哈,佢屋企有兩件躁狂症,肯定日日家嘈屋閉,開拖多過食飯,真係前世唔修呀!

    回覆刪除
  5. 整件事前前後後出現過的種種都令人心寒,又豈只是這個好可能只是笨人出手的婆娘?放她一馬吧。

    回覆刪除
  6. 寫得好抵死, 此人行為和形象的確令人噁心, 後期她也有點知驚不敢認講過中文粗口, 認不認已無關重要,

    回覆刪除
  7. Ebenezer,
    哈哈,寫咗林老屍兩鑊,乜嘢點子都已經用晒,想唔放佢一馬都唔得啦!

    ep,
    歡迎光臨!哈哈,有時我都覺得自己真係好鬼抵死架!至於林老屍,佢最大嘅敗筆唔係講過嗰句四字真言,而係講咗又唔認,令我好鄙視佢囉!

    回覆刪除
  8. 香港有個乜七學者陳雲講,要聯署去信美國白宮,要求美國關注林老師「被迫害」這件事.美國現在有一種新的腦部掃瞄技術,勁過磁力共震掃瞄,連「腦退化症」也可以掃瞄到,只是費用非常昂貴.不如叫陳雲發起全港募捐,讓林老師去美國掃瞄一下個腦仲好喇!嘻嘻!

    不過咁,林老師可能真係中哂你所講的全部病症.陰功!

    回覆刪除
  9. 佛爺:
    哈哈,其實陳教授去留言嗰個好可能係白宮痔瘡膏嘅網頁啫!如果美國嗰種新技術可以掃描埋肛門,對陳教授嚟講就真係天大喜訊嘞!至於林老屍嘅畸屎,根本就唔需要乜嘢突破性科技,入青山休養番十年八載咪得囉!

    回覆刪除
  10. 都值得去架,幾日貨仔搞掂 ^^

    回覆刪除
  11. laulong,
    哈哈,其實霞浦諗咗好多年架喇,不過一直都係處於意淫階段,因為跟攝影團實在太辛苦囉!

    回覆刪除