2013年6月7日星期五

個腦裝乜?

六四當晚睇電視新聞,豬聯會話有十五萬人參加維園燭光晚會,警方就話有五萬四千人。兩個數字爭咁遠,你會信邊個多啲?我就覺得兩方面嘅估計都未必可靠,不過相信警方嘅數字會比較接近現實。香港嘅所謂民主派,為求達到政治目的,從來都不擇手段,六四七一嘅遊行集會人數,鑊鑊都作大作到離晒罩,根本就信唔過。睇番部分媒體(豬如爛生果同大紀猿)嘅網上報導,竟然淨係引述豬聯會嘅數字,而冇提及警方嘅數字,完全視讀者知情權為無物。呢啲咁嘅媒體,恐怕比豬聯會更唔可信。

講真,我都預咗豬聯會實會作大,估唔到嘅反而係班友竟然咁克制,只係作大三倍咁少囉。今年天公造美,不停落狗屎雨,啲人個個擔晒遮,根本唔可以企(或坐)得太密,要填滿維園草地話都冇咁易。而且雨遮嘅面積比人頭大得多,由高處望落去真係好墟撼。豬聯會豬公呢鑊簡直捉到鹿唔識脫角,就算作夠五十萬都有人信啦!

鏡頭一轉去到銅鑼灣,見到學民屍潮班細路玩緊街站,仲同警察發生齟齬。雖然班友都係搞事,但係反而冇豬聯會豬公咁令人厭惡。始終佢地仲係細,而且涉世未深,行事有啲衝動,但係唔會有太多利益計算。我地都係過來人,亦曾經有過熱血激情,自然明白有赤子之心並唔係壞事。班細路搞事得嚟讀書又掂,實在不忍深責。不過奉勸佢地,而家世道唔同晒,啲人已經冇以前咁單純,年輕人都要擦亮眼,認清楚邊個係拐子佬。

鏡頭一轉又去到西環,見到有人玩緊BBQ。原來係一個叫做「香肛人優先」嘅「政治」組織,為咗抗衡豬聯會壟斷搞嘅燒烤晚會,話要合法燒五星旗喎。現場所見,除咗一個燒烤爐,就只得小雞三幾隻。再睇真啲,原來係幾件疑似MK仔同援交妹嘅物體,霎時令人倒抽一口涼氣。同樣都係仔妹,點解會同學民屍潮嗰班爭咁遠嘅呢?呢幾件嘢三尖八角、甩皮甩骨、樣衰格賤、望之不似人形,好難唔令人聯想到嗰啲讀書唔成、成日周圍撩事鬥非嘅童黨囉。所謂五星旗仲搞笑,原來係幾塊有星星通花嘅火腿片,班友簡直係食飽飯冇嘢做。哈哈,唔通佢地真係諗住食完火腿,順便喺中X辦門口大解?除咗無聊,班友仲死蠢添。想要搶人地客,結果自己拍烏蠅,真係瘀到爆。

見班友咁死蠢,本人就上去佢地嘅飛屎卜睇吓,話唔定會發現更多笑料。果然不出所料,成個網頁都係腦殘人士講埋晒啲白痴嘢。首先,班友開宗明義話香港人唔係中國人喎。腦殘人士最明顯嘅特徵係冇邏輯思維,講嘢自相矛盾。香港係中國領土,全名係中華人民共和國香港特別行政區。除非擁有外國國籍,而又放棄咗中國國籍,否則香港人必然係中國人,無論你自己認唔認都好。班友又有冇問過父母(或祖父母)係咪中國人呢,唔通佢地以為自己係石頭爆出嚟嘅?仲有,班友又憑乜咁講呢,佢地有冇問過其他香港人先?所以班友根本唔可以代表香港人,佢地只可以代表香肛人囉!另外,班友又擅自篡改香港嘅語文政策,話「香港的法定語言為英語及粵語」。喺「香港政府一站通」網站,有關語文部分係咁講:「香港的法定語文是中文和英文」。有少少常識嘅人都知道,中文同粵語並唔對等。究竟係班友連咁嘅常識都冇,定係佢地以為本土派大晒,連基本法都唔使跟?哈哈,究竟班友個腦裝乜嘅呢,唔通就係相中嗰啲?!

腦殘都未算恐怖,集體腦殘先得人驚。「香肛人優先」嘅飛屎卜有兩萬幾個likes,假設有半數仲在學,咁都咪話唔大鑊。香港推行融合教育,腦殘一樣入讀主流學校,一班有一件都死得人啦。如果你係中文老師,有件腦殘話文言文、白話文、唐詩宋詞元曲都唔係香港法定語文,佢有權唔讀,你會點做呢?

Horse dung, Nepal

8 則留言:

  1. 我覺得香港官方語文應該是粗口,咁就無爭議性喇!嘻嘻!

    回覆刪除
  2. 社會越來越分化,莫講話大是大非,小事都可以引起大紛爭。

    回覆刪除
  3. 15 萬人是呃鬼!

    我最憎人講大話!

    回覆刪除
  4. 兩萬幾個likes又真係幾得人驚...

    回覆刪除
  5. 我真係唔明,自己明明係中國人,點樣話唔係呢?唔通佢地照鏡時見到第二啲野???? ^_^

    回覆刪除
  6. 佢地出本腦殘遊記,將來可以做教材架。

    回覆刪除
  7. 佛爺:
    哈哈,都快架喇,啲議員喺垃圾會都已經粗口滿天飛啦!

    Coffee,
    哈哈,如果唔將小事話大,啲政棍仲邊有存在價值!

    laulong,
    更討厭係講大話仲要講到振振有詞囉!

    奕山:
    哈哈,兩萬幾個likes都未算得人驚,43萬人上街仲恐怖呀!

    Jessica,
    而家都未算呀,我相信有咗普選之後仲難搞囉!

    SKII,
    哈哈,照出嚟當然係黃皮黑髮,不過班友係唔會信鏡架!

    Ebenezer,
    哈哈,而家阿豬阿狗都出書,市場已經攤薄晒喇!

    回覆刪除